YOSUA 1:9 - KITAB NU TUMPU ALLA LELE MA'IMAI'

⁹ O inau', Aku nompalentahmo beleyum da beleyum totu-totu'u na kinyonyoa ka' baani! Boli beleyum mabuhuk kabai hente na kinyonyoa, kalana Aku na Tumpu Allah nu beleyum saja' monsangalui beleyum maumo pa' moya na kalambanan nu beleyum.”

YOSUA 1:9 ပူးပေါင်းရင်းမြစ်များ

KAJADIAN 28:15

O inau' Ku tulungi ka' Ku jagai na beleyum, mau mule' pa' moya na beleyum ka' po'ule' Ku boa mae na beleyum i lipu' aiya. Madi' Ku pala'i na beleyum, sampe toka i tempo'nyo de apaa na anu jinanji'-Kumo hi beleyum, Ku baumo iwi-iwi'.”

KAJADIAN 39:2

Tumpu nontulungimo i Yusuf sahingga saja' mingkaliangan na anu nu kalaja iwi-iwi'. Ia jinojoongmo i laigan nu tuannyo, mian nu Mesir aijo'.

KAJADIAN 39:3

Tuannyo nontoa taalu' Tumpu montulungi i Yusuf, ka' kalana aijo' apaa na anu nu bau i Yusuf, iwi-iwi' saja' mingkaliangan ma'i-ma'ima'.

2 SAMUEL 13:28

To posa-posaihonnyo pinalentahnyomo, “Otoa ima-ima' de i Amnon malangumo kalana nonginumo anggur, ku bee'ije tanda lantas pateimo na ia. Boli mabuhuk, Aku na montanggung han aijo'. Babaani ka' boli bata-bata!”

1 TAWARIKH 28:20

Lapas aijo' i Tomundo' Daud notatae mule' hi Salomo anaknyo momo'ane, “Beleyum tionyo ahi' totu-totu'u na kinyonyoa ka' baani. Tampuunimo na kalaja ka' boli bata-bata maumo pa'apaa na o ahopi. Tumpu Allah anu ku ku sombah na montulungi beleyum. Ia madi' mompojohok beleyum. Ia saja' montoa kapalaluan nu beleyum sahingga iwi-iwi' na kalaja aijo' timbalimo, ka' madi'mo ko anu obau.

2 TAWARIKH 15:7

Panyo belemiu tionyo ahi' saban na kinyonyoa ka' baani ahi'. Apaa na anu nu usahakon aijo' mingkaliangan.”

MAZMUR 46:7

Tumpu notataemo mae susumo gohung na onyi'nyo, sahingga tano' nohintutumo; to bansa-bansa kinalangkabutmo, to kara-karaja'an nahungku'mo.

YESAYA 41:10

Boli mabuhuk kalana Aku na monsangalui beleyum, boli baat-bata, kalana Aku na Tumpu nu beleyum. Beleyum Ku pokododomo ka' Ku tulungimo, Ku taka'mo nu limang-Ku anu timbali otaha'imani.

YESAYA 43:1

O, Israel sumo uuka na koonyo nu Tumpu, “Akumo na nompotimbali ka' nontali'mo beleyum, boli mabuhuk, beleyum memang Ku posalamatmo! Aku nolagamo beleyum sinanggo na sanggo nu beleyum, beleyum Akumo na tumpu-Nyo.

YESAYA 43:5

Boli mabuhuk, kalana Ku jagaimo na beleyum. Lengkat mae ikinsoban tiba lengkat mae ikabete'an. Ku palentahmo mae na mompolee' nu beleyum da tokamo mae sihuk.

YESAYA 8:12

“Boli monsangka posa'angu'an anu kokoonyo nu sangka'an nu aha posa'angu'an, ka' mule' boli okabuhuk na hahan anu nu kabuhuk nu aha.

DANIEL 10:19

Ia notatae, “Tumpu mongkalibosi beleyum kalana aijo' boli bata-bata kabai mabuhuk, donganmo pahoson!” Hau-haunyo ia nontaloakon han aijo' ingoa'anku nompaka pahosonmo mule' ka' notataemo, “Soba potataemo mae o, Tumpu, belento Tuan nompaka tuangimo mae kahosonanku.”

HAGAI 2:4

Maumo sumo aijo' boli ahi' hente na kinyonyoa nu belemiu iwi-iwi'! Lausakonmo na kalaja aijo' kalana Aku tataap montulungi belemiu.

HAGAI 2:5

Salatanmo belemiu nosabatmo mae lengkat i Mesir Aku binalajanji'mo saja' monjagai belemiu. Jadi boli belemiu bata-bata.

SISIKON NU TO RASUL-RASUL 4:19

Panyo i Petrus ka' i Yohanes nontaami, “Posi tutugimo apaa na anu totu'u i ahop nu Tumpu: mombatuki palentah nu to Tutuuma kabai mombatuki palentah nu Tumpu.

PO'ULE' INGULIT 1:21

Belengku notatae: Uka komiu timokamo i da'erah bungkut nu mian Amori, tano anu bine'mo hi kita i Tumpu-Allahnto ka Allah mompole'to. Toa i ahop miu tala-tala na tano' aijo. Lako'mo patundui susumo anu pinalentah nu Tumpu. Bolimo bata-bata kabai mabuhuk.

PO'ULE' INGULIT 20:1

“De belemiu mambamo mahampate mongewamo sampobali' nu belemiu, boli mabuhuk na montoa kareta anu nupake mae nu aha mahampate ka' ajahan nu aha manjoo' ka' suludadu nu aha anu konjoo'nyo molingkuduimo konjoo'nyo nu belemiu. Tumpu Allah nu belemiu anu nompobebasmo belemiu lengkat mae i Mesir, na montulungi belemiu.

PO'ULE' INGULIT 31:23

Lapas aijo' Tumpu notataemo hi Yosua anak i Nun, Ia notatae, “Tionyo ahi' beleyum mompohoson kinyonyoa ka' baani, Yosua! Beleyummo na molaya' bansa Israel mompinsoopi lipu' anu jinanji'-Kumo hi aha ka' Ku tulungije na aha.”

PO'ULE' INGULIT 31:28

Uuka aiya pokaumo mae na polaya' nu aha bansa Israel iwi-iwi' ka' to kapa-kapala nu suludadu sihuk mae i ahopku da ku potokamo na hahan aiya hi aha. Langit ka' tano' na ku laga salaku monsakisi aha.

YOSUA 1:10

Jadi, i Yosua nompalentahmo to pola-polaya' nu aha mian Israel

YOSUA 1:17

Kami tulu-tulutanmo hi belento, susumo kami suele tinulu-tulutanmo hi Musa. O amalakon da Tumpu Allah nu belemiu saja' monsangalui susumo Ia nonsangaluimo i Musa!

YOSUA 1:18

Batu-batu mian anu madi' mongka'oho' ta'aluk i kakuasa'an nu beleyum kabai madi' montuluti palentah nu beleyum, mohumpak hukuman mate. Tionyo ahi' beleyum totu-totu'u na kinyonyoa ka' baani!”

YOSUA 10:25

Lapas aijo' i Yosua notataemo hi to kapa-kapala nu suludadunyo, “Boli bata-bata ka' boli mabuhuk. Tionyo ahi' belemiu palesaya totu-totu'u ka' baani' kalana sumo aiya na Tumpu mombau sampobali' miu iwi-iwi'.”

YOSUA 10:8

Tumpu notataemo hi Yosua, “Boli mabuhuk hi aha. Ka'untungan mahampate Ku bee'mo hi belemiu, kalana aijo' samian pe'e na aha madi' moko ala totahan mongewa belemiu.”

YOSUA 3:7

Tumpu notataemo hi Yosua, “Otampu'uni sinaa aiya beleyum Ku potimbalimo mian daka', sahingga iwi-iwi' na mian nu Israel mongadatimo beleyum ka' nusumbu'mo nu aha na Aku aiya saja' monsangalui beleyum susumo Aku nonsangaluimo mae i Musa.

YOSUA 6:27

Tumpu saja' mombaya'i i Yosua, ka' sanggo i Yosua tinalasanggomo i songko-songko na lipu' aijo'.

YOSUA 8:1

Tumpu notataemo hi Yosua, “Posihuk mae na suludadu nu beleyum iwi-iwi', ka' lako'mo tiba aha mamba i Ai. Boli hente na kinyonyoa ka' boli mabuhuk! Ku bee'mo hi belemiu na tomundo nu Ai, kalana opatundu'mo nu belemiu na aha. Layatnyo, kota'nyo, lipu' nu aha opatundu'mo nu belemiu.

TO MIA-MIAN KOPIAN 6:14

Lapas aijo' Tumpu nombee'imo palentah aiya hi Gideon, “Tiba kahosonan ka' kabaanian nu beleyum iwi-iwi', lako'mo lapasakon na mian nu Israel da bolimo nukuasai nu mian Midian. Akumo na anu nompokau beleyum.”

1 SAMUEL 10:7

De iwi-iwi' aijo' jadimo, lantas baumo mau mule' pa' apaa na anu nu oa'i nu beleyum ma'ima', kalana Tumpu Allah na monsangalui beleyum.