1 Petrus 2:12 - Taaz Weru Witu u Nunuwu'en Tombulu

¹² Wangu-wangunen ung katou-touan niou im witu u saru-sarun né tou zéi'kan mata'u si Opo Empung, wo zozo' ni kamu ém pahkuan né tou itii in tou léwo', taan witu un endo si Opo Empung i méyé, ni séra é malumooz wo sumigi' ni Sia, pahpaan ni séra é mahilek am pahwangunen niou an totoz wangun.

1 Petrus 2:12 ပူးပေါင်းရင်းမြစ်များ

Matius 10:25

Sa si pahtuzu'en masuato wo si mésterna, niitu én toromo wo sa si ata masuato wo si tuangna, niitu én toromo. Sa si makawalé ém pahkuan im Beelzebul, apapé' kasii sé tou witu um walé itii.

Matius 5:11

Mahpaa-paazola ni kamu, sa pahpaan ni Aku, ni kamu pahséro'an karia a nunuwu'en merara un até wo ni kamu ém pahzézéhan, wo kasii pahtawuruken péléng a léwo'an.

Matius 5:16

Téntumo kangkasii ni kamu, un ayah wia ni kamu é léwo'zéi' i mahsena'ma wia sé tou, wo u lé'os pahwangunen niou toro ka- ilekan néra wo séra mahsigi' wo mahlooz si Ama' niou si witi kasendukan.”

Matius 9:8

I nimilekla niitu, sé tou lakez itii maindé', a mahlooz si Opo Empung si niméhémomé ung kawasa tanu niitu wia sé tou.

Lukas 1:68

“Loozenola si Mahpiara, si Opo Empung né tou Israel! Pahpaan ni Sia niméyémo i métumulung sé tou-Na wo milot ni séra.

Lukas 19:44

Ni séra éng kumemu ni ko karia péléng sé toumu. Zéi'kan iwaya néra im wéwéhampé' am watu nimauusunan pahpaan zéi'mo kata'uannu un orasna si Opo Empung i mémilot ni ko.”

Lukas 6:22

Mahpaa-paazola kamu sa pahpaan ma'éman si Oki' ni Tou ni kamu ikazi'zis né tou, kasoo né tou, pahséro'an né tou wo pahtawuruken né tou a léwo'an.

Yohanes 13:31

I si Yudas nimangémo a si Yesus kumua, “In tarékan si Oki' ni Tou ém pahloozen wo pahsigi'en, wo si Opo Empung ém pahloozen wo pahsigi'en mengiité ni Sia.

Kisah Rasul-rasul 15:14

Si Simon é simiritamoma i si Opo Empung rengan ing kataré-taré é nimapailekoma u raraatéan-Na wia sé tou zéi'kan Yahudi. Ni Sia niméléng sé tou im wia ni séra i maéndo tou-Na.

Kisah Rasul-rasul 24:13

Ni séra én zéi'kan makawawa i mapailek wia si tuang sa an ipahtoké néra wia ni aku én uli-ulit winangunku.

Kisah Rasul-rasul 25:7

I si Paulus méikaayomola witu, péléng sé tou Yahudi sé witi Yerusalem a méyé é rimendai limiklik ni sia. Lakez an ipahtoké néra wia si Paulus i mahwuwutez ni sia, taan ni séra én zéi'kan makawawa i mapailek sa an ipahtoké néra itii én ulit.

Kisah Rasul-rasul 28:22

Taan ni kai ém paaz in tumalinga kura ung ginenangmu tumoro um pa'émanen um pahkiitennu. Pahpaan ni kai én timalingamola i sé tou wisa uman ni séra é mahsaru um pa'émanen um pahkiitennu itii.”

Roma 12:17

Tia' mahwaér a léwo'an wia sé tou mahwangun a léwo'an wia ni kamu, taan wangunela am pahgenangen i lé'os wia péléng sé tou.

Roma 13:13

Méyémo kita menou-nou karia im wangun tanu am pahwangunen né tou in endo. Tia' memésta-mésta uman wo mapahtetewelen, tia' mahsamek wo mahkiit uman a lelo léwo' un awak. Tia' mahéndo-éndoan wo mahtétéutéuan si esa wo si esa.

Roma 14:18

Pahpaan séi uman si pakahpaayangna wia si Kristus én tanu niitu, ni sia é nimangun si Opo Empung mahpaa-paaz wo ni sia é sigi'en né kasuat tou.

Roma 15:9

Si Kristus kangkasii nimangun sé tahsasana wanua walina i lumooz wo sumigi' si Opo Empung pahpaan u raraatéan-Na wia ni séra. Méipantik witu um Pinantik Lenas in téntii: “Pahpaano niitu ni aku é malumooz si Opo Empung witu un unez né tahsasana wanua wo kumantar ang kakantaren i lumooz u ngaran-Mu.”

1 Korintus 14:25

Wo péléng a méikawuni witu un aténa é makata'uanna. Niitumo sia kumuruzla a mongkot wo mahsigi' si Opo Empung ang kumua, “Totoz ulit, si Opo Empung ém witu un unez niou.”

2 Korintus 1:12

Ni kai én totoz mahlooz ung katou-touan nai pahpaan um pahwangunen nai wia sé tou wia ung kaayahan é lé'os wo ulit. Niitu un totoz méisanapa' witu um pahile-ilekan nai karia niou. Witu ung genang lé'os nai, ni kai én totoz mata'u sa niitu é lé'os wo ulit wia si Opo Empung a méyé, niitu kangkasii én tumuzu'ma wia sé tou sa am pahwangunen nai én ulit. Wo péléng am pahwangunen nai itii én zéi'kan karia ung katulapan nai in tou, taan karia ung kamang tatambér ni Opo Empung.

2 Korintus 13:7

Ni kai mengaléi wia si Opo Empung, wo ni kamu tia' mahwangun a léwo'an. Zéi'kan mapailek i ni kai én uli-ulit aatu ni Kristus, taan wo ni kamu mahwangun ang kapaaz ni Opo Empung, zozo' ni kai ém pahkuan né tou in zéi'kan uli-ulit aatu ni Kristus.

2 Korintus 8:21

Niitumo kapaaz nai mahwangun a lé'os én zéi'kan uman witu u sinaru ni Mahpiara taan maan im witu u sinaru né tou.

Efesus 2:3

Im puuna ni kita péléng é masuat karia néra, ni kita menou-nou mahkiit u lelo léwo' un awakta, mahwangun um paaz un awakta wo ang genang léwo'ta. In toro niitu, ni kita kangkasii én tou sé léwo'zéi' i makailek un upi' makaindé'en ni Opo Empung tanu sé tou walina.

Efesus 4:22

Niitumo, tumoro ung katou-touan niou im puuna, ni kamu é léwo'zéi' in tumula'u ung katou-touan im puuna itii. Ung katou-touan itii é nimangun uman ni kamu méikaléwo' pahpaan méilulu u lelo léwo' un awak,

Filipi 1:27

Un totoz ipahpuu-puuna in tarékan, pahpaan ni kamu é ma'émano wia si Kristus, ung katou-touan niou é léwo'zéi' i masuat karia an tutuzu' ni Kristus mengiit u Nuwu' Lé'os tumoro ni Sia. Karia in téntu sa aku mangémé, ni aku én toro mileké, kaapa sa aku zéi'kan mangémé wia ni kamu, ni aku én tumalinga i ni kamu én esa genang, nimaesaan i mahtututu' mahwoka' u Nuwu' Lé'os tumoro si Kristus, enté' um pa'émanen, wo ni kamu mahwali-wali i mahtututu' mahwoka' u Nuwu' Lé'os tumoro si Yesus Kristus wia sé tou wo séra toro ma'éman.

Filipi 4:8

Ung kamurian katuari-katuari, péléng an ulit, péléng am wangun im pahloozen, péléng an zéi'kan mahsanaweka, péléng am weresi, péléng an tombal, péléng an tariis im pahtalingan, péléng am wéwéhan torona wo an toro pahloozen, niana péléng é léwo'zéi' ing genangen nioula.

1 Tesalonika 4:12

Karia in téntu, sé tou walina sé zéi'kan ma'éman si Yesus é mahsigi' ni kamu wo ni kamu kangkasii én zéi'kan niméré' wia ni séra.

1 Timutius 2:2

Ipengaléi kasiila sé kolano wo péléng sé mahkawasa wana am wanua, wo kita toro menou-nou karia in ena' wo zéi'kan siapa u mahraung i mahtali-talinga wo mahsigi' si Opo Empung.

1 Timutius 4:12

Tia' wo wéwéhan sé tou mahgenangla i ni ko én tou roros pahpaan ni ko ém weru tou. Mahtututu'la i maéndo kékéréan wangun né tou ma'éman wia si Opo Empung, wana an ipahkuamu, wana am pemangu-mangunennu, wana a raraatéannu, witu um pa'émanennu wo witu ung katou-touannu un zéi'kan penéro-néro'an né tou.

1 Timutius 5:10

Wo kasii kata'uan né tou i ni sia é mahwangun a lé'os wia sé tou tanu ang kenu: sé oki'na ém piniaranamé lé'os, paaz mahsungkul si tou mento' witi waléna, mahwo'as un a'é né katuari esa pa'émanen, mahsawang sé tou witu ung kasusaan wo uli-ulit zéi'kan mazéi' i mahwangun péléng am wangun.

Ibrani 13:18

Tia' mazéi' i mahpengaléi tumoro ni kai pahpaan totoz kata'uan nai ung genang lé'os nai ém weresi. Pahpaan im wana am péléng ni kai é mahtututu' i menou-nou mahwangun a lé'os.

Ibrani 13:5

Tia' megena-genang uman an zoit wo mahpaa-paazola karia un apa uman um wiamo ni kamu. Pahpaan si Opo Empung éng kimua téntii, “Ni ko én zéi'kan iwaya-Ku wo ni ko én zéi'kan kawisa itula'u-Ku.”

Yakobus 3:13

Sa wéwéhan si tou tulap wo lakez ang kata'uan im wia ni kamu, ni sia é léwo'zéi' i mapailekla ang katou-touan wangun wo am pahlé'osen wangun karia i roros até wo ung katulapan.

1 Petrus 2:15

Un totoz kapaaz ni Opo Empung ni kamu é mahwangun a lé'os. Pahpaan karia in téntu ni kamu é nimangun a sumah né tou lemou ing kumana'la im wayaan uman ang kanuwu'an tumoro ni kamu.

1 Petrus 3:16

wo karia ung genang lé'os. Sa um pakahwingkot niou én téntu, niitu é mangun sé tou menuwu-nuwu' a léwo'an tumoro ni kamu sé mahwangun a lé'os pahpaan i mahkiit si Kristus é maizang, pahpaan a léwo'an penuwu-nuwu'en néra itii.

1 Petrus 4:11

Sa wéwéhan tou tinambéran i mahkua u Nuwu' ni Opo Empung wia sé tou, ni sia é léwo'zéi' mahnuwu' mahkiit u Nuwu'-Na. Wo sa wéwéhan si tinambéran i sumawang sé kasuat tou, pahwangunennala niitu karia ung ketez méiwéhémé ni Opo Empung wia ni sia. Niitumo, wangunen nioula lumé'o-lé'os an tatambér itii wo sé tou lumooz wo sumigi' si Opo Empung. Karia in téntu si Opo Empung é loozen wo sigi'en wana péléng am péléng mengiité si Yesus Kristus. Ni Siamo si mahkawasa wo wangun i sigi'en wo loozen makaz ing kauré-uré. Amin.

2 Petrus 3:11

Sa péléng niana é maapu tanu niitu, kura ung katou-touan niou? Tantumo, ni kamu i menou-nou é léwo'zéi' i lenas wo mahkiit uman ung kapaaz ni Opo Empung.