1 Petrus 3:16 - Taaz Weru Witu u Nunuwu'en Tombulu

¹⁶ wo karia ung genang lé'os. Sa um pakahwingkot niou én téntu, niitu é mangun sé tou menuwu-nuwu' a léwo'an tumoro ni kamu sé mahwangun a lé'os pahpaan i mahkiit si Kristus é maizang, pahpaan a léwo'an penuwu-nuwu'en néra itii.

1 Petrus 3:16 ပူးပေါင်းရင်းမြစ်များ

Matius 5:11

Mahpaa-paazola ni kamu, sa pahpaan ni Aku, ni kamu pahséro'an karia a nunuwu'en merara un até wo ni kamu ém pahzézéhan, wo kasii pahtawuruken péléng a léwo'an.

Kisah Rasul-rasul 24:16

Pahpaano niitu ni aku sekezé é mahtututu' i menou-nou karia un até weresi, witu u sinaru ni Opo Empung wo witu u sinaru né tou.

Kisah Rasul-rasul 28:22

Taan ni kai ém paaz in tumalinga kura ung ginenangmu tumoro um pa'émanen um pahkiitennu. Pahpaan ni kai én timalingamola i sé tou wisa uman ni séra é mahsaru um pa'émanen um pahkiitennu itii.”

Roma 9:1

Un ikuakuma én ulit pahpaan ni aku én anumo ni Kristus, ni aku én zéi'kan mahtowo. Karia ung genang lé'osku um pahahkiten ni Roh Lenas, ni aku éng kumuama u nuwu'ku itii én ulit.

2 Korintus 1:12

Ni kai én totoz mahlooz ung katou-touan nai pahpaan um pahwangunen nai wia sé tou wia ung kaayahan é lé'os wo ulit. Niitu un totoz méisanapa' witu um pahile-ilekan nai karia niou. Witu ung genang lé'os nai, ni kai én totoz mata'u sa niitu é lé'os wo ulit wia si Opo Empung a méyé, niitu kangkasii én tumuzu'ma wia sé tou sa am pahwangunen nai én ulit. Wo péléng am pahwangunen nai itii én zéi'kan karia ung katulapan nai in tou, taan karia ung kamang tatambér ni Opo Empung.

2 Korintus 4:2

Taan ni kai i mahpaayang én zéi'kan mahwuni-wuni ang kaizangnokané. Ni kai kasii én zéi'kan mahtowo wia sé tou wo zéi'kan mahtuzu' an zéi'kan ulit tumoro u Nuwu' ni Opo Empung. Taan, ni kai mahtuzu' an ulit ing kumiit am paaz ni Opo Empung. Karia in téntu, péléng sé toumokan sé mahtata'ula mengiit ung genang lé'os niou witu u sinaru ni Opo Empung, sa an ipahtuzu' nai ulit kaapa zéi'kan.

1 Timutius 1:19

Wéwéhan sé woopira tou é soomo mahkiit ung genang weresi néra. Pahpaano niitu ni séra én zéi'mo ma'éman.

1 Timutius 1:5

Ung kalakoan u sésésa itii, wo sé tou uli-ulit rumaraaté karia un até weresi, karia ung genang lé'os, wo uli-ulit ma'éman wia si Kristus.

2 Timutius 1:3

Ni aku éng kumua makasé wia si Opo Empung si pahpaayangangku karia ung genang weresi, tanu um pinahwanguné né nimaopoku. Sekez ni aku mengaléi in endo kaapa im wengi, ni ko ém pegena-genangengku.

Titus 2:8

an ipahkuamu ém wéwéhan torona wo zéi'kan siapa um pahséro'an, makaz sé mahsaru ni ko é maizang pahpaan zéi'kan siapa un ikua néra i mahtawuruk tumoro ni kita.

Ibrani 13:18

Tia' mazéi' i mahpengaléi tumoro ni kai pahpaan totoz kata'uan nai ung genang lé'os nai ém weresi. Pahpaan im wana am péléng ni kai é mahtututu' i menou-nou mahwangun a lé'os.

Ibrani 9:14

apapé' kasii un zaha' ni Kristus mengiité ung kawasa ni Roh Lenas si makaz ing kauré-uré é méiwéhé-Na in esa wia si Opo Empung i maéndo raragés zéi'kan siapa pahséro'an. Un zaha' ni Kristus itii u mangun un atéta weresi im wana am pemangu-mangunen an zéi'kan siapa torona, wo kita toro lumooz wo maayang wia si Opo Empung si menou-nou.

1 Petrus 2:12

Wangu-wangunen ung katou-touan niou im witu u saru-sarun né tou zéi'kan mata'u si Opo Empung, wo zozo' ni kamu ém pahkuan né tou itii in tou léwo', taan witu un endo si Opo Empung i méyé, ni séra é malumooz wo sumigi' ni Sia, pahpaan ni séra é mahilek am pahwangunen niou an totoz wangun.

1 Petrus 2:15

Un totoz kapaaz ni Opo Empung ni kamu é mahwangun a lé'os. Pahpaan karia in téntu ni kamu é nimangun a sumah né tou lemou ing kumana'la im wayaan uman ang kanuwu'an tumoro ni kamu.

1 Petrus 2:19

Si Opo Empung én tumambér ung kamang-Na wia si tou si pahpaan mata'u ung kapaaz ni Opo Empung, ezen i masaan an zézéha zozo' niitu én zéi'kan sumala'na.

1 Petrus 3:21

Un ampuhan itii én toro pasuaten karia u sasarani in tarékan un tumuzu'mé si Opo Empung nimiloté ni kamu im witu un ukuman wana a singkéla', mengiité si Yesus Kristus si méitoumomé sumaup ni Opo Empung im wia sé nimaté. Ni kamu i sinarani én zéi'kan i meresi un tou niou, taan u sasarani én tumuzu'mé i ni kamu mahaléi wia si Opo Empung i makaileké un até weresi.

1 Petrus 4:4

Niitumo, sé tou zéi'kan mata'u si Opo Empung é mengusi-ngusingsing i nimilekla ni kamu, pahpaan ni kamu én zéi'mo mahkii-kiit ni séra in zéi'kan kumana' mahmuali an zéi'kan wangun. Pahpaano niitu ni séra mahtawuruko ni kamu.