ZAKHARIA 9:11 - KITAB NU TUMPU ALLA LELE MA'IMAI'

¹¹ Tumpu notatae hi mian anu palesayamo hi Ia, “Tiba palajanjian anu binaung-Kumo hi belemiu, palajanjian anu sinela'mo nu baso' nu koloban palasombahan, Ku pobebasmo na aha mian da'isan nu belemiu, anu sinansalamo kiijo' i tampat pinomboan aha susumo mian anu kinulungmo i uno nu bubung anu no'otimo.

ZAKHARIA 9:11 ပူးပေါင်းရင်းမြစ်များ

2 SAMUEL 13:13

De obaumo sumo aijo' iya mae na pomposulukanku ohupku? Ka' mule' beleyum suele opopo ambangmo nu mian Israel haha aiya. Sahanyo nu bisalakon hi tomundo' tantu nu situjuimo na aku bau bengkele' nu beleyum.”

2 TAWARIKH 7:17

De beleyum sumo i Daud tuuma nu beleyum, tumuu' mombatuki pongka'oho'-Ku ka' tulu-tulutan hi to atu-atulan-Ku ka' mule' saja' mombau anu Ku palentahkon iwi-iwi' hi beleyum,

AYUB 33:30

da manusia timbali nuposalamat nu Tumpu Allah ka' mombee'i kabilahian i uno nu kantumuu'annyo nu manusia.

MAZMUR 30:3

O Tumpu-ngku, aku notataemo daka-daka' nomoita tulung hi Belento ka' Belento nompo alinmo mae aku.

MAZMUR 40:2

Saban hondo na aku montanda'i bantuan mae nu Tumpu; lantas pinalahatikan-Nyomo mae na aku ka' nompotombihingmo mae anu kinakase'ku.

MAZMUR 69:33

Montoa han aijo' mian anu sinakisamo lame'mo, mian anu monsombah Tumpu bilahimo.

NOSABATMO 24:8

Lantas i Musa nongalamo baso' i mangko' haha aijo' ka' pinipi'akonnyomo hi aha layat. Ia notataemo, “Baso' aiya mompohosonmo palajanjian anu binaumo nu Tumpu tiba belemiu, susumo anu pinalentahkon-Nyomo aijo'.”

YESAYA 24:22

Aha posihukmo hingga-hinggat susumo anu otahanmo i uno nu liang, ka' oposoopmo i uno nu talungku'sampe toka na tempo'nyo obee'imo hukuman na aha.

YESAYA 42:22

Panyo bansa aijo' lapasmo binulingan; aha pinojoongmo i uno nu salipi' anu kaiyong i uno nu tano', ka' pinaha po, isimo i uno nu talungku', Ahamo aijo' na anu pinahabulingmo mae, ka' madi' ko anu tinoka mae nontulungi.

YESAYA 42:7

Da mombuka' mata nu mian anu napisokmo, ka' mule' mompobebasmo mian da bolimo pintung i uno nu talungku'.

YESAYA 49:9

Mian anu tinalungku'mo Ku palentahmo da mosabat; anu daagi' itampat anu pikat Ku boamo itampat anu majingka. Ka' mule' ipuge'nyo anu madi' ko anu montumuu'i, aha madi' kakulangan, tutus jalan daagi ko anu okaan.

YESAYA 51:14

Aha to mia-mian anu ihakopmo sampamo lia-lia' opobebas; aha madi'mo daagi' kakulangan i anu okaan, ka' madi'mo silaka ka' olamun.

YESAYA 58:12

Kota' anu pininmo na na'idek po'ule'mo opotinjo i tampatnyo anu momona. Belemiu osanggohimo ‘Bansa anu po'ule'mo nombau pagan mesen ka' nompokoima'imo to lai-laigan anu i hansunmo.’ ”

YESAYA 61:1

Kuasa nu Tumpu Anu Matangkas na Kuasanyo aiyamo hi belengku; Ia nompile'imo aku ka' nonsaimo aku da momboa lele ma'ima' hi mian anu kasiasi ka' mompa'alin mian anu ihansunmo na kinyonyoanyo; da mombebakon hi mian anu tinahanmo saba' aha malia'mo opobebas, ka' hi to mia-mian i uno nu talungku' saba' aha osabatakonmo.

YEREMIA 38:6

Lantas ingalamo nu aha na aku lantas pinungumo nu aha ka' inguluakonmo nu kahohon na aku i uno nu bubung, bubung aijo' anu i Malkia anak momo'ane i tomundo' anu kiijo' ipopasan nu laigan i tomundo'. Bubung aijo' madi'mo ko ueenyo, olamo henseknyo jadi aku ninsoopmo i hensek aijo'.

DANIEL 2:29

Tempo'nyo Tuanku hau-haunyo hoyo-hoyot, Tuanku nongipimo mongkona apaa na anu jadi aiya mae i ahop. Tumpu na nompoto'imo lahasia iwi-iwi' hi belento Tuanku ka' mule' nompotoamo apaa na anu jadi saidi' mae.

MATIUS 26:28

Kalana aiyamo na baso'-Ku anu mompokododo apaa na anu jinanji'mo nu Tumpu – baso' anu binubusakon bau kapentingan nu mian da'isan da bau pongampuni dosa' nu aha.

MARKUS 14:24

Lapas aijo' i Yesus notatae, “Aiyamo na baso'-Ku anu mompohoson palajanjian nu Tumpu, baso' anu binubusakon bau kapentingan nu mian da'isan.

LUKAS 16:24

‘Tuumangku Abraham!’ loboo' nu mian kaya aijo'. ‘Kalibosi na aku. Pokau mae na i Lazarus molobong bua' nu limanyo i uno nu uee lantas toka mae mohumpisi jila'ku. Tahahumo sansala na aku i uno nu apu aiya!’

LUKAS 22:20

Sumo aitu mule' noko kaan, Ia nombee'mo mangko' nu anggur aijo' hi aha ka' notatae, “Mangko' aiya, salaku pontandai nu Tumpu Allah anu bu'ou anu sinela'mo nu baso'-Ku – baso' anu jinujuhakonmo hi komiu].”

LUKAS 4:18

“Roh nu Tumpu daagi' hi beleng-Ku, kalana Ia nohangkatmo Aku da mompolele Lele Ma'ima' hi mian kasiasi. Ia nompokau Aku da mompoto'iakon opobebasmo na mian anu i hakop ka' kapa'alinan nu mian mapisok; da bau pompobebas mian anu o sansala

1 KORINTUS 11:25

Sumo aitu mule' salatan noko kaan, ingalanyomo na galas nu anggur lantas notatae, “Anggur aiya anu sala'je jinanji'akon nu Tumpu, sinela' nu baso'-Ku. De komiu monginumo aiya, obau na aiya bau ponginau' Aku.”

PO'ULE' INGULIT 5:31

Panyo beleyum, Musa po'ule' pinsusule' mae ka' jojoongmo i aiya tiba Aku; beleyum Ku bee'imo iwi-iwi' na atulan ka' palentang-Ku. Pogulu'akon hi aha, da aha montuluti de tokamo i lipu' anu Ku bee'mo hi aha.’

IBRANI 10:2

Bisuannyo to mia-mian anu monsombah Tumpu aijo' totu-totu'u binelesi'mo i dosa', aha madi'mo daagi' ko pikilan montutugi dosa', ka' koloban madi'mo daagi' osombahkon.

IBRANI 10:29

Palias na koboatnyo na hukuman anu opokona hi mian anu talalomo monguesani Anak nu Tumpu. Mian aijo' monsangka madi' ko angga'nyo na baso' nu palajanjian nu Tumpu, aijo'mo i Kristus sinilaka da mompobelesi' dosa'nyo. Ia madi' mongangga'i Roh anu momombee'i balakat.

IBRANI 13:20

Tumpu mompotumuu'mo Tumpunto i Yesus anu sini-sinilakamo. Kalana Ia sinilakamo, sahingga Ia tempo' uuka tinimbalimo Polaya'to anu Talasanggo aiya hi kita to domba-domba-Nyo. Ia sinilaka aijo' mompaka pompohosonmo palajanjian anu sampe toka sidu-sidutu' anu binaumo nu Tumpu hi kita.

ANU PINOTO'I HI YOHANES 20:3

Lapas mae malaikat aijo' nongalinmo ulo anu daka' hondo aijo' i uno nu keles kapatean, lantas nonggunsingmo keles kapatean aijo' ka' sinegennyomo na ulo anu daka' hondo aijo' da madi'mo daagi' moko ala mongakali to bansa-bansa i uno nu tempo' samadala na taun na kopinnyo aijo'. Lapas aijo', ia opolapasmo ka' tempo'nyo madi'mo pin.