2 SAMUEL 14:14 - WUKE SUSI WATTI'U AL᷊AL᷊USASSA

¹⁴ I ite sarangkanambone sarun mate; i ite indi naal᷊ihidda ua'e apan nabboso su leta'a wuṛṛu tate iaammulla apia. Ruata lai tawe mapaawiakku taumata apan natete; ana waugu udde ṛinone doronganna i Tuangku maṛṛingida tadea'u taumata niwuangnga udde sarun mapul᷊e apia.

2 SAMUEL 14:14 ပူးပေါင်းရင်းမြစ်များ

2 SAMUEL 11:25

I Daud nabbisara daroloṛṛanna udde, “Tohasse naungngi Yoab wuṛṛu wal᷊oa'a si tou tadea'u naungngi tou tawe maadio'a, ana waugu tawe iasi'atta isai apan sarun mate sulal᷊ummu pangalo udde. Wal᷊oa'a si tou tadea'u pamangalote lembon masaddatta lai su soa udde ma'oman sara soa udde massuṛṛubbawa.”

2 SAMUEL 14:15

Allangngu sinumaruanna si Tuangku ana waugu allangngu iwabbansaggu taumata. Ana see allangngu naṛṛingidda mappianne allangngu maggahatton Tuangku ringannu antimma manungku darorongngu allangngu indi sarun tipusanni Tuangku.

1 MARARATU 11:39

Ana waugu i Salomo narosa, i Ya'u sarun makkuumannu papapulunni Daud, arawe tawe saran mal᷊annu-l᷊annu.’ ”

AYUB 14:14

Ana waugu, napawe taumata mate, wotongngewe i tou mabbiakka apia? Allo uahahantin allo i ya'u uaṛṛaddo maddatingngu tempo asasusa'u indi mal᷊iudda.

AYUB 30:23

I ya'u masingkatta, I'o nangapi'u su runian papate, tampan al᷊awo'u apan biakka niammulla.

AYUB 34:15

ne matete anambon riadianna sarangkanambone apan pia niawane, wuṛṛu taumata maola'a awu ere su panattaṛṛanne.

AYUB 34:19

I Tou tawe manamba'a manga ratu, ara'e malliu ṛoron taumata ala wuassu taumata asiangnga. Ana waugu i mangitou sarangkanambone udde niariaddi-Ne.

DARALO 22:14

I mangitou sinumaruanna si ya'u ringannu moṛṛongnga uanganga, naal᷊ihidda singa mammasingnga wuṛṛu tumambote.

DARALO 22:15

Ikka'u nasuete naal᷊ihidda ua'e nabboso, anambon duṛṛi'u napallossa wuassu pabbuuanne, naungku nonossa ere lilinna.

DARALO 58:7

Oh Ruata, paddite manga isin mangitou, sawutte isin manga singa saṛṛen tumuwo udde, Mawu.

DARALO 77:8

“Saran mal᷊annu-l᷊annu Mawu manol᷊a'a wuṛṛu tate mandangngu si ya'u?

DARALO 79:3

Su ahewallu soan Yerusalem daṛṛan mangitou nabboso ere ua'e; taweddu nallabingi mangitou.

DARALO 90:10

Tempo ipabbiakki yami tumba'u pitu pul᷊o su tonnane, amungkangu i yami matohassa, ual᷊u pul᷊o su tonnane. Arawe tumba'u asasusa wuṛṛu uatataṛṛangnga apan niasombanganni yami; napawe buatte nabbiakka maautta, ne i yami lai nawul᷊ite.

DARALO 90:3

I'o nandolokku taumata niapawelenga su pina'olaanne, nabbal᷊i awu ere paarorone.

SASABANGNGA 21:13

Arawe amungkangngu i tou namuulla ringannu tawe nipattatudda wuṛṛu tawe pandumma mamate, i tou wotongnge tumal᷊angngu watanganne su sambau tampa apan ta'u ita'e si'o, wuṛṛu poiaroddi i tou sarun maasomba tul᷊unganna.

MANNANASE 9:5

Suapan wotongnge, taumata wiakka masingkatta manungku papate uaṛṛaddo si tou, wuṛṛu taumata nate waggan apa-apa. Si tou tawe baweakke ara'e lal᷊antakke, wuṛṛu aranne tinimbul᷊ianante.

LAL᷊ALLU 3:31

Ana waugu, Mawu sarun tawe manol᷊a'i ite saran mal᷊annu-l᷊annu.

YEHEZKIEL 18:23

Apa i'o maṛṛingidda manungku i Ya'u Mawu Apan Atanggaṛṛanne mal᷊uassa amungkangngu taumata lal᷊eo mate? Mangke tawe! I Ya'u mappulu i tou manantangngu manga rosane tadea'u i tou sidutu wiakka.

IMAMATTA 26:40

Arawe papapulunnu sarun manga'u rosan iupungu al᷊amonan mangitou apan buatte nanal᷊are si Ya'u wuṛṛu nilumawanga si Ya'u,

REENGANNA 35:15

Annumma soa udde mabbal᷊i soa pattillindummanni yamiu, taumatan Israel, wuṛṛu su taumata raho ara'e apan uatana'a suwallati yamiu. Isai-sai apan buatte namate taumata waine ringannu tawe nipattatudda, wotongnge tumal᷊angngu watanganne suwallatu sambau soa udde.

REENGANNA 35:25

Ammul᷊annu ṛuanganna ṛinone manamba'a taumata apan buatte namate ringannu tawe nipattatudda su saruannu wawansagu manga tuṛṛangngu apan nipate. Taumata udde ṛinone iapidda apia watukku soa pattillindumanne, su tampa i tou tinumal᷊angngu watanganne. I tou ṛinone matanaa isudde ma'oman sara taumata apan su tempo udde nabbal᷊i Imam Bahewalla natete; wua'udde i tou wotongngete mapul᷊e watukku ampungnga atatanaanne. Arawe amungkangngu i tou nate su soa pattillindumanna su tampa i tou tinumal᷊angngu watanganne, ana see niasangkal᷊anna wuṛṛu nipaten tuṛṛangngu taumata apan natete, ne ola'u pabbawal᷊issa udde wal᷊inewe pamamate.

MATIUS 22:16

Ne i mangitou nandolokku mallal᷊aṛṛenggenni mangitou ringannu Mawu Yesus su sambau ringannu manga pira taumata wuassu samba'an Herodes. Manga taumata udde nabbisara Mawu Yesus, “Iamangnga Huru, i yami masingkatta Iamangnga tawe mangawusu. Iamangnga mangngaṛṛa'a masema-semakka su ola'u apulun Ruata su taumata, tawe maddaringikka adapatti sai-sai. Ana waugu Iamangnga tawe mamile taumata.

WATTI'U MANGA RASUL 10:34

See i Petrus nabbisara, “Orassa indi ya'u atonna-tonna naapendampe manungku inolaannu Ruata su anambon taumata udde nassul᷊ungnga.

ROMA 2:11

Ana waugu Ruata ma'ellega anambon taumata udde nassul᷊ungnga.

TAHIUL᷊E 10:17

Mawu Ruatanu roso su wowon al᷊awo'u Mawu wuṛṛu nilumebbe wuassu al᷊awo'u taṛṛino. I Tou Mawu Ruata mawantuga wuṛṛu mataṛṛino apan ṛinone subbanna. I Tou tawe mangempe wuṛṛu tawe lai manengkamma aonggola sasal᷊o'a.

IBRANI 9:27

Ruata suete nanantuna manungku taumata mate tumba'u paassa wuṛṛu wua'udde parikisannu Ruata.

1 PETRUS 1:17

I yamiu mannagon Duata udde Iamangnga su tempo i yamiu u'al᷊iomanna si Tou. Ne, ete Ruata udde apan mamarikissa taumata tumuṛṛuttu inolaannu sangkatou-sangkatou ringannu tawe pilene. Ana waugu udde tantal᷊anna i yamiu ta'e su runia indi, ṛinone i yamiu mamantuga Ruata sulal᷊ummu wiakku.