1 Korintus 14:2 - Taaz Weru Witu u Nunuwu'en Tombulu

² Wo si tou tinambéran u makawawa i mahnuwu' a nunuwu'en un akaz uman si Roh Lenas si mata'u, ni sia én zéi'kan mahnuwu' wia sé tou taan mahnuwu' wia si Opo Empung. Zéi'kan siapa tou si mata'u u nunuwu'en itii, pahpaan ni sia éng kinawasa ni Roh Lenas akaz ni sia mahnuwu' an zéi'kampé' kata'uan né tou.

1 Korintus 14:2 ပူးပေါင်းရင်းမြစ်များ

Matius 13:11

A si Yesus mingkotla, “Im wia ni kamu én tinambéran ung kamang in toro makatulap u méikawunipé' tumoro ung Kakolanoan ni Opo Empung, taan im wia ni séra én zéi'kan.

Markus 16:17

Sé tou ma'éman é mangun a makakompo'en kenu: Moho sé sétang karia u ngaran-Ku, mahnuwu' a nunuwu'en walina an zéi'kampé' pinahnuwu-nuwu' nérala,

Markus 4:11

A mingkotla si Yesus, “Ni kamu éng kinuaanoma u méikawunipé' tumoro ung kakolanoan ni Opo Empung. Taan im wia sé tou walina, ém pahtuzu'an karia un aandéan,

Kisah Rasul-rasul 10:46

Pahpaan ni séra é mahtalingamé sé tou itii i mahnuwu' karia a nunuwu'en méiwéhé ni Roh Lenas wia ni séra wo mahlooz si Opo Empung. Ang kuan ni Petrus,

Kisah Rasul-rasul 19:6

I si Paulus zimeta'la u lengenna witu un atas néra, an tumumpamé si Roh Lenas wia ni séra. A séra rengan i mahnuwu' karia a nunuwu'en a méiwéhémé ni Roh Lenas wo kasii mahkua a méikuamé ni Opo Empung.

Kisah Rasul-rasul 22:9

In toro niitu, sé tou memali-mali kariaku é nimilek kangkasii u sena' itii. Taan u nuwu'-Na u nimuwu'mé wia ni aku én zéi'kan tinalinga néra.

Roma 16:25

U sigi' wo looz wia si Opo Empung! Ni Sia ém wéwéhan kawasa i menté' um pa'émanen niou mengiit u Nuwu' Lé'os tumoro si Yesus Kristus u méipahwoka'ku mengiit u méipapailek ni Opo Empung, u rengan ing kataré-taré méikawuni im wia sé tou.

1 Korintus 12:10

Wo wia si tou, si Roh Lenas timambér i makawawa mangun a makakompo'en. Wo wia si tou walina, si Roh Lenas én timambér u makawawa i mahkua wia sé tou a méikuamé ni Opo Empung wia ni sia. Wia si tou walina, si Roh Lenas itii kangkasii én timambér u makawawa i mata'u un tatambér ém wia si Roh Lenas a méyé kaapa zéi'kan. Wo wia si tou, si Roh Lenas én timambér i makawawa mahnuwu' karia u nunuwu'en un akaz uman si Roh Lenas si mata'u, wo wia si tou walina én tinambéran u makawawa ing kumua ung kalakoan u nunuwu'en itii.

1 Korintus 12:28

Wo wia ni kamu sé jamaat, sé woopira im wia ni kamu ém pinéléng ni Opo Empung i maéndo: kataré, sé tou niéndo aatu ni Yesus, kazua, sé tou niéndo nabi, katelu, sé tou niéndo méster mahtuzu' an tutuzu' ni Mahpiara, wéwéhan sé tou tinambéran u makawawa i mangun u makakompo'en, wéwéhan sé tou tinambéran u makawawa i lumé'os sé tou saki, wéwéhan sé tou tinambéran u makawawa i mahsawang sé tou walina, wéwéhan sé tou tinambéran u makawawa i maéndo tonaas, wo kasii wéwéhan sé tou tinambéran u makawawa i mahnuwu' karia a nunuwu'en walina un akaz uman si Roh Lenas si mata'u.

1 Korintus 13:1

Zozo' ni aku toro mahnuwu' karia a nunuwu'en né tou wo a nunuwu'en né malaekat, taan sa ni aku zéi'kan rumaraaté sé tou walina, ni aku én tanu uman an zanina an tambor wo an téténgkoren um wayaan uman téngkoren, zéi'kan siapa torona.

1 Korintus 13:2

Wo kasii zozo' ni aku tinambéran u makawawa i mahkua wia sé tou a méikuamé ni Opo Empung wia ni aku, wo zozo' ni aku makawawa i makatulap péléng ang ginenang-Na un zéi'kampé' kata'uan né tou walina. Zozo' ni aku i mata'u péléng am péléng wo zozo' um pa'émanengku én enté' makaz ung kentur én toro iatuku mérama im witu, taan sa ni aku zéi'kan rumaraaté sé tou walina, ni aku én zéi'kan siapa torona.

1 Korintus 14:16

Pahpaan, sa si rohmu kumua u makasé wia si Opo Empung karia u nunuwu'en un akaz uman si Roh Lenas si mata'u, un zéi'kan kata'uan ni tou mahtalinga niitu, kura si tou itii toro kumua ‘amin’?

1 Korintus 14:26

Katuari-katuari, kura in tarékan? Sa kamu nimaréwok i mahragés, um wangun si esa wo si esa é méndola katoroan tanu ang kenu: wéwéhan sé mahkantar ang kakantaren mahlooz si Opo Empung, wéwéhan sé mahtuzu', wéwéhan sé mahkua ung kalakoan tumoro u méiwunipé' ni Opo Empung, wéwéhan sé mahnuwu' karia u nunuwu'en un akaz uman si Roh Lenas si mata'u wo sé walina é mahkua ung kalakoan u nunuwu'en itii. Taan péléng niana é léwo'zéi' mahenté' um pa'émanen né tou.

1 Korintus 15:51

Totoz wéhan nioula genang! Ikuakuma wia ni kamu u méiwunipé' in téntii: zéi'kan péléng sé tou é maté, taan péléng sé tou é mawalinan.

1 Korintus 2:10

Niitumo, si Roh ni Opo Empung mémapata'u wia ni kita, péléng ang ginenang-Na itii. Si Roh ni Opo Empung, si mahtata'u péléng am péléng, makaz a méikawunipé' um wia si Opo Empung.

1 Korintus 2:7

Taan an ipahwoka' nai itii éng katulapan ni Opo Empung a méikawunipé' wo zéi'kampé' kata'uan. Ang katulapan ni Opo Empung itii é niimek-Namo puunala ung kaayahan kenu im winangun. Niitu ém winangun ni Opo Empung wo kita sigi'en wo loozen.

Efesus 6:19

Ipengaléipé' kasiimé ni aku wo ni aku i mahnuwu' wia sé tou, si Opo Empung é mahwéhémé u nunuwu'en ulit wia ni aku, wo zéi'kan maindé' i mahwoka' u Nuwu' Lé'os tumoro si Yesus a méikawunipé' im wia ni séra.

Kolose 2:2

Ni aku nimangun un téntu wo un até néra én toro maenté' wo mahesa-esaan pahpaan i mahraa-raatéan. Karia in téntu, ni séra péléng én uli-ulit makatulap wo totoz mata'ula un im puuna zéi'kampé' méipapata'u ni Opo Empung. Un zéi'kampé' méipapata'u itii é si Kristus in esa.

1 Timutius 3:16

Totoz ulit an tutuzu' ulit ni Opo Empung é mémoipapailek-Na witu um pa'émanenta karia ung kawangko'an-Na: “Ni Sia é nimapailek un tou-Na tanu in tou uman, kinua in ulit ni Roh ni Opo Empung wo nimapailek un tou-Na wia sé malaekat. Tumoro ni Sia é méiwoka' wia péléng sé tahsasana wanua. Ni Sia ém pa'émanen im wia ung kaayahan wo winénéta mangé witi kasendukan karia u sigi' wo looz.”

1 Timutius 3:9

uli-ulit mahkiit an tutuzu' tumoro um pa'émanen wia si Kristus u mémoipapailek ni Opo Empung wia ni kita wo mahwangun niitu karia ung genang weresi.

Wahyu 10:7

Taan si malaekat kapitu i sumengoma um pontuangna, in toro niitumokan an tinotoz tumoro an ipahwuni-wuni ni Opo Empung é malekep, tanu a méipahwoka'-Namo wia sé ata-Na, ni séramo sé nabi.”