YOSUA 7:24 - KITAB NU TUMPU ALLA LELE MA'IMAI'

²⁴ Lapas aijo' i Yosua tiba iwi-iwi' aha mian nu Israel nohakopmo i Akhan, ka' nomboa i Bangka'nyo Kasusa'an tiba iwi-iwi' na to anak-anaknyo, potu'onnyo sapi', keledai, domba, kemah ka' iwi-iwi' na anunyo tiba salaka, jubah ka' mosoni' anu tinomangnyo.

YOSUA 7:24 ပူးပေါင်းရင်းမြစ်များ

KAJADIAN 18:25

Boli to mia-mian anu madi' ko sala'nyo aijo' opateimo hingga-hinggat tiba anu ko sala'nyo. Boli Tumpu! Kalana de obau nu Belento Tumpu, mian anu madi' ko sala'nyo tantu o hukumo hingga-hinggat tiba anu ko sala'nyo. Te toho mule' mian kopian nu songko-songko na dunia momputusi madi' adin!”

AYUB 20:15

Halata' anu tinomangnyo ka' i lonyomnyomo madi' ka' madi' tantu nu lua'akonmo; Tumpu Allah na monsabatakon lengkat i uno nu kompongnyo.

NOSABATMO 20:5

Boli monsombah patong anu sumo aijo' kalana Akumo na Tumpu Allah nu belemiu, ka' Aku madi' mongka'oho' opokakanakon tiba maumo pa' apaa. To mia-mian anu mongka'ideki Aku, Ku hukum toka-toka i lee' ko totolu'nyo ka' ko opatnyo.

AMSAL 15:27

Ihe na molio ka'untungan anu madi' halala' mompateimo posi auannyo; panyo ihe na mongka'ideki doi anu bau ponsogo' saidi' mae kantumuu'annyo sanang.

ANU MOMPOLELE POTATAE NU TUMPU 5:13

Panyo halata' aijo' ningkotmo kalana kasusa'an sahingga madi'mo daagi ko anu i nguna'akon hi to ana-anaknyo.

YESAYA 65:10

Mian anu palesayamo hi beleng-Ku monsombahmo Aku; domba ka' sapi' nu aha mongototmo hemput i Hatanyo nu Saron ka' i Bangka'nyo nu Akhor.

HOSEA 2:15

Iwi-iwi' na ale' nu anggurnyo Ku sule'akonje hi ia, ka' Bangka'nyo nu Kasusa'an Ku pojadimo tumban anu otaha'imani. Ikiijo' mae ia montalimamo Aku susumo tempo'nyo daagi' olitau, tempo'nyo ia sala'je no sabat mae lengkat i Mesir.

YOSUA 15:7

lapas aijo' i lau-lausmo nokiijo' i Bangka'nyo Kasusa'an toka-toka i Debir, lantas nosele mule' mompanjolongi utara mongahopimo Gilgal i tampat anu mompaha ahop tiba sohipi' nu bungkutnyo anu kiijo' mae i Adumin sasu selatan bangka'nyo aijo'. Lengkat ikiijo' i lau-laus mule' i mata nu uee En-Semes, lantas nokiijo'mo i En-Rogel,

YOSUA 22:20

Sabole-bole o inau' na i Akhan anak i Zerah madi'mo nongka'oho' nombatuki palentah nu Tumpu mongkona bala-balang anu tionyo ahi' o idei ka' apaa na kina'ahenannyo. Iwi-iwi' na mian nu Israel i hukum! Anu binaladosa' ola i Akhan, panyo anu sinilaka misa' ola ia!”

YOSUA 6:18

Madi' timbali mongala maumo pa' apaa panyo iwi-iwi' aijo' tionyo ahi' ohopu'i. De belemiu mongala saba' kemah nu mian Israel nutokaimo nu balaa' kapatean.

YOSUA 6:21

Iwi-iwi' na anu i kota aijo', mian anu motu'amo kabai mian anu daagi' anak, boune kabai mo'ane pinahantabasakonmo nu bajak sahingga natemo. Iwi-iwi' na potu'on sapi', domba ka' suele keledai pinateanmo.

YOSUA 7:1

Tumpu nompalentahmo aha mian nu Israel da iwi-iwi' na anu kiijo' i kota Yerikho, tionyo ahi' ohopu'imo iwi-iwi', maumo ola sa'angu' madi' timbali o ala. Panyo palentah aijo' madi' tinulutan nu aha. Samian na mo'ane sanggonyo i Akhan madi'mo nompajuli palentah aijo', sahingga Tumpu talalomo hondo nontambuha'i aha mian nu Israel. (Tuumanyo i Akhan sanggonyo i Karmi ka' utusnyo tu'a sanggonyo i Zabdi minsoop tompukan i Zerah tulunan mae nu bansa Yehuda.)

YOSUA 7:23

Ingala nu aha na balang haha aijo' ka' binoanyomo hi Yosua ka' hi mian nu Israel iwi-iwi'. Lantas balang haha aijo' pinotimpasmo i ahop nu Tumpu.

YOSUA 7:26

Lapas aijo' tinabuhanmo nu aha nu batu jonjoo' na tampat aijo' sampe sinaa aiya daagi' ko anu ikiijo'. Mokonyo aijo' tampat kiijo' daagi' osanggohi Bangka'nyo nu Kasusa'an. Sahingga Tumpu madi'mo notambuha'.