1 Petrus 2:8 - Taaz Weru Witu u Nunuwu'en Tombulu

⁸ Ni séra ém pahkasangkil wia ni Sia pahpaan zéi'kan mahtalinga u Nuwu' ni Opo Empung. Téntu un tinotozo ni Opo Empung i mamuali wia ni séra.

1 Petrus 2:8 ပူးပေါင်းရင်းမြစ်များ

Lukas 2:34

Si Simeon mengaléi wia si Opo Empung a méhéma ang kamang wia ni séra ang kuana wia si Maria, si ina' ni Koki' itii, “Si Koki' kenu ém pinéléng ni Opo Empung i mukum sé tou Israel, sé zéi'kan ma'éman wia ni Sia wo kasii i mangun ni séra maéndo ulit witu u sinaru-Na. Ni Sia ém pinéléng ni Opo Empung i mapagenang wia sé tou a siningkéla' néra, taan lakez sé tou mahsaru uman ni Sia.

Roma 9:22

Téntu kangkasii um winangun ni Opo Empung. Ni sia éng gimenang i mapailek un upi'-Na wo mapailek ung kawasa-Na. Taan ni Sia én ezen im wia sé tou tinotoz-Namo i léwo'en pahpaan nimanguno ni Sia in totoz maupi'.

1 Korintus 1:23

Taan ni kai é mahwoka' i si Kristus é nimaté sinalip. Un ipahwoka' nai kenu éng kasoo né tou Yahudi pahpaan mahwangun un até néra i rumara, wo im wia sé tou zéi'kan Yahudi niitu ém pahkuan néra ing kalemouan.

2 Korintus 2:16

Im wia sé tou maléwo'en, ni kai é mahwou wuul pahpaan ni kai é mahwoka' i si Opo Empung é maluméwo' ni séra. Wo wia sé tou méipiloté im witu un ukuman wana a singkéla'na, ni kai ém pahkuan néra i mahwou tariis. Taan séi si makawawa i maayang am paayangen kenu?

Galatia 5:11

Wo ni aku, katuari-katuari, sa ni aku mahtuzu' wia sé tou tumoro u sunaten, kaa ni aku pahzézéhampé' né tou Yahudi? Pahpaan sa ni aku mahtuzu' wia sé tou tumoro u sunaten, si Yesus Kristus i nimaté sinalip én zéi'mo maéndo watu pahkasangkilan wia ni séra.

1 Tesalonika 5:9

Ni kita pinéléng ni Opo Empung én zéi'kan in ukumen, taan in ipilot im witu un ukuman wana a singkéla' mengiité si Yesus Kristus Mahpiarata.

1 Petrus 2:6

Witu um Pinantik Lenas, é méipantik in téntii, “Ilekena, mémoito'tol-Kumé witi Sion um watu pinéléng-Kumo wo totoz mahal. Wo séi si ma'éman wia ni Sia, zéi'kan ipapaiza-izang.”

1 Petrus 2:7

Im wia ni kamu in tou ma'éman, um watu itii én totoz mahal. Taan im wia sé tou zéi'kan ma'éman, téntii u méipantik witu um Pinantik Lenas, “Um watu méitia' né memamangun am walé é nimaéndomola watu to'tolan totoz ipahpuu-puuna, wo kasii nimaéndo watu pahkasunduian wo watu pahkasangkilan.”

2 Petrus 2:3

Pahpaan ung kaangkuman né méster towo itii, ni séra é mahtututu' i menéro zoit lakez wia ni kamu karia i mahsirita a sirita winangun néra uman. Taan pahpaan am pahwangunen néra itii, un ukuman wia ni séra én urémo niimek wo un endo si Opo Empung i luméwo' ni séra én zéi'mo isoro'.

Yudas 1:4

Pahpaan mémoikatuzu'mé im wéwéhano sé tou mahwuni-wuni kimariala ni kamu. Ni séra én urémo tinotoz in ukumen. Ni séra é sé tou zéi'kan pandung si Opo Empung wo mahséa' u raraatéan-Na, wo séra toro menou-nou mengiit u lelo léwo' un awak. Ni séra kasii é soo makaulit i si Yesus Kristus si Mahkawasa wo si Mahpiarata én esa uman.