YOSUA 7:15 - KITAB NU TUMPU ALLA LELE MA'IMAI'

¹⁵ Lantas mian anu tinuminjo ka' sinumbu'mo nompo'una' to bala-balang anu madi' timbali o ala aijo' ia tionyo ahi' opapui hingga-hinggat tiba aha sangauwan tiba iwi-iwi' na anu nu aha; kalana iamo na anu madi' nompajuli palajanjian ka' nombaumo anu ma'idek hondo i uno nu aha mian nu Israel.”

YOSUA 7:15 ပူးပေါင်းရင်းမြစ်များ

KAJADIAN 34:7

Tempo'nyo aitu to ana-anak i Yakub ninsusule'mo mae lengkat i tampat padang bola. Nohongo han anu jinadimo aijo', aha tinolokengkengmo ka' na'idekanmo hondo na kinyonyoa nu aha. Kalana nompasala'mo anak i Yakub aijo', alati'nyo i Sikhem nongambangimo iwi-iwi' na mian nu Israel.

2 SAMUEL 13:13

De obaumo sumo aijo' iya mae na pomposulukanku ohupku? Ka' mule' beleyum suele opopo ambangmo nu mian Israel haha aiya. Sahanyo nu bisalakon hi tomundo' tantu nu situjuimo na aku bau bengkele' nu beleyum.”

YOSUA 7:11

Mian nu Israel nombaumo dosa'. Pinalentang-Kumo na aha da montuluti totu-totu'u Palajanjian-Ku hi aha, panyo aha madi' nompajuli! To bala-balang anu tionyo ahi' ohopu'i ingalamo nu aha. Tinomangmo nu aha ka' pinosulukmo nu aha i uno nu to bala-balang nu aha da madi' osumbu-sumbu'.

YOSUA 7:16

Dodododopnyo subu-subu hondo, i Yosua nompokaumo aha mian nu Israel toka mae toto sa'angu' na tulunan nu bansa. Jadi kinona hi tulunan nu bansa Yehuda.

TO MIA-MIAN KOPIAN 20:10

Aha sampulu' na bahagian na to momo'ane nu Israel iwi-iwi', sambahagian na momposadia anu okaan nu aha anu mamba mahampate. Ka' sangga'at na mamba montumbuhi Gibea da o hukum na aha kalana nombaumo anu ma'idek hi aha mian nu Israel.”

TO MIA-MIAN KOPIAN 20:5

Lantas to mia-mian nu Gibea tinokamo pihi-pihi molio aku. Aha tinokamo mae nontumbuhi laigan anu kinasonso'anku kahanda' mompateimo aku, ka' nompasala'mo ambahue'ku sampe i nate.

TO MIA-MIAN KOPIAN 20:6

Sahingga ingalangkumo na bangke'nyo ka' pinado-padotkumo na ia, lapas aijo' pinakatungkumo hi sampulu' ka' ohua' na tulunan nu bansanto toto sa'angu, sampadot. Binaungku na aijo' kalana mian nu Gibea haha aijo' nombaumo anu ma'idek ka' nongambangimo mian nu Israel.

1 SAMUEL 26:21

Tinaaman i Saul, “Aku nombaumo kasala'an pinsusule'mo Daud, Anaku! Aku madi'mo daagi mombau anu ma'idek hi beleyum kalana beleyum nohalala'akonmo aku sinampahu na utu. Kalakuanku memang pinonga'mo. Aku totu-totu'u sinala'mo!”