MATIUS 12:31 - WUKE SUSI WATTI'U AL᷊AL᷊USASSA

³¹ Ana waugu udde, ana see i'o masingkatta, amungkangngu taumata ma'ola'a rosa wuṛṛu mabbatti'u al᷊uandaga, i tou wotongnge aampunganna! Arawe amungkangngu i tou mangngaddio'a Ghaṛṛahon Ruata, i tou tawe aampunganna!

MATIUS 12:31 ပူးပေါင်းရင်းမြစ်များ

YESAYA 1:18

Mawu nabbisara, “Wette i ite manginsue hatto indi. Salaiwe i yamiu maṛṛamu ungu ana waugu manga rosanu, i yamiu sarun Ta'u raddasanna mabbal᷊i mawira waresi naal᷊ihidda sangarenna ara'e wungkassa. Salaiwe manga rosanu manambo wuṛṛu mawakkatta, i yamiu sarun Ta'u ampunganna atonna-tonna.

YESAYA 55:7

Ṛinone taumata lal᷊eo mangapia pabbiaṛṛanne, wuṛṛu mamal᷊u lal᷊annu ṛingidde. Wala'e i tou mabbelengnga ringannu Mawu, wuṛṛu maasomba darangngu-Ne. Ṛinone i tou mabbal᷊i'a ringannu Ruatan kite, ana waugu Mawu mangampungnga ringannu naungnga awasa.

YEHEZKIEL 33:11

Wal᷊oa'a si mangitou manungku sulal᷊ummu arang-Ku, Ruata apan biakka, Mawu Apan Atanggaṛṛanne, i Ya'u tawe mal᷊uassa amungkangngu taumata lal᷊eo mate; arawe i Ya'u mappulu manantangngu manga rosane tadea'u i tou sidutu wiakka. Ei walahannu Israel, uddita'e ma'ola'a rosa! Anio i yamiu mappulu nate?

IMAMATTA 24:16

wuṛṛu iṛṛuumanna pateanna. Isai-sai apan mammontoga Mawu jamaatta ṛinone manuntungngu watu ma'oman sara mate. Ṛuumanna udde iapa'amatta su taumatan Israel wuṛṛu taumata raho apan namanuate su Israel.

LUKAS 12:10

Amungkangngu taumata mabbisara wisara lullawangnga Ana'u Taumata, i tou wotongnge aampunganna, arawe amungkangngu i tou mangngadio'a Ghaṛṛahon Ruata, i tou tawe aampunganna.

WATTI'U MANGA RASUL 7:51

Wal᷊ine hampa aatikku puan manga tuṛṛangnga, wuṛṛu aroddi asahadde tumuṛṛutta Ruata! Tal᷊inganu wengella ipadaringikka wisaran Ruata! I yamiu naal᷊ihida ere iupungngu al᷊amonanu; sidutu lullawangnga Ghaṛṛahon Ruata!

IBRANI 10:26

Ana waugu amungkangu watti'a apan atonna wuassu Ruata suete niapassingkata si ite, arawe i ite sidutu ma'ola'a rosa ringannu apulu naungnga, ne tate lai sasamba ipamappasa rosang kite.

IBRANI 10:29

Aroddi awakkane ṛuumanna apan ionggola su taumata apan maṛṛinda Ana'u Ruata. Taumata udde mangngadio'a ṛaṛṛam pa'airen Ruata, eteudde papaten Kristus apan namaresi si tou wuassu rosa. I Tou mangngadio'a Ghaṛṛaho apan mangngonggolu al᷊amatta.

IBRANI 6:4

Ana waugu, manga taumata apan suete nassinaadu Ruata, tate wotongnge aṛṛaanna apia. I mangitou dorone sulal᷊umpen asasemakka wuassu Ruata, wuṛṛu suete naatemma aonggolu Mawu. I mangitou lai suete niintaṛṛoannu Ghaṛṛahon Ruata.

1 YOHANES 1:9

Arawe amungkangu i ite manga'u al᷊awo'u rosan kite su Ruata, i Tou sarun manipussa paaire-Ne wuṛṛu ma'ola'a atatul᷊idda. I Tou sarun mangampunga manga rosan kite wuṛṛu mangukkasa si ite wuassu al᷊awo'u al᷊al᷊eon kite.

1 YOHANES 5:16

Amungkangu i yamiu naasilo sangkatou sansul᷊ungnga taumatan Saṛṛani ma'ola'a rosa apan tawe maaola'a taumata udde awul᷊iannu wiakka tutune wuṛṛu saran mal᷊annu-l᷊annu, ṛinone i yamiu umal᷊iomanna su Ruata; ne Ruata sarun mangonggolu wiakka udde si tou. Indi matataṛṛino si mangitou apan rosane tawe maawul᷊in wiakki mangitou udde. Arawe pia lai rosa apan maawul᷊in wiakka udde su taumata. Su olangnge udde i ya'u tawe mabbisara manungku i yamiu ṛinone umal᷊iomanna su Ruata.