1 Petrus 2:5 - Taaz Weru Witu u Nunuwu'en Tombulu

⁵ Ni kamu é masuat wo um watu menou-nou u niéndo ni Opo Empung im wangunen Walé-Na Lenas. Karia in téntu ni kamu é nimaéndo walian linenas ni Opo Empung i mahali ung katou-touan in iragés wia si Opo Empung. Si Opo Empung ém paaz méndo a raragés niou pahpaan am winanguno ni Yesus Kristus wia ni kita.

1 Petrus 2:5 ပူးပေါင်းရင်းမြစ်များ

Roma 12:1

Niitumo, katuari-katuari, pahpaan ung karipu'an ni Opo Empung wia ni kita, ni aku sumésama wia ni kamu, iragésla un tou niou wia si Opo Empung tanu u raragés menou-nou linenas wo ung kapaaz-Na. Niitumo un uli-ulit raragésmu wia si Opo Empung.

Roma 15:16

Ni Siamo si nimatumé ni aku i maéndo memamaayang ni Kristus Yesus i mangé wia sé tou zéi'kan Yahudi i mahwoka' u Nuwu' Lé'os ni Opo Empung. Um paayangengku én tanu sé walian i mengangali a raragés makaz sé tou zéi'kan Yahudi én toro sungkulen ni Opo Empung tanu a raragés a linenas ni Roh Lenas wia si Opo Empung.

1 Korintus 3:16

Zéi'kan kata'uan niou wé i ni kamu ém Walé ni Opo Empung wo si Roh ni Opo Empung é mahento' wia ni kamu.

1 Korintus 3:9

Ni kai éng kapaayang ni Opo Empung. Ni kamu én tanu an uma ni Opo Empung wo tanu um walé winangun ni Opo Empung.

1 Korintus 6:19

Totoz kata'uan niou sa un awak niou ém walé ni Roh Lenas, si mahento' wia ni kamu. Si Roh Lenas itii é méiwéhé ni Opo Empung wia ni kamu. Niitumo, un tou niou én zéi'mo anu niou, anumo ni Opo Empung.

2 Korintus 6:16

Apa u masuat um witu um Walé ni Opo Empung wo um witu um walé né opo-opo? Ni kita i ma'éman ém Walé ni Opo Empung. Niitu én tanu u méipantik witu um Pinantik Lenas, in téntii, “Ni Aku é mamento' karia néra, wo menou-nou karia néra, wo ni Aku é maéndo Opo Empung néra, wo ni séra é maéndo tou-Ku.

Galatia 6:10

Niitumo, im wéwéhampé' un oras wia ni kita, méyémo kita mangun a lé'os wia péléng sé tou, sé ipahpuu-puuna é sé katuarita esa pa'émanen.

Filipi 1:11

Ni aku kasii é mengaléi wo kamu toro memangu-mangun an ulit. Si Yesus Kristus uman si toro mangun ni kamu mangun niitu i mahsigi' wo mahlooz si Opo Empung.

Filipi 2:17

Zozo' ni aku ém woo ukumen i maté wo un zaha'ku én isaroi witu um wawo né tatamun kineriz niou in iragés wia si Opo Empung, taan ni aku én zéi'kan mazéi' i mahpaa-paaz tumoro niitu wo ni aku kasii é mahpaa-paaz karia niou péléng.

Filipi 4:18

In tarékan si Epafroditus é nimahalimomé a raragés méiwéhé nioué wia ni aku, niitumo ni aku nimakailekomé péléng am pemandungengku um wia ni kamu a méyé. Lumouspé'tarémé niitu é malake-lakezo a méiwéhé nioué. A méiwéhé nioué én totoz wangun wo niitu én tanu u raragés mahwou tariis ung kapaaz ni Opo Empung.

Kolose 3:17

Péléng am pahnuwu'en niou kaapa péléng am pahwangunen niou, péléng niitu ém wangunela mengiit u ngaran ni Yesus Mahpiara, karia i mahkua u makasé wia si Opo Empung, si Ama'ta mengiité si Yesus.

1 Timutius 3:15

wo zozo' ni aku ikauréma, kata'uannumo kura sé tou léwo'zéi' menou-nou i sana awu ni Opo Empung. Sé sana awu ni Opo Empung ém péléng sé jamaat sé anu ni Opo Empung si menou-nou. Sé jamaat kenumo sé nimaéndo to'tolan an tutuzu' ulit ni Opo Empung tanu an tombol wo an to'tolan u nimenté' um walé.

Ibrani 3:6

Taan si Kristus in Oki' ni Opo Empung é si mahwangun a méiatu ni Opo Empung im witu um walé-Na wo ni kitamo um walé-Na itii, sa kita zéi'kan mazéi' in totoz ma'éman wo niméré' uman un iwéhémé ni Opo Empung u mangun ni kita i mahpaa-paaz.

1 Petrus 2:9

Taan ni kamumo sé pinéléng ni Opo Empung, walian i mahpaayang wia si Opo Empung si Kolano, tahsasana wanua linenas, nimaéndo tou méisanapa' wia ni Sia, wo ni kamu mahwoka' am pahwangunen ni Opo Empung an totoz wangko'. Si Opo Empung si timawahmomé ni kamu mondolé im witu ung karimbengbengan a muntep witu un ayah-Na un totoz makakompo'en.

1 Petrus 4:11

Sa wéwéhan tou tinambéran i mahkua u Nuwu' ni Opo Empung wia sé tou, ni sia é léwo'zéi' mahnuwu' mahkiit u Nuwu'-Na. Wo sa wéwéhan si tinambéran i sumawang sé kasuat tou, pahwangunennala niitu karia ung ketez méiwéhémé ni Opo Empung wia ni sia. Niitumo, wangunen nioula lumé'o-lé'os an tatambér itii wo sé tou lumooz wo sumigi' si Opo Empung. Karia in téntu si Opo Empung é loozen wo sigi'en wana péléng am péléng mengiité si Yesus Kristus. Ni Siamo si mahkawasa wo wangun i sigi'en wo loozen makaz ing kauré-uré. Amin.

1 Petrus 4:17

Pahpaan in tarékan én orasnamo si Opo Empung in tumotoz ulit kaapa zéi'kan am pahwangunen né tou, wo sé kataré-taré totozen-Na é sé tou-Na in esa. Sa Sia in tumotoz éng kumataréma wia ni kita in tou-Na, kura rékén u mamuali wia sé tou soo ma'éman u Nuwu' Lé'os ni Opo Empung?

Wahyu 1:6

wo nimangun ni kita i maéndo tou-Na witi Kakolanoan-Na, wo kasii maéndo walian mahpaayang wia si Opo Empung, si Ama'-Na. Wia ni Sia u lolooz wo u sisigi'an wo ung kawasa makaz ing kauré-uré. Amin.

Wahyu 20:6

Mahpaa-paazola sé kataré-taré méitoumé sumaup ni Opo Empung. Ni séramo sé linenas-Na. Ni séra én zéi'mo mendan um patéan kazua taan ni séra é maéndo walian ni Opo Empung wo ni Kristus, wo ni séra é merénta ing kolano karia-Na witu u sana riwu ta'un.

Wahyu 3:12

Séi si nimuntung, ni sia én éndong-Ku tombol witi Walé ni Opo Empung-Ku wo ni sia é mento'mo witu makaz ing kauré-uré. Wia si tou itii kasii ém pantikang-Ku u ngaran ni Opo Empung-Ku, u ngaran um wanua tua'na ni Opo Empung-Ku, u Yerusalem weru. Um wanua tua'na itii ém witi kasendukan, wia si Opo Empung-Ku an itumpamé. U ngaran-Ku weru kasii én ipantik-Ku wia si tou itii.

Wahyu 5:10

Ni Ko nimanguno ni séra nimaéndo esa kakolanoan, wo kasii nimaéndo walian wia si Opo Empungta, wo ni séra sé mamerénta ing kolano wia ung kaayahan.”