WAHYU 2:10 - PERJANJIAN BARU NALCA YUBA

¹⁰ Wene salek enyek, yokaʾ-yokaʾ igina kwebnenggelnya nenesa leboka, anda lok ganya bonaʾ ara mem. Anda pe beknelamaʾ nong ara, anak sunuwanenggelaʾ ara, Iblis adya ugun gangganek sam hnon nimi doboka gasa ek sam henga geregoka beibnesil. An henga geregoka beiyisilya salek era, lika sagobadya mabnelum. Unuweigijaʾ anaba, anda bojam ululom! Anya somogamen dara, nadya anak dib embengaʾ ulmoubnaʾ huk golunaʾ ek goliyiwanenggen.”

WAHYU 2:10 ပူးပေါင်းရင်းမြစ်များ

MATIUS 10:22

Ugunda nadya si nenesa leboka, nimi nidyaʾ ara, ugunuk hyak lek senelemnesak, bok pe sekmouboka ulumlyaʾ ara sidyaʾ dagalongnaʾ salek ubnelanya bera blebnamla.

MATIUS 10:28

Ganya nong anyek on nim era hnon unggulumakaʾ anasa, alda nong bolaʾ dem anyek olomak nim ek, ugunda lok ganya bonggom, mem. Alda Imik Neyung ak hnonok, nong dem ab, ganya nong ab, nidyaʾ hiboka, oboka somoknaʾ dub heikek sam uka desin heikek dabnesilnya bek ok lok ganya bololulum.

MATIUS 24:13

Bok ban unulamlyaʾ anaba sidyaʾ unuru daknamla sum eneba, ganya siklewoka ululenya benyek blebnamla.

MARKUS 13:13

Ugunda nadya si nenesa leboka, nimi nidyaʾ ara ugunuk lek senelemnesak. Bok ban nidyaʾ unuldalameija hnoum an siklewoka bulumlyaʾ ara sidyaʾ daknamla dara, benyek eimik era blebnamla,” wenyaboka neksuk.

MARKUS 8:35

Anasa nadya nong anyek weiningdanyek senen ganya bololanya bera, alda denghenelabok, Imik Neyung adyaʾ perob lero yanggan yub eb, nasamba hnon leboka, al weininggeldalamla dara, were alja nong era, eimik blebnamla.

LUKAS 21:12

”Bok ban nidyaʾ anam unuwanggumlya salek era, yok nang edya ugunuk heng gouboka saboka obnesak. Ugunda Yahudi nim edya yuba don e pik ab hnon, henga gouboka yana lelewanasaakanya, henga gouboka gasa ek hnon doronggoka beibnesak. Ugunda nadya yuba donaʾ nimi dibaʾ ululumaʾ anasa leboka, ugunuk mok soko dub nang eb yok-yok senenggom nang edyaʾ saramek henga geregoka bol giriklemnesak.

YOHANES 12:25

Heknedya alja nong unaʾ ek wanaʾ nauba uldalamla dara, eimik alja nong unaʾ weiningdowanamla. Bok, heknedya meneng nong ek sokok an wanaʾ uldanggulumla dara, eimik alak bo beiyiboka pe ulmoublemnamla.

YOHANES 13:2

Yesus ab, alja yuba don nang eb, inimokaʾ anasa delemek. Iblis adya, Simon bedya me Yudas Iskariot bek, Yesus bek yuba dil bululaʾ aboka, ganyek seleb orugomok.

YOHANES 13:27

Dara, Yudas bera ban gwanenga dol yabok sab-sab enyek, Satan bisaʾ ara aljaʾ ganya lomok wekel yeilimok. Dara, Yesus adya, ”Or anja unuwonun senemennya nera, berra unul yabalom,” hyok.

RASUL 20:24

Nara Imik Neyung adya nuk wana uboka aralesil perob lero yanggan yub enyek, laga lelemnesilim aboka elegenyok wa anyek, pe senenya loboka webdaknun senelamnaʾ adya, nadya nong ak dara, seininel danggulumna.

RASUL 21:13

Bok Paulus bedya lebok ara, ”Ugunda nenera hekasa engelelum adya, nadya ganya soldol meneklenulum do? lemok. Nara Yerusalem heikek ab salawoka henga gereganenok aboka ok bununaʾ aboka unggulumna. Alda Wenelesilnya Yesus si amba leboka somogonun aboka ulumna,” hyok.

1 KORINTUS 9:25

Nimi nidyaʾ bik-bik henemab bar aboka, sunulsinilimakaʾ ak sam ara, yokaʾ nidyaʾ ara ganya siklebdaboka ulumak. Ban siklewoka pe sunuwoka ulumaknya nera, pewanya dara, yalaklamla esaʾ kweb ganagameijaʾ ak dobnamna senewoka, anara unulumak. Bok nuk dara, yalawanggunumla esaʾ enyek kweb ganaganesilaʾ anasa, yokaʾ-yokaʾ nidyaʾ ara, pe yeiriwoka siklewoka unulumab.

EPESUS 2:2

Ugunda youmaʾ era, ban malya unaʾ pik balalum. Ugunda sokok an unulumak ununaʾ ok unura ululumaʾ hnon, anya ugunda im hnoumunga salawoka bo ulumla bisaʾ dubnya bedya yub enyek, dib senewoka ganya kweboka ululumaʾ hnon. Al bisaʾ dubnya bera, Imik Neyung ak dib bleklemak nang edyaʾ ganya lomok wekoka malya nenelesilnya bera an.

EPESUS 6:12

Nunda nimi sirikaʾ ab mala weboka oldanggulumab bok, alda imik garan denaʾ ak sam wenewoka bo usinaʾ ab, senenggom unaʾ ab, wen gunaʾ ulumla sokok an bisaʾ dub unaʾ ab, gobdo malya ulumak yu bisaʾ unaʾ ab, oldalamab.

YAKOBUS 1:12

Yokaʾ-yokaʾ sunulyamalamla salek enyek, ganya siklewoka ululanya bera pelemlaʾ nong ara an. Anasa wera, ban benera unu sunuwalyebok, alda ganya pe siklewoka ulumlya dara, wera Imik Neyung adya alak wanaʾ ulumeija nim ek embeng unaʾ eleganesin wenyasuknya nera, al hnon eleganamlaʾ anasa, pe ulumla.

1 PETRUS 5:4

Anya senenggomaʾ imiknya nimi bo ulusilnya yanamla sum era, ugunuk ara senedyaʾ mekaʾ habnenggunumla bonaʾ enyek, senedyaʾ yakaʾ anyek eleganesil.

1 PETRUS 5:8

Bisaʾ dubnya Iblis ara alda ugunjaʾ senenggom isaʾanya ulumlaʾ anasa, ugun nonga pe diri ubdangoka mala websiniwoka ulululum. Iblis ak dara, bei gam adya denaʾ eibnenggumnekanya ngouboka ero yabalamla sok, ero yabalesilaʾ anasa keeboka uluulum.

WAHYU 13:14

Dara, ban eimik yu nongaʾ enedya, lok so beknaʾ dibaʾ alak elegok adya, men yu nongaʾ amba leboka, loka dabsinaʾ unuru yabalamok adya, ban sokok an ulumeija nimi nidyaʾ ara, bobnenewoka ubsuk. Hnonda, ban men yu nongaʾ era, oldan gab edya menengaʾ diligaʾ hwam bok, or ulumlyaʾ anyek, alja nonga sunuwoka memenaʾ ara, galak girikek gom meewoka sekiyiwolulum aboka orugosuk.

WAHYU 13:2

Ban mek gwanek ab lanawokaʾ ara, nadya eibsa dara, senenggom bei girik manaʾ senenggomnya nenesoʾ ak eibsa. Alja yan era nauba manaʾ, juenem manaʾ yana anaso. Anya hogung ara nauba yu girik manaʾ, singa manaʾ anaso. Dara ban lanawoknya nek, naga bagaʾ edya, alja migibaʾ ab, perob ekla dub nang edya bunaʾ ekla eb, migibaʾ dangoka wenesinaʾ ab, damok danyek elegok.

WAHYU 13:7

Hnonda onoʾ alak, anja munaʾ Imik Neyung mab ek mala boboka obdangoka, sikinek oblamaganasilim aboka migibaʾ elegok. Anya sik yok-yok nimi yilaʾ ulumakaʾ ab, sikja nimi gumaʾ yok-yok unulumak nim eb, sik yok-yok yuba salamek nim eb, sik yok-yok mok soko ulumak nim eb dara, alak yeiriwoka unuru yibinilam aboka unun migibaʾ elegok.

WAHYU 17:14

Anya sikda domba me ak mala boboka oldalamnamak. Bok ban domba me ara nidyaʾ wenelesak nang sikja senenggom Wenelesilnya ulumnamlakanya, nidyaʾ dub nang dubnya ulumlaʾ anasa, alab, sikenek weboka doboka alak bojam ulumak nang eb dadya, oblamaganamak,” wenyaboka nekenyok.

WAHYU 2:13

Nara anda har sam ululamaʾ, nara seleb ella ulumnaʾ ara, anda bisaʾ dubnya Satan bedya dub heikek sam ululam. Anyek bok, anak dara, nadya si nek hyak pe bojam ulunelem. Nadya bojam unenya Antipas be ugunja heikek obek sum eneba, anja dara, nara Yesus ak dib senenggulumna aboka gunuwoka lebnenggublum.”

WAHYU 2:9

Anak an yokaʾ-yokaʾ okna uboka ulunggelaʾ ara nara seleb ella ulumna. Anda bonaʾ garan ululamaʾ ara naba ella ulumna! (Bok saawoka anda aldib dubnya ululam.) Hnon nim era bisaʾ dubnya Satan alja bisaʾ mabo silibaʾ uboka, Yahudi nimi dibaʾ unaʾ orokjok, nunda Yahudi nim aldalamak nim edya anak an, geklewoka derewoka walasakaʾ ara nara seleb ella ulumna!