YOSUA 22:11 - KITAB NU TUMPU ALLA LELE MA'IMAI'

^11-12 Aha mian nu Israel sangga'at nohongomo hi bubuu' bansa nu aha notatae, “Aha mian tulunan nu bansa Ruben, Gad tiba tulunan nu bansa Manasye anu i sasu kabete'an kiijo' mae i Kaunyo nu Yordan nompotinjomo sa'angu' na mezbah kiijo' i Gelilot koko Kaunyo nu Yordan panyo daagi' ninsoop da'erah-nto!” Sahingga aha iwi-iwi' sinihukmo i Silo kahanda'mo mamba mompahampateakon tulunan nu bansa Israel haha aijo' anu i sasu kabete'an kiijo' mae i Kaunyo nu Yordan.

YOSUA 22:11 ပူးပေါင်းရင်းမြစ်များ

YOHANES 1:28

Iwi-iwi' aijo' tinimbali i Betania, sasu kabete'an nu Kaunyo Yordan tampat i Yohanes nompalamandikan.

YOHANES 20:1

Subu-subu i sinaa nu duminggu daagi' pintung, i Maria Magdalena namba i pinolamunan. Tinoanyo na batu pinongkulubi tinondedensu'mo lengkat i bolo' nu pinolamunan aijo'.

YOHANES 20:12

Lantas nontoa ua'aha na malaikat nibaju' mopute'. Aha aijo' sinumuhang i tampat anu pinonguna'an bangke' i Yesus samian sasu ubak, ka' sangga'atnyo i sasu tengke.

PO'ULE' INGULIT 12:11

Lapas aijo' Tumpu Allah nu belemiu mompile'imo sa'angu' na tampat da tionyo ahi' ponsomban Ia. Ikiijo' na tionyo ahi' kalambanan nu belemiu momboa iwi-iwi' apaa na anu pinalentahkonmo, aijo'mo koloban anu opotunu ka' to kolo-koloban sangga'at, palasombahan sambagian anu o ala i anu sampulu' na bagian ka' palasombahan bau samata-mata bagi nu Tumpu anu jinanji'mo miu.

YOSUA 2:7

Sahingga nambamo na aha anu sinai i tomundo aijo' nompala'i kota. Salatan aha tinokamo i sambiha'nyo, sabatan daka' nu kota tinumbanmo. Aha noliomo ua'aha na mian anu namba mae nondoyoni aijo' anu montoa pa' mosia na kota aijo', tinoka-toka i tampat potaapan Kaunyo nu Yordan.

YOSUA 22:10

Salatan tulunan nu bansa Ruben, Gad tiba tulunan nu bansa Manasye anu i sasu kabete'an nu Yordan aijo' tinokamo i Gelilot – panyo daagi' i sasu kinsoban Kaunyo nu Yordan – aha nompotinjomo sa'angu' na mezbah anu daka' ka' anu ma'ima' hondo koko kaunyo.

YOSUA 22:16

Lantas aha nompoto'imo pongka'oho' nu mian iwi-iwi' anu pinalesayamo hi Tumpu, koonyo nu aha hi to mia-mian tulunan nu bansa Ruben, Gad tiba tulunan nu bansa Manasye, “Kadaka' belemiu nombaumo kalakuan anu ma'idek aiya hi Tumpu Allah Israel? Kalana belemiu nosi potinjomo mezbah, belemiu madi'mo mohongo-hongo Tumpu! Belemiu madi'mo nontuluti palentah-Nyo!

YOSUA 22:19

De da'erah nu belemiu aijo' mahumimi'mo ka' madi'mo pantas pombauan tampat ponsomban Tumpu, lalinmo mae mo'uuka i da'erah nu Tumpu, anu ko Kemahnyo nu Tumpu. Poita mae na sambahagian da'erah mami, asan boli panggaga hi palentah nu Tumpu kabai madi'mo mohongo-hongo kami ka' montuangimo mule' sa'angu' na mezbah sangga'at, yo aitu ko mezbahmo na kita nu Tumpu Allah.

TO MIA-MIAN KOPIAN 12:5

Mian nu Gilead haha aijo' anu nahampatemo nonjojoongimo iwi-iwi' na tampat potaapan i Kaunyo nu Yordan da timbali mongampang to mia-mian nu Efraim anu kahanda'mo malai. Daagi' kino samian na mian nu Efraim, anu kahanda'mo malai, nomoita da motaap, mian nu Gilead nompokilawa hi ia, “Beleyum mian nu Efraim?” De tinaamannyo, “Misa',”