RASUL 28:31 - PERJANJIAN BARU NALCA YUBA

³¹ Dara, yokaʾ-yokaʾ adya Paulus bek igina kwelinaʾ orokaʾ anyek, al nong ara asaʾ ganya boboka, Imik Neyung adya senenggom wenesinaʾ yub ab, Wenelesilnya Yesus Kristus amba yub ab, dara anyaʾ aboka geklewoka lelesuk.

RASUL 28:31 ပူးပေါင်းရင်းမြစ်များ

MATIUS 4:23

Galilea sokok ara Yesus nidyaʾ heikek yibiniboka, Yahudi nim edya yuba don ek sam yuba nekoka ura yabalesuk. Yesus adya Imik Neyung adya eimik era wenewanesil an perob yub enyek nekdo yabalesuk. Dara onoʾ hnonda nimi malya ulusuk nim eb, neiklemek nim eb, nauba hwelesuk.

MARKUS 1:14

Wera Yohanes bera seleb henga gerekoka gasa ek sam beiyimek dara, Yesus ara Galilea sokok sam biniboka, Imik Neyung adyaʾ perob yuba neklesuk.

LUKAS 8:1

Nen seleb dara, mandewal henggonggom Yesus ara nauba heikek abaʾ ara hnon nauba heikek uboka, onoʾ mek heikek abaʾ ara hnon mek heikek sam, Imik Neyung adya wera seleb wenelemnesil aboka, perob lero yanggan yuba leb elekgiga yabalamok. Dara aljaʾ obadya yuba doro diriga ban nang eneba alab neikaʾ yabalamek.

RASUL 1:3

Yesus ara, alda seleb somogoka embengaʾ suboka bukumokaʾ seleb dara, nara aldib embengaʾ subna bar aboka, alak diriga ban nang ek laga aabdangoka, dib nong beknaʾ gong elegosuk. Alda li denga hnonok ebdobnya mekbadya sum (empat puluh hari) sikenek aabdangdo amalasuukanya, Imik Neyung adya wenelemnesil yuba neikaʾ saboka ulumek.

RASUL 20:25

Nara ugunuk sam seleb yeiniboka, onoʾ ugunuk hnon, Imik Neyung adya wenelemnesil yub era, ugunuk seleb nekesisa. Anasa wera wenyek dara, ugunublaboka hnon mekaʾ hogunga eibdanggunumabaʾ ara orowek ella ulumna.

RASUL 23:11

Dara onoʾ nenyek mabok sum enyek, Wenelesilnya Yesus bera, lendara dib Paulus berem sekoka, ”Anda ganya dabogalom,” hyok. ”Anyagan Yerusalem heikek nasamba laga lelelum sok, Roma heikek anaba neik so unulumnalam,” hyok.

RASUL 28:23

Dara onoʾ, sikja Paulus bek anda sumenyek ansamba yana lelewoka lebnesilim anasa yanamab aboka leiyimek. Wera Yahudi nang edya Paulus bek an ululam ak yanamab amek sum era seleb yenebok dara, wera nimi nauba so yeilimek. Wera seleb yeilimek dara, Paulus bedya yeilimek nim ek, Imik Neyung adya senenggom wenesinaʾ yub amba geklewoka laga yana lelewoka leboka, Musa bedya unuwanalum an yub eb, ununumnaʾ lelemek nang edya hnon, Yesus anasa eimik era unuwanamla aboka lemeknya okoka laga poboka gararob aboka leb elegesuk. Wenyaboka yuba en lebdibigemok salek era lugunaʾ ebaʾ ara sin dok.

RASUL 28:30

Wera Paulus bera Roma heikek ara alja rupiah seʾ dekemok ek, gobdo gibnaʾ penya ulumokok ab dara, nimi nauba alak yalamek dara, nidyaʾ perob aboka doro dililisuk.

RASUL 4:29

Anasa Wenelesilimnya o, wenyok sikda nuk wellublesak anyek kendesilom. Onoʾ nuk anja wa wen nang enyek, anja yub enyek lok orok anyek asaʾ ganya boboka leb giriganobaʾ aboka, or unuwanalum aboka nuk migibaʾ elegeisilom.

RASUL 4:31

Wenyaboka Imik Neyung ak seleb mololgogol yabek dara, sik longomek e nera warawoka lobok. Dara, sikda nidyaʾ ara Imik Neyung Geisinya adya deknewoka, asaʾ nong anyek, Imik Neyung yuba nim ek lero yabalamek.

RASUL 5:42

Dara li sobaʾ, Imik Neyung ek ab, nimi yuba dolomek nim ek ab, Yesus adya perob yuba lero, Kristus ara Imik Neyung adya nimi blebsinaʾ dubnya eleganesin amok ara, wera an elegosuk aboka, yok nang ek yuba sobaʾ nekdo yabalemek.

RASUL 8:12

Bok, Pilipus bedya sik Samaria nim ek, Imik Neyung yuba leboka, nimi blebsinaʾ dubnya si Yesus Kristus adya, eimik wenelemnesil aboka lelemok dara, Samaria nim era Pilipus bedya lelemok yub ek dib senemek. Dara, sikda gelewa anaba, nengmab anaba, nidyaʾ meka dalasuk.

PILIPI 1:14

Nak henga gouboka beibnyekaʾ adya, wera yok Imik Neyung mab era, asaʾ ganya bob sounuwoka, lok ganya orokaʾ anyek, Imik Neyung adya yub era lero yabalamak.

2 TIMOTIUS 2:9

Wera, al ban perob yub enyek lero yabalenanya nenesa, nara hyak yokaʾ-yokaʾ nauba igina kwelenel. Anya hyak hokaʾ donanya benesoʾ anyek, gasa henga gouboka beillilenyak bok, Imik Neyung yub ak dara, nim adya henga goubnamenggom ulumla.

2 TIMOTIUS 4:17

Bok, Wenelesilnya nak aralenyok. Perob lero yanggan yuba pe lelemlyaʾ adya, nimi nidyaʾ Yahudi gom nimi kebnokaʾ aboka, nak alja migib elegenyok. Dara onoʾ nara senenggom bei gam si ak ab blebnyok.