YOSUA 24:25 - KITAB NU TUMPU ALLA LELE MA'IMAI'

²⁵ Sahingga i sinaa aijo' kiijo' i Sikhem i Yosua nombaumo palajanjian tiba aha mian nu Israel; ka' ikiijo' na ia nompoto'imo hi aha atulan haha aijo' tiba palentah-palentah anu tionyo ahi' otuluti nu aha.

YOSUA 24:25 ပူးပေါင်းရင်းမြစ်များ

KAJADIAN 35:4

Lantas binee'mo nu aha hi Yakub iwi-iwi' na patong nu pilogot anu lengkat mae i salipu'an anu daagi' hi aha ka' anti-anting nu aha. Iwi-iwi' na balang haha aijo' i lamunmo i Yakub i patu nu kau' daka' koko kota nu Sikhem.

2 TOMU-TOMUNDO' 11:17

I Imam Yoyada nonsaimo i Tomundo' Yoas ka' mian da'isan da mombau palajanjian hi Tumpu kalana aha mongka'oho'mo timbali mian anu palesayamo hi Tumpu. Ka' ia mule' nonsaimo i tomundo' mombau palajanjian hi mian da'isan.

2 TAWARIKH 15:12

Aha binalajanji'mo hi Tumpu, koonyo nu aha, aha totu-totu'u mo na kinyonyoa tumuu' mombatuki pongka'oho' nu Tumpu. Tumpu Allah nu mompolee' nu aha.

2 TAWARIKH 15:15

Iwi-iwi' na aha mian da'isan Yehuda ilame'mo kalana aha binasumpa'mo totu-totu'u na kinyonyoa. Sinanangmo na aha monsombah Tumpu, ka' Tumpu mule' nontalimamo aha. Pino'ima'-Nyomo na ka'ada'an sahingga madi'mo ko anu lewa' mae mompoposia i da'erah nu aha.

2 TAWARIKH 23:16

I imam Yoyada nonsale'imo i Tomundo Yoas tiba mian da'isan hingga-hinggat suele tiba ia da balajanji'mo tukoonyo aha, aha timbalimo mian anu palesayamo hi Tumpu.

2 TAWARIKH 29:10

Uuka aiya aku kahanda'mo mombau palajanjian tiba Tumpu, Tumpu Allah nu Israel, da Ia madi'mo montambuha'i kita.

NEHEMIA 9:38

Kalana hahan anu jinadimo aijo', kami mian da'isan aha Israel nombaumo palajanjian totu-totu'u ka' mule' palajanjian aijo' tinulismo ka' sinapmo nu aha to pola-polaya' mami, to mia-mian nu aha Lewi ka' samian na imam mami.

NOSABATMO 15:25

I Musa binala do'amo totu-totu'u hi Tumpu, lantas pinotiju'mo nu Tumpu sangkolong na kau' hi ia. Kau' aijo' i lumbu'akonmo i Musa nokiijo' i uee, lantas uee aijo' natawasmo, sahingga timbalimo o inum. I tampat aijo' Tumpu nombee'imo atulan-atulan hi aha ka' ikiijo'mo suele na Ia nonsobai aha.

NOSABATMO 24:3

Lantas i Musa nambamo ka' nombebakonmo hi bansa aijo' iwi-iwi' na palentah ka' atulan nu Tumpu. Aha iwi-iwi' nontaami hingga-hinggat, “Obaumo mami iwi-iwi' na anu tinaloakonmo nu Tumpu.”

PO'ULE' INGULIT 29:1

Aiyamo na anu pinoto'i i uno nu palajanjian, ka' anu pinalentahkonmo nu Tumpu, ka' binaumo i Musa hi bansa Israel tempo'nyo kiijo' mae i tano' nu Moab. Palajanjian aijo' salaku bau pontuangi palajanjian anu binaumo nu Tumpu tiba aha i Bungkutnyo nu Sinai.

YOSUA 24:1

I Yosua nomposihukmo iwi-iwi' aha tulunan nu bansa Israel kiijo' i Sikhem, lantas nompokaumo to tu'a-tu'anyo, to pola-polaya', mian kopian ka' to sulu-suludadu anu matangkas na pangkatnyo da toka mae mangadap. Sahingga tinokamo na aha nangadap hi Tumpu Allah.

YOSUA 24:26

Iwi-iwi' na atulan tiba iwi-iwi' na palentah-palentah haha aijo' tinulismo i uno nu kitab Atulan nu Tumpu Allah. Lapas aijo' ia nongalamo sa'angu' na batu anu daka', lantas pinotinjonyomo i patu nu kau' anu daka' i tampat bau ponsomban Tumpu.