PILIPI 2:13 - PERJANJIAN BARU NALCA YUBA

¹³ Nenesa leboka Imik Neyung adya, alja ganya ek hekel eleklenenokaʾ aboka ugunja ganya lomok sam weboka, unuweisinya ganya hnon, unuwanokaʾ aboka migiba hnon eleklesil.

PILIPI 2:13 ပူးပေါင်းရင်းမြစ်များ

LUKAS 12:32

”Ugun ululum nim era dumunga mekaʾ me bok anasa, ugunda lok ganya bonaʾ ara mem! Imik Neyung ara alja wenelemnesilnya nenyek, ugunjinya danasil.

LUKAS 2:14

”Senenggomaʾ perobaʾ ara, Imik Neyung hyak imik ululanya bembakanya, ganya hekoka namenaʾ pe unaʾ ara, sik sokok an alak urumuk dangalamlya nim emba ulumnamla,” wenyaro giblemek.

YOHANES 3:27

Wera Yohanes Pembaptis bedya dara, ”Nim ara Imik Neyung adya sikenek eleganggunususo dara, yokaʾ-yokaʾ dobnenggunuseng.

YOHANES 6:45

Ununumnaʾ lelemek nang bukuk ara, sikda nimi nidyaʾ ara, Imik Neyung adya eimik wenewanesil, aboka momnya domek. Anasa, heknedya Imik Neyung bek pe keboka, alak ab dolomla dara, alda nak or yanenel.

YOHANES 6:65

Onoʾ Yesus adya moruwoka, ”Nimi ben hnonok sirik anababya, nadyaʾ neyung bedya unuwolulaʾ aboka aranggululenya bera, nak sam yanggunumla, amsaʾ ara, hnon dib senenggululumaʾ anasa lemsa,” hyok.

RASUL 11:21

Wenelesilnya migib era, yuba lelemek nang gologoka ulusuk adya, wera sikja nimi yok nim ek yuba lelemek dara, nimi gong dib senewoka, sikja nonga ganya gekman Wenelesilnya bek sam elegemek.

ROMA 12:3

Nak wanaʾ uboka eleksinaʾ damok enyek sunuwoka, nara ugunuk nimi yok-yok wenyhenemna, Ugunda ugun seiniwoka unuwanasomnya nera hwiboka, hyak senenggom imik unuwanggunusomnya nenyek seininggom, mem. Bok ganya onoʾ yok so uboka pe seinililulum, wera anedya ugun nong ara, ban Imik Neyung adya nimi yok-yok eleklesilaʾ, ganya dib senenaʾ pik uboka, yokaʾ ak ganya sobaʾanya senewanalum.

ROMA 9:11

Bok ban mab era anam beibnenggusuukanya, perobaʾ malyaʾ gom anam unuwanggurek bok, Ribka gek an wenhyok, ”Men karob so me nera goubenya so me nedya wa wenya danamla.” Anedya Imik Neyung ara alja weboka dobsuk yub era migibaʾ kablul aboka, bok ununaʾ adya gom, alda Imik Neyung alja yoululum hyoknya nedya unuwok.

ROMA 9:16

Dara Imik Neyung unulusil era, nim adya seininaʾ ak gom, yeiriwoka enaʾ ak gom ununggulusil. Bok Imik Neyung adya yadyek anasa ganya doboka unulusil.

1 KORINTUS 12:6

Imik Neyung wa welemakaʾ ara, yok-yok ululabok, wa welemakaʾ anasa migibaʾ eleklesil Imik Neyung era, hnonok ok ulumla.

1 KORINTUS 15:10

Bok, Imik Neyung adya wanaʾ uboka eleksinaʾ nong edya, nara wera an seleb wen ulumna sok dasa. Imik Neyung adya nadya unulamsa malya unaʾ doboka boboganyokaʾ ara, salyaʾ lelem ub lobnenggubnyok. Nadya yok yuba lenaʾ nang era, nauba so ununaʾ orok bok, nak danyek nauba yeiriwoka welemsa. Bok, nera nadya ok wenggulumsa. Alda nenera Imik Neyung adya nak wanaʾ uboka eleksinaʾ elegenyokaʾ adya unumsa.

2 KORINTUS 3:5

Nunja unu welemab wa nemba dara, numbeyok dara, unuwamenggomaʾ ak ululabok, nunja unu migibaʾ welemabaʾ ara Imik Neyung adya ok eleklesil.

EPESUS 1:11

Imik Neyung ara yok-yok wa nidyaʾ welemlaʾ ara, unuwanamna wenyananya nok sunuwoka unulamla. Dara wera, Imik Neyung adya, hyak youmaʾ nong enyek nuk orowek weboka dobsuk. Anadya, Kristus pik uboka nunda Imik Neyung misaʾ seleb domouba.

EPESUS 1:5

anadya nu nong anyek, Yesus Kristus pik uboka hyak men youmaʾ enyek orowek weboka doboka, alja mabo yokaʾ gebsuk. Wera alja men danyek perob senewoka unuwanamna senemokaʾ ara an unuwousuk.

EPESUS 1:9

alda soko nang blebnamna senemokaʾ doknomokaʾ ara, alja men ganya doboka Kristus pik uboka, wen nuk laga nenewok.

EPESUS 2:8

Imik Neyung ara ugunuk wanaʾ uboka eleksinaʾ anasa leboka, ugunda Yesus ak dib senewoka doblumaʾ adya, ugunuk dib blebsuk. An blebsukaʾ ara, ugunja ununaʾ edya dobnenggublum. Anara Imik Neyung adya ok elek loboka blebsuk. Anaso ubsuk bok dara, nimi hnon ara nabeyok dobsa aboka nonggo henggunumso.

2 TESALONIKA 1:11

Ban nenesa leboka, ugunuk anaso unuwousululaʾ aboka, nunda ugunsamba sobaʾ heng uboka mololesab. Nunja ugunsamba heng uboka mololesabnya nera, ugun nong anyek Imik Neyung adya ugunuk youbosukaʾ anasa, anaso unu ubseng senelelanya nenyek, gigiwoka pe ululumaʾ aboka mololesab. Anasa wera, Imik Neyung adya ugunuk aralesilyaʾ adya, ugunja Kristus ak dib senemoub aboka welelum wa nidyaʾ ara, pe unulumunaʾ adya pebgiga balalulaʾ aboka, Imik Neyung migib adya ugunuk sam ak dara, alja senelamla sok gigiwoka unulusulul.

2 TIMOTIUS 1:9

Imik Neyung adya nuk bleboka doboka, nuk geisa ulunokaʾ aboka youbosuk. Imik Neyung adya ban unuwosukaʾ ara nunja yoknya nek pe unumoubaʾ amba ubnenggubsuk. Alda alja wanaʾ ulusukaʾ orowek unuwanamna senemokaʾ ak sunuwoka ubsuk. Ban soko en anam uyiwanggom salek enyek, Yesus Kristus pik uboka, alja wanaʾ unaʾ ara, nuk seleb elegesuk.

IBRANI 13:21

ugunuk yokaʾ-yokaʾ perobaʾ ak alja senelamlaʾ sunuwoka unulunokaʾ aboka pe munaʾ lelewoka eleklesulul. Anya dara, alja perob senelamlaʾ ara Yesus Kristus pik uboka, nu lomok welesulul. Wera nidyaʾ senenggomaʾ perobaʾ ara al alsamba ok sobaʾ ulmorulul! Aldib, al unululul.

1 PETRUS 1:3

Nunda Imik Neyung ak nunjaʾ Wenelesilnya Yesus Kristus alja giblelanya aljaʾ neyung bek gibnemab! Alda nuk angoo yadyek senewoka arasukaʾ sunuwoka, Yesus Kristus somoknaʾ ak ab embengaʾ suboka bukiyiwokaʾ adya, wenyek embeng unaʾ ara nuk elegosuk. Ban adya ganya welmorunaʾ ganya nuk elegosuk.