1 Korintus 2:8 - Taaz Weru Witu u Nunuwu'en Tombulu

⁸ Zéi'kan siapa im wia sé mahkawasa wia ung kaayahan kenu sé mata'u ung katulapan ni Opo Empung itii. Pahpaan sa kata'uan néramo ung katulapan itii, si Yesus Mahpiara si pahloozen wo pahsigi'en én zéi'kan sinalip néra.

1 Korintus 2:8 ပူးပေါင်းရင်းမြစ်များ

Matius 11:25

In toro niitu si Yesus mengaléi, “Ni Aku kumuama u makasé wia ni Ko, Ama', Opo Empung u langit wo ung kaayahan, pahpaan niana é méiwuni ni Ama' im wia sé tou tulap wo lakez ang kata'uan. Taan niana é méipapailek ni Ama' wia sé tou kanaramen sé mahkii-kiit uman tanu sé koki'.

Matius 13:22

Am watuna tatanemen méikagogo wana an zukut menulah é sé tou sé timalinga u Nuwu' itii, taan tahlous maarét ung katou-touan néra wo tawi mapahléla'en im wana a sangkum. Niitumo u Nuwu' ni Opo Empung é méisé'sé' umanla a lelo wo ang genang wana ang kawa'ilanan wia ung kaayahan taka-takazan zéi'kan nimua'mé.

Lukas 23:34

[A si Yesus kumua, “Ama', ampungan ndootuumé séra pahpaan zéi'kan kata'uan néra am pahmualin néra.”] A séra sumawut u lot i mahwéwéténg ung karai-Na.

Yohanes 16:3

Ni séra mahwangun an téntu wia ni kamu pahpaan ni séra én zéi'kampé' mata'u si Ama' wo ni Aku.

Yohanes 7:48

Wéwéhan wé si esaané im wia sé tonaas kaapa si esaané im wia sé sana réwok tou Farisi ma'éman ni Sia?

Yohanes 8:19

Ang kuan néra wia ni Sia, “Wisa wé si Ama'-Mu?” Si Yesus mingkotla, “Ni kamu én zéi'kan mata'u ni Aku wo si Ama'-Ku. Sa kamu mata'u ni Aku, ni kamu kangkasii é mata'u si Ama'-Ku.”

Kisah Rasul-rasul 13:27

Taan sé tou witi Yerusalem wo sé tonaas néra én zéi'kan mata'u si Yesus. Ni Sia én tinotoz nérala im wunu'en, karia in téntu a méikua né nabi am pahbacan sekez in endo Sabat é linekep néramola.

Kisah Rasul-rasul 7:2

A si Stefanus mingkotla, “Katuari-katuari wo sé ama', talingana! Im puuna, i si nimaopota Abraham mahento' witi tana' Mesopotamia, puunala sia i mahento' witi Haran, si Opo Empung si totoz im pahsigi'en wo pahloozen é nimapailekola un tou-Na wia ni sia,

1 Korintus 1:20

In tarékan, kuramotuu sé tou tulap? Kuramo sé tou tulap un Torat? Kuramo sé tou wia ung kaayahan kenu sé paaz uman mahzéi' an ipahkua né tou wia ni sia? Péléng ang katulapan néra ém winangunola ni Opo Empung nimaéndo kalemouan néra.

1 Korintus 2:6

Zozo' in téntu, im wia sé tou totozo lutu' i ma'éman, ni aku éng kimuamoma ung katulapan. Ung katulapan itii é méyé zéi'kan wia ung kaayahan kaapa wia sé mahkawasa wia ung kaayahan kenu sé mazéi'en.

2 Korintus 3:14

Taan sé tou Israel im puuna, um pakahgena-genang néra éng kinaapé'ampé', niitu é masuat wo un ulu néra én tanu niapé'ampé' karia u roko'. Makaz in tarékan sa séra maca am witu ung kitap Torat, niitu én zéi'kan katulapan néra, un téntu masuat wo ung genang néra éng kinaapé'ampé'. Wo sa séra ma'émano wia si Kristus, niitu taré uli-ulit katulapan néra.

Efesus 1:17

Ni aku mahaléi wia si Opo Empung si Ama' ni Yesus Kristus Mahpiarata, si pahloozen wo pahsigi'en itii i méhémé wia ni kamu si Roh-Na, si nimangun ni kamu matulap wo si Roh si matumuzu' tumoro si Opo Empung, wo ni kamu karia in ulit mata'u tumoro ni Sia.

Efesus 4:18

Ung genang néra é nimarimbengbengo, zéi'kan kata'uan néra kura menou-nou mengiit um paaz ni Opo Empung pahpaan ni séra én zéi'kan mata'u si Opo Empung wo pahpaan ung kaketéhan un até néra.

1 Timutius 1:13

Im puuna ni aku é mahséro' u ngaran ni Kristus Yesus wo mahzézéha wo totoz loozan i mahsalou sé tou ma'éman wia ni Sia. Taan ni aku é méiraraatémé ni Yesus, pahpaan in toro niitu ni aku én zéi'kampé' ma'éman wia ni Sia, niitumo péléng am pahwangunengku itii én zéi'kan kata'uangku.

Yakobus 2:1

Katuari-katuariku, ni kita in tou ma'éman wia si Yesus Kristus Mahpiarata si pahsigi'en wo pahloozen én tia' meméléng tou.