KOLOSE 1:10 - PERJANJIAN BARU NALCA YUBA

¹⁰ Dara, alja senelamla anyek pe ella ubmun adya, ugunja ululumaʾ ara, al saramek ab dom digum ulumla adya or unu ulunok senewanemlakanya, yokaʾ-yokaʾ unululumaʾ nidyaʾ ara perob senewanamla. Nunda heng uboka mololosab ara, ugunda yok-yok perob wa weboka doka moulumnelumukanya, Imik Neyung ak ella danganaʾ nauba danggiga balalul aboka mololosab.

KOLOSE 1:10 ပူးပေါင်းရင်းမြစ်များ

YOHANES 15:16

Ugunda nak dobnenggunulum bok, nadya ugunuk weboka dosisa. Ugunda bindiwoka, sobaʾ ulmorulumnamla doka moulusululaʾ aboka, dosisa. Dara, nadya si sibuka, neyung bek ab yokaʾ-yokaʾ nidyaʾ elegesilom aboka mololomun dara, eleganesil.

YOHANES 15:8

Ugunda doka nauba molumnesil dara, nadyaʾ neyung bedya si imik nenewoka, ugunda nadya yuba doro diriga ban nang dibaʾ ulumnulum,” hyok.

YOHANES 17:3

Anda Imik Neyung ara hnonok ok dib nong ululamnya bek dib ella uboka, onoʾ anja sokok bokol yeililumnya Yesus Kristus bek hnon dib ella ulumak dara, embeng unaʾ dibaʾ ara alan.

ROMA 1:13

An nenyek ok gom, nadya hemyabo nang, alda nadya ugunuk younunaʾ ulumna damok enyek, ugunda ella danalum senelamna. Bok al danyek mouruwoka sumeneba, yok mok soko nim ek doka moulumlaʾ eillilamna sok, ugunuk doka ulumlyaʾ anyek eiblyek senewoka, yokaʾ adya salalenel.

ROMA 4:12

Anya, hnonda nimi bolaʾ gararob nang, nunjaʾ neyung youmaʾanya Abraham, alda anam bolaʾ garawanggom danyek mouruwoka, alja dib senemok ganya soʾ enyek, dililda doboka dib senelemak nang emba hnon, sikjaʾ neyung be dok.

ROMA 6:4

Wera anasa, al somogokaʾ lomok meka dabsik dara, nunda al ab neikaʾ soko lokosik. Dara, Neyung bedya si senenggomaʾ adya Kristus ara somoklomak nang gangganek ab embengaʾ subuka bukiyiwok sok, eimik era numbabya wenyok embengaʾ unaʾ lomok ulumnemab aboka, neikaʾ soko lokosik.

2 KORINTUS 2:14

Bok nunda Imik Neyung ak perob aboka sobaʾ giblemab! Al Imik Neyung welemlaʾ adya nuk sam ara, Kristus pik uboka yokaʾ-yokaʾ ak hmenga nenewoka ollamaklamab. Onoʾ alda nu pik uboka alak ella dangan gen-gen songaʾ anasoʾ ak, mok soko me nidyaʾ olleleklamla.

2 KORINTUS 4:6

Imik Neyung adya leleladya, ”Gunaʾ lomok ab dilinaʾ yeblul,” alamla Imik Neyung enedya, nunjaʾ ganya lomok dilinaʾ yeblesil. Al Imik Neyung adya alja nong senedyaʾ ella dangasin dilinaʾ yeblulaʾ aboka unulusil. Dara Kristus aljaʾ asok pik uboka dilinaʾ yeblesil.

2 KORINTUS 5:9

Nunda sokok an ulumab salek gom, imik heikek ulumnemab salek gom, ara Imik Neyung ganya anyek perobaʾ nenel eleklenob senewoka dulumab.

2 KORINTUS 9:8

Imik Neyung senemlya dara, ugunuk yok-yok perob eleknaʾ lendewoka eleklemnesil. Wera onoʾ alda yok-yok nidyaʾ pe eleganesilaʾ adya, ugunda yok-yok perob wa nidyaʾ wel dibilloklomnulum aboka hyak nauba ugunuk ulumnesil.

EPESUS 1:17

Hyak senenggomaʾ imik ululanya Imik Neyung ara, nunjaʾ Wenelesilnya Yesus Kristus aljaʾ Imik Neyung bedya, ugunuk yokaʾ-yokaʾ elegosululaʾ aboka mololesin. Imik Neyung ak olowoka pe ella dolulumaʾ aboka, geremseng un ganya hnon, ella dangan ganya hnon, ugunuk elegousululaʾ aboka mololesin.

EPESUS 2:10

Nu nong ak dara, Imik Neyung adya uyiwousukaʾ ara, Yesus Kristus pik uboka nu meewoka, alja orowek yokaʾ-yokaʾ perobnya nenyek unulumnemak senewoka gegewoka beibsuk nim ek ulumab.

EPESUS 4:1

Ban nenesa leboka, nara Paulus bedya, Imik Neyung amba leboka henga goubnyeknya bedya, ugunuk ara, Ugunja nong unaʾ era, Imik Neyung adya youbuka dobsuk nimi geknewaʾ ulululumaʾ aboka weneweisin.

EPESUS 4:13

Wera anadya, nunda nidyaʾ ara neik hnonok dib senenaʾ dolulaʾ aboka hnon, Imik Neyung alja me nek pe ella ulunokaʾ aboka hnon, ganya kabnokaʾ aboka hnon, onoʾ Kristus adya pe ulumlaʾ anasoʾ anyek dangoka nebgiga balanokaʾ aboka hnon, elegousuk.

EPESUS 5:10

Imik Neyung ganya adya anara perobaʾ ak unulumak senen ganya bobnamlyaʾ anyek duboka elemnelum.

EPESUS 5:15

Wera anasa, ugunja nong unaʾ era pelemab gom, orok gom aboka pe diri uldalalulum. Nimi dongdang alamak nim edya unaʾ loboka, alda geremseng nimi ganya boboka ulululum.

EPESUS 5:2

Kristus nonga somogokaʾ ara so meklaʾ song anasoʾ ak, Imik Neyung ganya hek elegoka, al nong ara nusamba beibdangoka somogosuk sok, ugunda wanaʾ ganya boboka unura yabalelulum.

PILIPI 1:11

Dara, ugunja nong unaʾ enyek, perob unaʾ adya ok, Yesus Kristus adya pe deknelesilya dara, wera Imik Neyung si ak imik nenewoka, alak sobaʾ giblemnemak.

PILIPI 1:27

Yo, anasa wenyek dib nong ara, ugunda Kristus amba lebokaʾ perobaʾ Imik Neyung adyaʾ perob lero yanggan yub enyek, sunuwoka ugunda pe ulumnelum. Ban unu ulumunaʾ adya, yub ok kebnamnaʾ anaba, Imik Neyung adyaʾ perob lero yanggan yub ek ganya dib senewoka un danasa duboka hnonok nonga dangoka ulunobaʾ aboka, yeirilemak anaʾ hnonok ella ubnamna.

PILIPI 4:18

Wera ugunja beibnulumaʾ ara, nak okna ubnyoknya nera nidyaʾ gigiwoka seleb dobsa, hyak nauba so sounuwoka dobsa! Ugunja yok-yok bonaʾ nak arawonulumaʾ Epafroditus be bo yanyokaʾ ara nidyaʾ seleb dobsa. Anadya wera men dara, anyek dobsinya senewoka seinisenya nera nidyaʾ gigiwoka dobsaʾ ulunel. Ugunja nasamba arawoka beibnulumaʾ nidyaʾ ara, Imik Neyung ak perob songa lelemlaʾ giboka beil balamak enyek, Imik Neyung adya perob senewoka dolomla bonaʾ enesoʾ ak beibnulum.

KOLOSE 2:19

Dara, sikda hukuk ara, pe salalmoubnenggulumak. Bok hukuk ab ara, nonga nidyaʾ hiboka, mel-mel ab nolong gwerenaʾ ab dadya, neikaʾ pero welemakaʾ adya, Imik Neyung bedya ak nelemla.

KOLOSE 2:6

Ugunda Kristus Yesus ara, Wenelesilnya aboka seleb dolum anasa, ugunja ululum ara alab neikaʾ kwebdangoka ubgiga balalulum.

KOLOSE 3:20

Wei, memab o, ban nenyek dara, Imik Neyung ara perob senelamla anasa, ugunja nauba nim edya yok-yok yuba nidyaʾ ara, pe keboka unulululum.

KOLOSE 4:5

Ugunda yok nim ek ara, geremsengaʾ perobaʾ adya ok ulululum, anya wen an ubla salek ululanya nera, pe salawoka unulululum.

1 TESALONIKA 2:12

Nunja ugunuk pe unuwolulumaʾ aboka wenewoka, ugunda Imik Neyung ak anyek pe ganya hekel eleklelulumaʾ aboka, dukaʾ lolom-lolom alasub dara, hnonda wenewoka unuwanalum alamouba. Anasa ban leboka Imik Neyung ara alja perob heikek wekoka, alja unulamla ununaʾ era, ugumba unuwolulumaʾ aboka youbsuk.

1 TESALONIKA 4:1

Na kabo nim o, wen sidyaʾ lebdaknesin. Imik Neyung perob senewosululaʾ aboka anaso unulumnulum ara ugunuk nekesub dara, keboka wen unululum. Dara, wenyok Wenelesilnya Yesus si sibuka, sobaʾ nauba so dolulaʾ aboka, onoʾ unul sounululumaʾ aboka, dukaʾ lolom-lolom alasab.

2 TIMOTIUS 2:4

Nimi mala naklenanya bera, alda anam oldalamna salek era, mal gakaʾanya bedya perob senewonulul senewoka yeiriwoka naklamnakanya, alja wa yokaʾ ak ara wel yabenggulumla.

TITUS 3:1

Wenewoka bo usin nang ek hnon, senenggom dub nang ek hnon, pe giboka yuba kelemunukanya, onoʾ perobnya nera, sobaʾ yeng ganya boboka unulululum aboka, anja yuba dolomak nim ek pe wenelesilom.

TITUS 3:14

Nunja nim era, sikja unaʾ ek dara, perobaʾ ak unuwanggubijek aboka, sikja ganya edya anyek desibya bobsibya senelemaknya nera, pe dolonokaʾ aboka, sikda perobnya nenyek unulmorulunokaʾ aboka ella dangalanok.

IBRANI 11:5

Dara Henokh bera alja ganya dib senenaʾ adya, alda somogalyek aboka Imik Neyung adya gamyakaʾ do welewokaʾ adya alda eibnenggubek. Anasa alda anam do welewanggom dara, alda Imik Neyung ak ganya hekellilemok.

IBRANI 13:16

Anya arabdangoka pe ununaʾ ara, ban ununanya nenyek, Imik Neyung ara perob senelamlaʾ anasa, ugunda yok nim eb arabdangoka pe ununaʾ ara hileknenggom mem.

IBRANI 13:21

ugunuk yokaʾ-yokaʾ perobaʾ ak alja senelamlaʾ sunuwoka unulunokaʾ aboka pe munaʾ lelewoka eleklesulul. Anya dara, alja perob senelamlaʾ ara Yesus Kristus pik uboka, nu lomok welesulul. Wera nidyaʾ senenggomaʾ perobaʾ ara al alsamba ok sobaʾ ulmorulul! Aldib, al unululul.

2 PETRUS 1:8

Ban nidyaʾ lebna ganya era, ugunja unuwanasomaʾ ara an. Anasa ban lebna unaʾ ganya en diligaʾ doboka nauba danggiga balasilya dara, nunjaʾ Wenelesilnya Yesus Kristus ak anaba hyak pe ganya olowoka ella danalumaʾ ak dara, ugunda yeiriwoka wa weboka pewanalum.

2 PETRUS 3:18

Nunjaʾ Wenelesilnya uboka, nunjaʾ blebsinaʾ dubnya Yesus Kristus adya perobaʾ eleklesilaʾ hnon, alak ella unaʾ hnon ak dara, nebgiga balalulum. Imik Neyung ak ara alja migib unaʾ emba leboka, wenyek hnon uboka, sobaʾ alak ok giblenok! Amin.

1 YOHANES 3:22

Dara, hnonda alja yub ek pe keboka unuwoka, onoʾ alja pelemak senewoka ganya sangelesilnya nenyek unulumnamabakanya, nunda yokaʾ-yokaʾ alak moloweibyaʾ ara dobnemabaʾ ok ulumla.

1 YOHANES 5:20

Nunda jong ulumla Imik Neyung ek ella ulunokaʾ aboka, Imik Neyung me ara seleb yeiniboka geremsenga seleb elegesukaʾ ara ella ulumab. Wera nunda jong ulumla Imik Neyung eblaboka neikaʾ kwebdangoka ulumab. Dib nong ara, alja me Yesus Kristus ablaboka neikaʾ kwebdangoka ulumab. Wera al benyek, jong ulumla Imik Neyung era an. Dara onoʾ, dib embengaʾ ulmoubnaʾ ara an.

3 YOHANES 1:6

Anja wanaʾ uboka wa bojam welelamaʾ ara, nun an yuba donaʾ nim ek an seleb unulamla aboka laga nekesik. Anda sik balamak pik pe arawoka bo balasilimaʾ anadya, Imik Neyung ganya sangab elegolulaʾ aboka lebna.