1 TIMOTIUS 5:5 - WUKE SUSI WATTI'U AL᷊AL᷊USASSA

⁵ Wawine wal᷊u apan atonna-tonna sassane, wuṛṛu tawe isai-sai apan wotongnge mammadul᷊i si tou, tumba'u uaantimma Ruata. Allo ṛabbi i tou sidutu u'al᷊iomanna su Ruata maddorongnga tul᷊ungan-Ne.

1 TIMOTIUS 5:5 ပူးပေါင်းရင်းမြစ်များ

DARALO 91:4

I Tou sarun massirungnga si'o ringannu papaiddu Mawu, na'oman sara i'o mal᷊angnganna su al᷊ung-Nge; apapia-Ne naal᷊ihidda allungnga apan uasirungnga si'o.

YESAYA 12:2

Atonna, Ruata udde Mananal᷊ama'u, i Ya'u mangngimanna si Tou. I Ya'u tawe mata'utta, ana waugu i Tou mannohassa si ya'u. Mananal᷊ama'u uddewe Ruata, ete si tou i ya'u mangngantari.

YESAYA 3:26

Su manga pasallangannu soa taumata sarun lumal᷊o wuṛṛu lumuai, wuṛṛu soa udde sassane sarun maola'a ere wawine apan nitantol᷊ete wuṛṛu ua'ianna su leta'a.

YESAYA 49:21

Ne i'o sarun mabbisara sulal᷊ummu naungnga, ‘Isaite apan nanungkangngu manga ana'a udde si ya'u? Wal᷊inewe i ya'u buatte niawul᷊iannu manga ana'u, wuṛṛu tate mapanungkangnga apia? I ya'u niapidda sulal᷊ummu pamamuanganna wuṛṛu niṛṛae wuṛṛu nitantangnga sassane. Nariaddi wuassuapa manga ana'a udde, wuṛṛu isaite apan nabbuwunna si mangitou?’ ”

YESAYA 50:10

Ei i yamiu apan mangngaddatta Mawu, wuṛṛu maddaringikka wisaran allang-Nge, lal᷊anna apan amatanni yamiu asinungka marandumma, wuṛṛu tawe semakka apan mannemakka si yamiu; arawe pangimante Mawu; pangunsandakke su Ruatanu.

YESAYA 54:1

Yerusalem, dorone i'o naal᷊ihidda wawine tinna apan tawe wotongnge manungkangnga. Arawe orassa indi paggiote, wuṛṛu pangantarite ringannu lulluassa! Ana waugu manga anangngu marasai nilumebbe wuassu ana'a wawine apan tawe nitantangngu awingnge.

LAL᷊ALLU 1:13

Wuassu langitta i Tou nanossokku putungnga apan manoṛṛoba sara lal᷊ummu naungku. I Tou nantaingngu sedda su saruangku na'oman sara i ya'u nul᷊ussa. Ana see niwala-Ne i ya'u sassane uatataṛṛangnga su al᷊o'engngu allo.

LUKAS 18:1

Wua'udde Mawu Yesus nabbati'u sambau sasumandingnga ipangaṛṛa'a manga mallal᷊aṛṛenggen-Ne tadea'u i mangitou sidutu u'al᷊iomanna wuṛṛu tawe ma'adio'a naungnge.

LUKAS 18:7

Ne, apa Ruata tawe manamba'a hatton al᷊aṛṛanang-Nge sassane apan sussal᷊ande si Tou allo ṛabbi? Apa i Tou sarun manoṛṛuttu tempone mantul᷊ungngi mangitou!

LUKAS 2:37

i Hana naola'e wawine wal᷊u, wuṛṛu orassa indi uukke ual᷊utem pul᷊o appatta su tonnane. Tawe saran paassa i tou nanantangngu Wal᷊e Mawu. Allo ṛabbi i tou mattaṛṛamawu isudde su Ruata ringannu u'al᷊iomanna wuṛṛu mappuasa.

WATTI'U MANGA RASUL 26:7

Ete pa'aire udde lai apan a'antimannu sire mapul᷊o dua walahannu Israel, na'oman sara i mangitou mangke mattaṛṛa Ruata allo wuṛṛu ṛabbi. Wuṛṛu ana waugu i ya'u mangngimanna paaire udde, Tuangnga apan mawantuga, i ya'u niapaasal᷊a manga taumatan Yahudi.

WATTI'U MANGA RASUL 6:1

Manga mallal᷊aṛṛenggennu Mawu Yesus mallannu aatambanna anambone. Su tempo udde manga taumatan Yahudi apan mabbisaran Yunani naola'a tawe mal᷊uassa su saruannu manga taumatan Yahudi tumanangnge. Apan mabbisaran Yunani udde nabbisara, “Manga wawineng kami apan inawal᷊uanna tawe naasomba tahia ipabiakka miallo-miallo apan nitahia su manga taumata.”

WATTI'U MANGA RASUL 9:39

I Petrus lapiddu dirumarisikka wuṛṛu tinumantalongnga si mangitou. Na'oma poiaroddi, i tou niapidda su wabbo'a ṛengkenne rosone. Anambon bawine wal᷊u isudde naṛṛimpulunna si Petrus lapiddu lulluai wuṛṛu manta'e si tou manga laubba wuṛṛu manga jubah apan nitabbi'i Dorkas si mangitou su tempo i tou ta'e wiakka.

WATTI'U MANGA RASUL 9:41

See i Petrus namita limane wuṛṛu nantul᷊ungngi tou dirumarisikka. Wua'udde i Petrus namaggo manga taumata apan mangngimanna isudde suadio'a ringannu manga wawine wal᷊u udde, see nanantilli Dorkas apan nabbiakke udde si mangitou.

ROMA 1:12

Pandumangku eteudde ana waugu i ite su sambau buatte nangimanna Mawu Yesus Kristus, ne i ite wotongnge lai uatatohassa sangkatou ringannu sangkatou.

ROMA 1:5

Sulal᷊ummi Tou lai Ruata nangonggolu al᷊amatta si ya'u maola'a rasul, tadea'u i ya'u – mangadatta Mawu Yesus – mangngehetta manga taumata wuassu al᷊awo'u walahanna tadea'u mangngimanna wuṛṛu tumuṛṛutta.

1 KORINTUS 7:32

I ya'u maapulu tadea'u tuṛṛangnga mal᷊iu wuassu asasusa. Taumata apan tawe awingnge sarun manidutun ṛingiṛṛanne su inolaannu Mawu, ana waugu i tou maapulu malluassa Mawu.

1 KORINTUS 7:34

apanganne ṛingiṛṛanne natahia. Sangkatou wawine apan tawe awingnge, ara'e sangkatou maṛṛuala, sarun maṛṛingidda manambo su ola'u Mawu, ana waugu i tou maapulu tadea'u wadangnge sarangkanambone maola'a pussa'an Duata. Arawe sangkatou wawine apan piate awingnge, manidutun ṛingiṛṛanne su ola'u paddarunia indi, ana waugu i tou maapulu malluassa naungngu awingnge.

EFESUS 6:18

Ola'e sarangkanambone udde, lapiddu u'al᷊iomanna maddorongnga tul᷊ungannu Duata. Su al᷊o'engngu tempo, aal᷊iomante su ereapa Ghaṛṛahon Duata ua'ehetta si yamiu. Ṛinone i yamiu sidutu uatehamma wuṛṛu arie i yamiu mangillol᷊o. Aal᷊iomante sidutu hunan anambon al᷊aṛṛana'u Ruata.

FILIPI 4:6

Arie paasinggawanga su ola'u manga apa. Sulal᷊ummu al᷊awo'u inolaanna, aal᷊iomante wuṛṛu paddorongke su Ruata. Apa apan ipaapulun kamiu, wal᷊oa'e udde sidutu su Ruata ringannu wisara aadiangkamanna.

1 TIMOTIUS 2:1

Paarorone, i ya'u sumal᷊ande tadea'u sasal᷊ande, aal᷊iomanna, wuṛṛu aal᷊iomannu awadaalla, see adiangkamanna iwal᷊o su Ruata hunan anambon taumata;

1 TIMOTIUS 5:16

Arawe amungkangu sangkatou wawinen Saṛṛani pia sangkatou lal᷊oṛṛon bal᷊ene inawal᷊uanna, i tou ṛinone massumbala manga wawine wal᷊u udde; arie pabbala'a jamaatta mappadul᷊i si mangitou. Ringannu aroddi jamaatta wotongnge massumbala manga wawine wal᷊u apan atonna-tonna tawe tuṛṛange.

1 TIMOTIUS 5:3

Addate manga wawine wal᷊u apan atonna-tonna mabbiakka sassane.

2 TIMOTIUS 1:3

I ya'u umal᷊iomanna su Ruata apan a'imbeangku ringannu awawiran naungnga ere lai suete niola'u iupungngu al᷊amona'u dorone. I ya'u sidutu maadiangkamanna su Ruata napawe i ya'u maanaungnga si'o sulal᷊ummu aal᷊iomanna, mawae allo ara'e ṛabbi.

1 PETRUS 3:5

Ringannu olangnge indi su tempo rorone manga wawine pia agamane apan uaantimma Ruata mallogaka ririne ringannu tuttuṛṛuta awingngi mangitou.

RUT 2:12

Antimanna Mawu mabbal᷊issa al᷊awo'u apapianu. Antimanna i'o manengkamma al᷊awo'a apan ṛinone ionggolu Mawu, Ruatan Israel si'o, ana waugu i'o nirumantate mangimanna wuṛṛu uasirungnga si Tou!”