WAHYU 15:3 - KITAB SUCI ZABUR INJIL

³ Dait ie pade nyanyiang nyanyian Musa, hambe Allah, dait nyanyian Anak Dombe. Suarene: “Ya Allah, Tuhan Saq Mahekuase, agung dait ajaip gati karye-karye Deside! Raje selapuq bangse, adil dait kenaq tindakan-tindakan Deside!

WAHYU 15:3 ပူးပေါင်းရင်းမြစ်များ

ZABUR 100:5

Séngaq ALLAH nike solah; kasih setie-Ne selaéq-laéqne, dait kesetiean-Ne turun-temurun.

ZABUR 105:5

Hai keturunan Ibrahim, hambe-Ne, dait keturunan Yakub, dengan saq Ie piléq, pade inget léq selapuq keajaipan saq Ie piaq, ndaq lupaqang keputusan-keputusan-Ne.

ZABUR 111:2

Tetu-tetu ajaip perbuatan-perbuatan ALLAH , patut teselidik siq dengan-dengan saq demen léq hal nike.

ZABUR 111:7

ALLAH adil dait setie léq selapuq perbuatan-Ne, selapuq préntah-Ne bau teandelang.

ZABUR 139:14

Kaji memuji Deside séngaq kaji tecipteang secare luar biase gati! Selapuq karye Deside ajaip dait miaq takjub, kaji tetu-tetu sadar léq hal nike.

ZABUR 145:17

ALLAH adil léq dalem selapuq saq Ie laksaneang dait penoq kasih léq dalem selapuq karye-Ne.

ZABUR 145:6

Ie pade beriteang perbuatan-perbuatan Deside saq beléq, keagungan Deside gen kaji ceriteang.

ZABUR 18:30

Deside nguatang kaji jari ngalahang musuh; siq pertulungan Allah kaji, kaji sanggup ngancurang pertahenan ie pade.

ZABUR 78:12

Léq arepan leluhur ie pade, Allah miaq keajaipan léq negeri Mesir, léq tanaq Zoan.

ZABUR 92:5

Séngaq perbuatan Deside nyenengang atén kaji, siq gembirene kaji benyanyi lantaran karye Deside.

ZABUR 99:4

Deside Raje saq bekuase, Raje saq seneng léq hukum; Deside saq ngelaksaneang kebenaran; Deside ngelaksaneang hukum dait keadilan léq Israel!

YAHYA 1:17

Hukum Taurat ite terimaq léman Musa. Laguq rahmat dait kebenaran rauh langan Deside Isa Almasih.

1 TIMOTIUS 1:17

Allah, Raje selapuq jaman, patut tehormatin dait tepuji selaéq-laéqne, séngaq Ie saq kekel, saq ndéq penggitan dait saq Esa! Amin.

IBRANI 3:5

Musa setie jari pelayan léq dalem gedéng Allah jari ngebéng kesaksian mengenai napi saq gen teberiteang léq jaman saq gen dateng.

WAHYU 1:8

“Tiang niki saq penembéq dait saq penutuq, Manik Allah, Tuhan saq araq, saq sampun araq, dait saq araq selaéq-laéqne, Saq Mahekuase.”

WAHYU 11:17

Ie pade matur, “Ya Allah, Tuhan saq Mahekuase, saq araq, dait saq sampun araq! Tiang pade besyukur léq Deside séngaq Deside sampun kadu kuase Deside saq beléq, dait sampun mulai mréntah jari raje!

WAHYU 14:3

Léq arepan tahte dait keempat mahluk dait pare pemimpin léq sekelining tahte nike, satus petang dase empat iyu dengan nike nyanyiang sopoq nyanyian saq baru. Nyanyian nike ndéq bau teperajahin siq sai-sai kecuali satus petang dase empat iyu dengan saq sampun tetebus léman gumi.

WAHYU 14:8

Malaékat kedue nerutuk malaékat saq penembéq sambil bekuih, “Sampun runtuh! Kote Babel saq beléq sampun runtuh! Ie sampun miaq selapuq bangse jari bowos siq aiq anggur -- nike anggur léman napsu perbuatanne saq cabul!”

WAHYU 17:14

Ie pade gen perang ngelawan Anak Dombe nike. Laguq Anak Dombe nike kance pengiring-pengiring-Ne saq setie saq sampun Ie manikang dait Ie piléq nike gen ngalahang raje-raje nike, séngaq Ie Tuan selapuq tuan, dait Raje selapuq raje.”

WAHYU 19:16

Léq jubah-Ne dait léq impung-Ne tetulis aran niki, “Raje selapuq raje, dait Tuan selapuq tuan.”

WAHYU 19:2

Penghakimanne adil dait bijaksane! Ie sampun mutusang hukuman tipaq pelacur saq beléq nike, saq nyédaq dunie siq perbuatanne saq cabul. Allah sampun hukum pelacur nike, séngaq ie nyematéq hambe-hambe Allah.”

WAHYU 4:8

Keempat mahluk nike, sopoq-sopoq bedowé enem keléték, sekeliningne dait léq bagian dalemne penoq siq mate. Peteng menah mahluk-mahluk nike ndéq engkah-engkah bekuih, “Suci, suci, suci, Allah, Tuhan Saq Mahekuase; saq araq, saq sampun araq, dait saq araq selaéqne.”