Belemiu madi' ko sia-sia' na mamba, ka' misa' susumo mian anu mompalaimo. Kalana Tumpu na montaka belemiu; Tumpu Israel na monjagai belemiu maumo pa' iya mae na tampat.
Lapas aijo' belemiu notaapmo i Kaunyo nu Yordan, ka' tinokamo i Yerikho. Aha mian nu Yerikho nompahampateakonmo belemiu sumo aitu mule' na aha mian nu Amori, mian nu Feris, Kana'an, Het, Girgasi, Hewi tiba mian nu Yebus. Panyo belemiu pino'untung-Kumo na nahampate nongewa aha iwi-iwi'.
Uuka aiya palentahmo na to ima-imam anu molemban Peti' Palajanjian aijo', da salatan tokamo na aha i kaunyo aha lumolongmo i kaunyo aijo' ka' tuminjo koko sonibinyo.”
To ima-imam haha aijo' tataap satinjonyo i totonga' nu Yordan sampe mian haha aijo' noko baumo iwi-iwi' anu pinalentahkonmo nu Tumpu hi aha susumo anu pinoto'i-Nyomo hi Yosua. Aijo' pokakana sumo anu pinotiju'mo i Musa hi Yosua. Lantas sampamo na aha mian nu Israel notaap i Kaunyo nu Yordan.
Susumo anu pinalentahkonmo i Musa, to sulu-suludadu nu tulunan bansa Ruben, Gad ka' sambahagian na tulunan nu bansa Manasye nambamo momona notaap kaunyo.