1 PETRUS 2:16 - WUKE SUSI WATTI'U AL᷊AL᷊USASSA

¹⁶ Ṛinone i yamiu mabbiakka ere taumata walate apulune, arawe arie mappaatu apulu naungngu udde ipallindumma al᷊al᷊eo, ewe'e pabbiakke ere sangkatou allangngu Ruata.

1 PETRUS 2:16 ပူးပေါင်းရင်းမြစ်များ

GALATIA 5:13

I yamiu suete niwagoanna maola'a taumata apan napallose. Arawe arie mappaattu apapallosi yamiu udde sidutu ma'ola'a apulun naungngi yamiu sassane. Arawe ṛinone i yamiu sidutu uaa'akkana wuṛṛu sidutu uaa'imbe.

ROMA 6:22

Arawe orassa indi yamiu buatte niapaal᷊iu wuassu rosa, wuṛṛu naola'e allangngu Ruata. Auntungannu eteudde manungku i'o mabbiakka tumba'u hunane su Ruata wuṛṛu su olangnge udde sarun mandantan wiakka tutune wuṛṛu saran mal᷊annu-l᷊annu.

1 KORINTUS 7:22

Ana waugu sangkatou allangnga apan buatte nangimanna Mawu, naola'e taumatan Mawu. Wuṛṛu sangkatou apan napallose apan mangngimante Mawu, naola'e allangngi Kristus.

ROMA 6:18

Yamiu buatte nipallosa wuassu rosa, wuṛṛu orassa indi naola'e allangngu apulun Duata.

GALATIA 5:1

I ite orassa indi nal᷊iute, ana waugu Kristus buatte namallosi ite! Ana waugu udde paa'agassa apapallosa udde, wuṛṛu ariete pattingka allangnga apia.

YAKOBUS 1:25

Titan Duata nasuungnga wuṛṛu pia taṛṛinone mamallosu taumata. Wuṛṛu taumata apan mammarikissa wuṛṛu mannutukka mapia-pia lapiddu tuttuṛṛutta tita udde, wuṛṛu wal᷊inewe tumba'u maddaringikka see timbul᷊iananna, taumata udde sarun al᷊amatannu Ruata sulal᷊ummu al᷊awo'u inolaanne.

YAKOBUS 2:12

Pabbisarate wuṛṛu pa'ola'e ere taumata apan sarun parikisanna tumuṛṛuttu titan Duata apan mamallosu taumata.

EFESUS 6:6

Arie ma'ola'a aroddi tumba'u su tempo i yamiu aellehanna, tumba'u ana see maasomba daralo wuassu taumata. Arawe ṛinone i yamiu ma'ola'a udde ere sangkatou allangngi Kristus apan tantal᷊anna tuttuṛṛuta apulun Duata ringannu ahewallu naungnga.

2 PETRUS 2:19

Manga huru awusu udde naddiandin apapalossa su manga taumata udde, arawe i mangitou sassane niallangngu manga inanaramanna apan mandal᷊eo taumata. Ana waugu amungkangu taumata tawe naaroappa wawono'a, ne i tou maola'a allangngu alal᷊eo udde.

KOLOSE 3:24

Paanaunge manungku i yamiu sarun manengkamma lal᷊antake wuassu Ruata. Apa apan nissaddia Mawu su al᷊aṛṛanang-Nge, eteudde sarun ionggola si yamiu. Ana waugu mawu apan atonna eteudde Kristus sassane.

MATIUS 23:13

“Nasilakate i yamiu manga hurun agama wuṛṛu manga taumatan Farisi! Yamiu taṛṛa lilangkamal᷊e'a. I yamiu mannal᷊awa'a taumata ma'apulu maola'a lal᷊oṛṛon araratuannu Ruata. I yamiu sassane madiri maola'a lal᷊oṛṛon araratuannu Ruata, wuṛṛu taumata waine apan maapulu, sassal᷊awaanni yamiu. [

YUDAS 1:4

Ana waugu ringannu niawagananni ite, pia manga taumata waine apan sinumutta nail᷊al᷊o'a su pattangnganni ite. I mangitou manga taumata lal᷊eo, apan mammal᷊elongngu watti'a su ola'u darangngun Duatan kite, tadea'u i mangitou pia tempo mapaasabangngu apulun naungngi mangitou lal᷊eo. Wuṛṛu i mangitou mannol᷊a'u Mawu Yesus Kristus, eteudde sangkatou Tembonanne wuṛṛu Mawun kite. Roen al᷊amonane ṛuumanni mangitou suete niapaasingkata sulal᷊ummu Wuke Susi.

1 TESALONIKA 2:5

I yamiu sassane masingkata manungku tawe saran paassa i yami nassal᷊o'a ara'e nangawusu si yamiu ipamunin pandumma apan lal᷊eo udde. Ruata mattatialane!

YOHANES 15:22

Unnu wisara i Ya'u tawe nirumanta, wuṛṛu tawe namasingkattu sarangkanambone udde si mangitou, i mangitou tawe dosane. Arawe orassa indi i mangitou tawe mapassinaaddu rosa mangitou.