1 Korintus 4:4 - Taaz Weru Witu u Nunuwu'en Tombulu

⁴ Pahpaan ung kata'uangku, ni aku én zéi'kan siapa a sinala'. Taan zozo' in téntu, ni aku én zéi'kan kumuama i ni aku én zéi'kan siapa a sinala'. Si toro tumotoz ni aku im wéwéhan a sinala' kaapa zéi'kan é si Yesus Mahpiara uman.

1 Korintus 4:4 ပူးပေါင်းရင်းမြစ်များ

Yohanes 21:17

Kuan ni Yesus wia ni sia ing katelu, “Simon oki' ni Yohanes, apa ni ko rumaraaté ni Aku?” Pahpaan si Yesus kimua, “Apa ni ko rumaraaté ni Aku?” ing katelumo, niitumo un até ni Petrus é rumara. A sia kumuala wia si Yesus, “Tuang, ni Ko é mata'u péléng am péléng, kata'uan-Nu i ni aku é rumaraaté ni Ko.” A si Yesus kumuala wia ni sia, “Piarala sé domba-Ku.

Kisah Rasul-rasul 23:1

Karia i mahwerenna wia sé tou sé méikauntep witu u Mahkamah Agama si Paulus mahkua, “Katuari-katuari, makaz in endo kenu ni aku é menou-nou karia un até weresi witu u sinaru ni Opo Empung.”

Roma 2:13

Pahpaan sé niéndo ulit im witu u sinaru ni Opo Empung én zéi'kan sé timalinga un ukum Torat, taan sé niéndo ulit é sé tou mahwangun un ukum itii.

Roma 4:2

Pahpaan sa si Abraham é niéndo ulit pahpaan am pahwangunenna, ni sia ém wéwéhan un toro ipahloo-loozna taan zéi'kan mahloo-looz witu u sinaru ni Opo Empung.

1 Korintus 4:3

Taan sa ni aku pahtotozen niou ulit kaapa zéi'kan, kaapa ipahwali witi pahtotozan ulit kaapa zéi'kan am pahwangunen né tou, niana én zéi'kan pahwéhangku genang. Lumouspé'tarémé niitu, ni aku én zéi'kan tumotoz ulit kaapa zéi'kan un touku in esa.

1 Korintus 4:5

Niitumo, ni kamu én tia'mo mahtotoz si tou simala' kaapa zéi'kan, niitu én zéi'kampé' orasna. Un orasna é si Mahpiara i mawurimé sumaup. In toro niitu, péléng an ipahwuni-wuni wana ang karimbengbengan én ipapailek-Na. Ituzu'-Na péléng ang ginenang ni tou. Tumondong niitu si esa wo si esa é loozen ni Opo Empung mengiité am pinahwanguna.

2 Korintus 1:12

Ni kai én totoz mahlooz ung katou-touan nai pahpaan um pahwangunen nai wia sé tou wia ung kaayahan é lé'os wo ulit. Niitu un totoz méisanapa' witu um pahile-ilekan nai karia niou. Witu ung genang lé'os nai, ni kai én totoz mata'u sa niitu é lé'os wo ulit wia si Opo Empung a méyé, niitu kangkasii én tumuzu'ma wia sé tou sa am pahwangunen nai én ulit. Wo péléng am pahwangunen nai itii én zéi'kan karia ung katulapan nai in tou, taan karia ung kamang tatambér ni Opo Empung.

2 Korintus 5:10

Pahpaan ni kita péléng é léwo'zéi' i maisaru witu u rurumezan ni Kristus ing Kolano i matotozen ulit kaapa zéi'kan, wo sé tou si esa wo si esa é makailek um wawaér mengiit am winangunna, niitu im wangun kaapa léwo'.