YOSUA 6:4 - KITAB NU TUMPU ALLA LELE MA'IMAI'

⁴ Aha popitu' na mian, toto samian momboa tolompet, tionyo ahi' lumajang mamba momona lapas nutuntunije nu Peti' Palajanjian. I sinaa anu ko ipitunnyo beleyum ka' suludadu nu beleyum tionyo ahi' montikubimo kota aijo' pimpitun na sunsum ka' to ima-imam mompuhimo tolompetnyo.

YOSUA 6:4 ပူးပေါင်းရင်းမြစ်များ

KAJADIAN 2:3

Lantas binalakatan-Nyomo na sinaa ko popitu'nyo aijo' ka' pinotimbali-Nyomo sinaa anu susi', kalana i sinaa aijo' Tumpu Allah nilawemo, salatan iningkotmo na kalaja-Nyo.

1 TOMU-TOMUNDO' 18:43

Lantas pinoto'inyomo hi posaihonnyo, “Pindakomo pokiita' i bungkutnyo ka' tanggalakon sasu mokaiyong i ambai.” Posaihonnyo aijo' nindakoomo lapas aijo' po'ule'mo ninsusule' mae ka' pinoto'inyo, “Madi' ko apa-apaa anu tinoangku.” Sape pinimpitun na i Elia nonsai posaihonnyo lewa' nopule' nindako nokiita' nontanggalakon.

2 TOMU-TOMUNDO' 5:10

I Elisa nonsaimo samian na posaihonnyo da mompoto'i sumo uuka hi Naaman, “Lako' na belento Tuan mindi' pimpitun i kaunyo Yordan sahingga belento Tuan ma'alinmo totu-totu'u.”

2 TOMU-TOMUNDO' 5:14

Kalana aijo' nambamo na i Naaman i kaunyo Yordan lantas lako'mo nongkiobakon butongnyo i kaunyo aijo' pinimpitun susumo anu pinokaumo i Elisa. Sahingga na'alinmo na i Naaman. Butongnyo po'ule'mo na'ima' susumo butong nu olitau.

2 TAWARIKH 13:12

Kapala mami Tumpu Allah ka' to ima-imam-Nyo aiya hi kami. Ka' aha nosadiamo mompuhi tolompet bau pontanda'i, kami montumbuhimo belemiu. O belemiu mian nu Israel, boli panggaga hi Tumpu, Tumpu Allah nu mompolee' miu! Komiu madi' untung na mahampate!”

2 TAWARIKH 20:17

Belemiu madi' palalu mahampate na mongewa aha saidi' mae. Lako'mo i tampat anu pinotiju'mo hi belemiu ka' tanda'imo i kiijo'. Otoamo nu belemiu na Tumpu mombee'imo ka'untungan mahampate hi belemiu. O mian anu jojoong i Yehuda ka' i Yerusalem, boli bata-bata kabai mabuhuk. Ahoppimo na pahampatean aijo', nutulungimo nu Tumpu na belemiu!”

2 TAWARIKH 20:19

Lantas to mia-miannu Lewi aha mae sa'anakan i Kehat, ka' i Korah, tinuminjomo, lewa'mo nontaligalai nompuji' Tumpu, Tumpu Allah Israel.

2 TAWARIKH 20:21

Noko lapas na binasale' tiba mian da'isan, pinoto'imo i tomundo na to mia-mian anu manyanyi da mompusokmo baju' anu pokakana na buhitnyo anu saja' opusok de ko apa-apaa obau anu samata-mata ulusan nu agama. Mian anu manyanyi haha aijo' tionyo ahi tuminjo mojiji' ima-ima' i ahop nu jiji'an nu suludadu ka' manyanyi, “O puji' na Tumpu! Kalibosannyo sampe toka sidu-sidutu' madi' ko kamingkotannyo!”

AYUB 42:8

Jadi, uuka aiya alamae na sapi' lakinyo popitu', ka' domba lakinyo popitu', ka' lambamo hi Ayub. Lantas sombahkonmo na aijo' iwi-iwi' salaku koloban anu opotunu bau pongampuni belemiu. Nudoa'akonje i Ayub na belemiu ka' do'anyo Ku talimaje. Belemiu madi'mo Ku ambangi, maumo sabenannyo belemiu pantasmo na mohumpak hukuman. Belemiu madi' nompoto'i anu sahondo-hondonyo mongkona butong-Ku, padahan i Ayub na nontaloakonmo ahi'.”

YESAYA 27:13

Tempo'nyo aijo' opo onyi'mo na tolompet daka-daka' bau polaga mule' da minsusule'mo mae na aha mian nu Israel anu binoamo i Asyur tiba i Mesir. Aha tokamo mae i Yerusalem da monsombahmo Tumpu aita' i puge'-Nyo anu susi'.

IMAMAT 14:16

Lapas aijo' nu lobongakonmo na kangkam nu limanyo koanan i lanya' ka' mompipi'akonmo pimpitun i uno nu Kemah nu Tumpu.

IMAMAT 4:6

Lantas ia tionyo ahi' molobongakon kangkam nu limanyo i baso' aijo' ka' mompipi'akon pimpitun i ahop nu lalanse' anu mongoloti Salipi' Susi'.

ZAKHARIA 4:2

Pinokilawanyo mae, “Apaa na anu tinoamo nu beleyum?” “Sa'angu' na sulaan nu sulu' mosoni' na tinutuk,” na koongku. “Aita mae i pupusnyo daagi' ko tampat bau pongisian lanya', ka' anu montikubi popitu' na sulu' ka' toto sa'angu' ko tampat bau pompokonan sumbunyo.

ZAKHARIA 4:6

Malaekat aijo' nonsaimo aku da mamba mompotokakon hi Zerubabel potuunon nu Tumpu sumo uuka, “Misa' kalana kahosonan nu suludadu ka' mule' misa' posi kahosonan nu beleyum sahingga binala hasinmo, panyo ola ahi' kalana roh-Ku.

NOMBILANGMO 23:1

Notatae na i Bileam hi Balak, “Baui mae na aku i tampat aiya popitu' na mezbah, ka' posadia popitu' na sapi' lakinyo ka' popitu' na domba lakinyo i aiya.”

YOSUA 6:3

Beleyum ka' suludadu nu beleyum tionyo ahi' mojiji ka' lumajang montikubi kota aijo' sansinaa obau minsan, ka' obau anon sinaa.

YOSUA 6:5

Lapas aijo' to ima-imam mompuhimo tolompetnyo ka' opomantanmo na mompuhi. Salatan beleyum mohongomo onyi'nyo anu pinomantanmo aijo' iwi-iwi' na suludadu aijo' lewa'mo molo'ais daka-daka', sahingga pagan mesen haha aijo' i kota; mohobo'mo. Lantas belemiu iwi-iwi' tionyo ahi' mompinsoopimo kota aijo'.”

ANU PINOTO'I HI YOHANES 1:20

Aiyamo na lahasia nu popitu' na mandala' anu tinoamo nu beleyum i limang-Ku koanan, ka' i popitu' na tengke nu sulu' mosoni' aijo': Popitu' na mandala' aijo' atina'mo na to mala-malaikat i popitu' na jama'at aijo', ka' popitu' na tengke nu sulu' aijo' atina'mo na jama'at anu popitu' aijo'.”

ANU PINOTO'I HI YOHANES 1:4

To utu-utus anu i jama'at popitu' i da'erah Asia! Aku, i Yohanes montaha'imani komiu da nubee'i balakat ka' ka'ima'an lengkat mae hi Tumpu – aitumo Ia anu polo-polo'mo daagi', anu daagi'mo, ka' anu sidu-sidutu' sabole-bole daagi' – ka' suele lengkat mae hi popitu' na roh anu daagi' i ahop nu kasuhangan nu Tumpu,

ANU PINOTO'I HI YOHANES 10:3

Lantas ia noloboo'mo daka-daka' sumo to singa-singa nolohuu'mo. Ilapas na malaikat aijo' noloboo', popitu' na gohung nontaami mae anu onyi'nyo dolu-dolundungan.

ANU PINOTO'I HI YOHANES 15:1

Lapas aijo' aku nontoamo aita' i langit anu okabangangi ka' anu opalias hondo madi' ko gampanyo. Daagi' ko malaikat aha popitu' tiba balaa' anu toka mae i mihinyo. Aiyamo na kamingkotannyo na Tumpu nombee' mae tambuha'-Nyo.

ANU PINOTO'I HI YOHANES 15:7

Lapas aijo' sala'sa'angu' na malaikat hi anu opat aijo' nombee'mo hi popitu' na malaikat aijo', popitu' na tampat mosoni' na binau anu pinobuke'anmo nu pusa nu Tumpu – Tumpu anu tumuu' sampe toka sidu-sidutu'.

ANU PINOTO'I HI YOHANES 16:1

Lantas aku nohongo potatae anu daka' lengkat mae i Laigan nu Tumpu potatae hi malaikat anu popi-popitu' aijo', “Lako'mo bubusakon na isi nu popitu' na tampat pinongisian tambuha' nu Tumpu aijo' i bawo nu dunia!”

ANU PINOTO'I HI YOHANES 5:1

Lapas aijo' aku nontoamo sa'angu' na lulunan nu kitab i lima-Nyo anu suha-suhang i kasuhangan aijo'. Kitab aijo' kaho tulisan poti-potimbiha' ka' pinonsap popitu' na segen.

ANU PINOTO'I HI YOHANES 5:6

Lapas aijo', aku nontoa sa'angu' na Anak nu Domba tinuminjo aijo' i totonga' nu kasuhangan aijo', tinikubanmo nu malaikat opat ka' iwi-iwi' na to pola-polaya' haha aijo'. Anak nu Domba aijo', otoa sumo anu kinolotmo. Ia ko tanduknyo popitu' ka' popitu' na matanyo: Aijo'mo popitu' na Roh lengkat mae hi Tumpu anu sinaimo mae mamba i songko-songko na dunia.

ANU PINOTO'I HI YOHANES 8:2

Lantas aku nontoa malaikat ko popitu'nyo tinuminjomo i ahop nu Tumpu, ka' aha binee'anmo popitu' na tolompet.

ANU PINOTO'I HI YOHANES 8:6

Lapas aijo', popitu' na malaikat anu montoongi popitu' na tolompet aijo' kahanda'mo da mompuuhimo.