1 Petrus 4:18 - Taaz Weru Witu u Nunuwu'en Tombulu

¹⁸ Im witu um Pinantik Lenas é méipantik in téntii, “Sa sé tou ulit én tawi zéi'kan ipilot im witu un ukuman wana a singkéla' néra, kura u lamamuali wia sé tou zéi'kan pandung si Opo Empung wo mahsingkéla' wia ni Sia?”

1 Petrus 4:18 ပူးပေါင်းရင်းမြစ်များ

Lukas 15:1

Makasamé, sé menanagi am pajak wo sé tou memua-muali a singkéla', méyé in tumalinga si Yesus.

Lukas 23:31

Ni Aku éng kimuama un téntu pahpaan sa im wia ni Aku si zéi'kan nimahwangu-wangunla a singkéla' ni séra é nimangun an téntu, tantumo im wia ni kamu sé mahwangun a singkéla', ni séra é mangun a lumouspé'mé niitu. Ni Aku én tanu ung kai mata'pé' un zéi'kan mala'ung péléng in tutungana, taan ni kamu én tanu ang kai pera u mala'ung péléng in tutungana.”

Kisah Rasul-rasul 14:22

Im witu, ni séra nimenté' un até né tou ma'éman wo mahsésa wia ni séra in tia' mazéi' i ma'éman wia si Yesus. Ni séra zua kasii mahkua i sé tou sé muntep witi Kakolanoan ni Opo Empung é léwo'zéi' i mendan an zézéha.

Kisah Rasul-rasul 27:24

Si malaekat itii éng kimua wia ni aku in téntii, ‘Paulus, tia'mo maindé'! Ni ko é léwo'zéi' masumaru wia si Kaisar i matotozen um pahéndo-éndoan tumoro ni ko. Wo pahpaan u raraatéan ni Opo Empung wia ni ko, péléng sé tou sé mahwali-wali kariamu wia u londéi tua'na kenu én zéi'kan maté.’

Kisah Rasul-rasul 27:31

Taan si Paulus éng kimuama wia si tonaas né sana atus suraro karia né surarona, “Sa sé memamaayang wia u londéi tua'na kenu zéi'mo wia'i, ni kamu én ikaléwo'.”

Roma 1:18

Si Opo Empung é mapailek un upi'-Na im witi kasendukan pahpaan péléng a singkéla' wo a léwo'an né tou, a rimaung sé tou walina i mata'u an tutuzu' ulit tumoro ni Sia.

Roma 5:6

I ni kita zéi'kan makawawa i mapapilot un touta in esa im witu un ukuman pahpaan a singkéla', si Kristus nimaté pahpaan ni kita mahsingkéla', witu un oras tinotozo ni Opo Empung.

Roma 5:8

Taan si Opo Empung é mapailek u raraatéan-Na wia ni kita karia ung kenu: I ni kita mahsingkéla'pé', si Kristus é nimaté pahpaan ni kita.

1 Korintus 10:12

Niitumo, séi si mahgenangla um pa'émanenna én enté'mo, ni sia é mile-ilek én taa ikakiit uman i mahwangun a singkéla'.

1 Timutius 1:9

Pahpaan kata'uanta un ukum Torat itii én zéi'kan méiwéhé wia sé tou mahwangun an ulit, taan iwéhé wia sé tou mahsaru si Opo Empung wo sé soo mahtali-talinga ni Sia, sé soo mahkiit um paaz-Na wo sé mahsingkéla', sé zéi'kan siapa pa'émanen wo sé megena-genang uman am wia ung kaayahan, mahwunu' si ama' wo si ina' wo sé mahwunu' sé kasuat tou,

Ibrani 4:1

Zozo' un taaz ni Opo Empung i muntep witi tampa makanaan-Na én zéi'kampé' méikana', taan mile-ilek wo tia' im wia ni kamu ém wéwéhan si pahgenangela in ikatula'u wo zéi'kan mata'u muntep witi tampa makanaan itii.

Yakobus 5:6

Ni kamu é nimukummola wo nimunu'mola sé tou ulit wo séra zéi'kan mahsaru ni kamu.

1 Petrus 5:8

Ni kamu é léwo'zéi' i mile-ilek wo tuméga-tégam! Pahpaan si tonaas né sétang si kakoro' niou itii é melili-liklik menéro tou ing kalan, masuat wo si singa melili-liklik i menéro tou in tongko'en.

2 Petrus 3:7

Taan karia u Nuwu'-Na, u langit wo ung kaayahan in tarékan én zéi'kan linéwo' karia un api. Im witumokan un endo ni Sia in tumotoz am pahwangunen né tou in ulit kaapa zéi'kan, ni Sia é luméwo' sé tou zéi'kan pandung ni Sia wo kasii luma'ung u langit wo ung kaayahan.

Yudas 1:15

Ni Sia é métumotoz ulit kaapa zéi'kan am pinahwanguné né tou wo mémukum sé tou léwo' pahpaan a léwo'an pahmualin néra wo péléng a nuwu' zéi'kan wangun an ipahkua né tou mahsingkéla' itii wia si Opo Empung.”