ZEFANYA 3:10 - WUKE SUSI WATTI'U AL᷊AL᷊USASSA

¹⁰ Ewe'e lai wuassu Sudan apan marau, uma-U apan nassal᷊iawukka udde sarun dumanta wuṛṛu mangongollu sasamba si Ya'u.

ZEFANYA 3:10 ပူးပေါင်းရင်းမြစ်များ

DARALO 68:31

Limbuaṛṛete Mesir, winatangnga mal᷊aṛṛaga udde wuassu pattangngannu tiwo. Tagguete manga walahanna, ammul᷊annu bantenga udde ringannu al᷊aṛṛanangnge, apan ual᷊aṛinda tadea'u maasomba sal᷊a'a. Ruata nanal᷊iawukku manga walahanna apan apulune uapapangalo.

YESAYA 11:11

Su allo udde Mawu sarun paassa lai mappaattu taṛṛino-Ne mangapidda mapul᷊e uman-Ne lambene su Asyur wuṛṛu su Mesir, su manga wanua Patros, Sudan wuṛṛu Elam, su Babel, Hamat wuṛṛu manga taṛṛanusa apan marau.

YESAYA 11:12

Mawu sarun manduittu sambau waneṛṛa su walahanna udde. Udde tatialane i Tou nangammullu apia walahannu Israel wuṛṛu Yehuda apan nassal᷊iawukka su ahewallu runia wuṛṛu nangapiddi mangitou mapul᷊e.

YESAYA 18:1

Wuassu sambau wanua, su samba'a manga sal᷊ukku Sudan niaringikka tingikku serangga.

YESAYA 18:7

Sarun a'omanna tempone manga sasamba iapasingkatta su Mawu Apan Lembontaṛṛino wuassu wanua udde apan sasabbiannu manga sal᷊ukka, wuassu pabbawalage apan matohassa waṛṛani, wuassu manga taumatane apan mal᷊angkassa wuṛṛu pisine al᷊ussa wuṛṛu ia'ata'utta su ahewallu runia. I mangitou sarun dumanta su Wuiddu Sion, watukku tampa Mawu Apan Lembontaṛṛino sassubbanna.

MALEAKHI 1:11

I Ya'u aaddatannu manga walahanna su ahewallu runia. Suapan tampa itattambunna amania iapangaddatta arang-Ku wuṛṛu nionggolla manga sasamba apan suṛṛinone, ana waugu anambon balahanna mangngaddatta si Ya'u!

YOHANES 7:35

See manga tembonannu Yahudi uawawisarate sangkatou ringannu waine, “Taumata indi inai suapa na'oman sara i ite tawe maasomba si Tou? Apa i Tou inai ringannu manga taumatan Yahudi apan uatana'a su wanua marau su wallattu taumatan Yunani, wuṛṛu mangngaṛṛa'a taumatan Yunani?

WATTI'U MANGA RASUL 24:17

Napawe pirate tonna tawe uatana'a su Yerusalem, i ya'u nabelengke apia su Yerusalem nangapiddu sasumbala roitta su pabbawala'u wuṛṛu nangapiddu aonggolla sasamba su Ruata.

WATTI'U MANGA RASUL 8:27

Ne i Filipus inaite. Su tempo udde pia sangkatou tembonannu Etiopia apan tantal᷊anna u'amatta mappul᷊e watukku wanuane. Taumata udde sangkatou mammamanaran tembonanne apan mangngatokka wuṛṛu mallu'ada paa'alan Kandake ratu wanuan Etiopia. Taumata udde suete wuassu Yerusalem mattaṛṛamawu Ruata wuṛṛu orassa udde tantal᷊anna mabelengnga uasa'e keretane. Tantal᷊anna ua'ianna sulal᷊ummu kereta, i tou mabbasan Wuke Nabi Yesaya.

ROMA 15:16

I Tou buatte na'ola'a si ya'u mangangimben Kristus Yesus tadea'u irolokka su manga walahanna apan wal᷊ine Yahudi. Wuṛṛu i ya'u naola'a sangkatou imam, apan mammasingkattu Watti'u Al᷊al᷊uassa wuassu Ruata, tadea'u manga taumata apan wal᷊ine Yahudi maola'a sambau sasamba su Ruata apan wotongnge sengkamanni Tou. Doronganna Ghaṛṛahon Duata ma'ola'a si mangitou sambau sasamba apan apianne su Ruata sassane.

1 PETRUS 1:1

Manga tuṛṛangnga walahanna nipilen Duata, apan uasal᷊iawukka su anambon banua su leta'u Pontus, Galatia, Kapadokia, Asia wuṛṛu Bitinia! I ya'u, Petrus, rasulli Yesus Kristus, mangngantimma doronganna Ruata mangonggolu al᷊amatta wuṛṛu paddarame si yamiu ringannu manambo-nambo. I yamiu nipile maola'a al᷊aṛṛana'u Ruata uasul᷊ungngu ere pandumannu Ruata Iamangnga. Wuṛṛu Ghaṛṛahon Duata suete na'ola'a si yamiu walahanna apan na'ukkassa, tumba'u su Ruata, tadea'u i yamiu matuṛṛuta su Mawu Yesus Kristus wuṛṛu niukkassu ṛaṛṛa-Ne.