1 Korintus 6:3 - Taaz Weru Witu u Nunuwu'en Tombulu

³ Zéi'kan kata'uan niou wé, i ni kita én tumotoz am pahwangunen né malaekat? Sa kita toro tumotoz am pahwangunen né malaekat, kaa kita zéi'kan toro in tumotoz a mahmuali i mendo-endo?

1 Korintus 6:3 ပူးပေါင်းရင်းမြစ်များ

Matius 25:41

Ang kuan-Na wia sé tou witu ung kawihi-Na, ‘Tumingkasa im witu u sinaru-Ku, é kamu sé tou tinoro un epa'! Muntepoma witu un api zéi'kan mahpaté u niimek in iwéhé wia si tonaas né sétang wo sé malaekatna.

Lukas 21:34

“Tuméga-tégam un toumu wo tia' megena-genang uman u mahpaa-paaz im wana am pésta, wo u mahelep makaz i matewelen karia in tahlous mahgenang am pemandungennu i mendo-endo, wo i si Oki' ni Tou méyé sumaup ni kamu én zéi'kan mengompo'.

Lukas 8:14

A méikagogo witu un tana' tinouan an zukut menulah, ung kalakoana é sé tou timalingama u Nuwu' ni Opo Empung, taan ni séra é maarét tumoro ung katou-touan néra, paaz mawa'ilan wo mahkiit uman a lelo wia ung kaayahan, taka-takazan zéi'kan nimaririhan.

Roma 6:16

Zéi'kan kata'uan niou wé, sa kamu méhéla un tou niou wia si tou i mahtali-talinga ni sia, ni kamu é nimaéndomola ata ni tou itii? Téntu kangkasii, zéi'kan kata'uan niou wé, sa kamu simingkéla', ni kamu é nimaéndo ata a singkéla' itii? Niitu u mangun ni kamu makailek um patéan. Sa kamu méhé un tou niou i mahtali-talinga si Opo Empung, ni kamu é niéndo-Na ulit.

1 Korintus 6:15

Kata'uan niouo sa un awak niou é mémoikauntep witu un awak ni Kristus. Niitumo, toro wé um witu un awak ni Kristus in éndon wo maéndo esaané witu un awak ni wéwéné samek? Zéi'kan mamuali!

1 Korintus 6:16

Kaapa zéi'kan kata'uan niou wé, sa si tuama simameko, un awakna é nimaesamo karia un awak ni wéwéné samek itii? Pahpaan méipantik witu um Pinantik Lenas, én téntii, “Un awak néra zua é maesa.”

1 Korintus 6:19

Totoz kata'uan niou sa un awak niou ém walé ni Roh Lenas, si mahento' wia ni kamu. Si Roh Lenas itii é méiwéhé ni Opo Empung wia ni kamu. Niitumo, un tou niou én zéi'mo anu niou, anumo ni Opo Empung.

1 Korintus 6:4

Niitumo, sa kamu toro tumotoz am pahéndo-éndoan tanu niana, ni kamu én tia'mo menéro tou sé zéi'kan méikarékén jamaat in tumotoz am pahéndo-éndoan niou.

2 Timutius 2:4

Si suraro karegas i mahpaayang én zéi'kan megena-genang am pemandungenna walina. Karia in téntu ni sia éng kapaaz ni tonaasna.

2 Timutius 4:10

pahpaan si Demas ém paaz uman am wia ung kaayahan kenu wo timula'umoma ni aku. Ni sia é nimangémo witi Tesalonika. Si Kreskes é nimangémo witi Galatia wo si Titus é nimangémo witi Dalmatia.

2 Petrus 2:4

Pahpaan sé malaekat mahsingkéla' én zéi'kan niampungan ni Opo Empung. Ni séra é méilombo'-Nama witi naraka am buin witu un tuleng makaz witu un endo ni séra in totozen im wana am pahwangunen néra.

Yudas 1:6

Sé malaekat kangkasii sé simala' i nimaké ung kawasa méiwéhé wia ni séra an tumula'umé um pahwéha-wéhan néra é niapus-Na karia un aapus un zéi'kan mahwuka-wukala makaz ing kauré-uré, witu ung karimbengbengan witi lalem ung kaayahan makaz witu un endo wangko', in totozen ulit kaapa zéi'kan am pinahwangun néramé.