YOSUA 21:9 - KITAB NU TUMPU ALLA LELE MA'IMAI'

^9-19 Lengkat mae hi lee' i Kehat anu ninsoop tulunan mae nu bansa Lewi, to ima-imamo lee' mae i Harun na anu momona nohumpak kota'nyo: aha binee'an sampulu' ka' totolu' na kota tibamo tano' anu ko padangnyo. Lengkat mae hi tulunan nu bansa Yehuda ka' i Simeon, aha nohumpak osio' na kota, aijo'mo: Libna, Yetir, Estemoa, Holon, Debir, Ain, Yuta, Bet-Semes tiba Arba, anu sinanggohan susumo sanggo nu tuumanyo i Enak. Kota aijo', tempo' uuka sinanggohanmo Hebron sa'angu' na kota palaihan i bungkutnyo nu Yehuda. Iwi-iwi' na ale' ka' to kampu-kampung anu ninsoopmo i kota aijo' binee'mo hi Kaleb anak i Yefune da tano' aijo' timbalimo anunyo. Lengkat mae hi tulunan nu bansa Benyamin nohumpak opat na kota aijo'mo: Gibeon, Geba, Anatot tiba Almon.

YOSUA 21:9 ပူးပေါင်းရင်းမြစ်များ

1 TAWARIKH 6:39

I Asaf kapala u anu manyanyi gombuannyo nu anu ko ohua'nyo. Tatu-tatusannyo nu tundulan nu aha, o tundun sule-sule' sampe tinoka hi Lewi aijo'mo: i Asaf, i Berekya, i Simea,

1 TAWARIKH 6:65

To kampu-kampung, anu i da'erah tulunan nu bansa Yehuda, Simeon ka' i Benyamin anu pinaha sanggomo aijo' suele ingundiakon nanombagi.

2 TAWARIKH 31:15

I to kota'-kota' sangga'at anu kajojoongan nu to ima-imam, i Kore nu tulungi nu to mia-mian nu Lewi sangga'at aijo'mo: i Eden, i Minyamin, i Yesua, i Semaya, i Amarya, tiba i Sekhanya. Balang anu o kaan aijo' obagi pokakana hi aha bubuu' tulunan nu aha bansa Lewi, mau anu langkai'mo kabai anu daagi' Olitau otoa i kalaja anu nubau nu aha ka' otoa i gombuan nu aha.

YOSUA 21:4

Anu momona nohumpak kota'nyo aijo'mo to utu-utus lee' mae i Kehat anu ninsoop tulunan mae nu bansa Lewi. To utu-utus lee' mae i Imam Harun binee'an sampulu' ka' totolu' na kota anu ingala i da'erah tulunan mae nu bansa Yehuda, Simeon ka' Benyamin.

YOSUA 21:8

Sumo aijo' na aha mian nu Israel nombagi kota-kota anu sinanggomo aijo' tibamo tano'nyo iwi-iwi' anu ko padangnyo; nombagi aijo' binauakon onde hi aha mian nu Lewi susumo anu pinalentahkonmo nu Tumpu hi Musa.