YOSUA 1:5 - KITAB NU TUMPU ALLA LELE MA'IMAI'

⁵ Madi' ko samian pe'e na anu moko ala mohungku'i beleyum, Yosua de beleyum daagi' tumuu': Kalana Aku saja' monsangalui susumo naipuan mae Aku nonsangaluimo i Musa. Aku madi' mompala'i beleyum.

YOSUA 1:5 ပူးပေါင်းရင်းမြစ်များ

KAJADIAN 39:2

Tumpu nontulungimo i Yusuf sahingga saja' mingkaliangan na anu nu kalaja iwi-iwi'. Ia jinojoongmo i laigan nu tuannyo, mian nu Mesir aijo'.

1 TOMU-TOMUNDO' 1:37

Susumo Tumpu nonjagai belento Tomundo' O'amalakon da ia suele mombalakati i Salomo. O'amalakon da Tumpu lebe mombee'i kabilahian de ia mompalentahmo nulingkudui na belento Tomundo' nompalentah.”

1 TOMU-TOMUNDO' 11:38

De beleyum montiho susumo posaihon-Ku i Daud tulu-tulutan hondo hi beleng-Ku ka' mule' mombatuki iwi-iwi' na atulan-Ku ka' mule' momposanang kinyonyoang-Ku ka' mule' montuluti iwi-iwi' na anu Ku palentahkon hi beleyum, saba' beleyum saja' Ku toa ka' Ku jagai. Ku potimbalimo tomundo' na beleyum hi aha Israel. Sabole-bole lee' nu beleyum na Ku potimbali tomundo' nu aha Israel mombolosakon beleyum susumo anu binaung-Kumo hi Daud.

1 TOMU-TOMUNDO' 6:13

Aku jojoongmo i laigan anu binaumo nu beleyum aiya hi aha mian nu Israel anu pinalesayamo hi belengku. Madi'mo Ku pala'i na aha.”

1 TOMU-TOMUNDO' 8:57

O'amalakon da Tumpu Allah-nto montoa mae kita susumo Ia nonjagai mompolee'to, o amalakon da Ia madi' mompala'i kita.

1 TAWARIKH 28:20

Lapas aijo' i Tomundo' Daud notatae mule' hi Salomo anaknyo momo'ane, “Beleyum tionyo ahi' totu-totu'u na kinyonyoa ka' baani. Tampuunimo na kalaja ka' boli bata-bata maumo pa'apaa na o ahopi. Tumpu Allah anu ku ku sombah na montulungi beleyum. Ia madi' mompojohok beleyum. Ia saja' montoa kapalaluan nu beleyum sahingga iwi-iwi' na kalaja aijo' timbalimo, ka' madi'mo ko anu obau.

MAZMUR 46:11

Ia notatae, “Belentimo na mahampate; da osumbu' saba, Akumo aiya na Tumpu, Aku talasanggo madi' pokakana bansa-bansa, talasanggo isongko-songko na dunia.”

NOSABATMO 3:12

Tinaaman nu Tumpu Allah, “Ku tulungije na beleyum. Ka' de bansa aijo' nu boamo mosabat lengkat i Mesir, belemiu monsombahmo hi beleng-Ku i bungkutnyo aiya. Aijo'mo na pontoan taalu' aku nonsaimo beleyum.”

YESAYA 42:16

Bansang-Ku anu napisokmo Ku taka'mo montulu jalan anu madi' nu sumbu' nu aha; aha Ku taka'mo montulu jalan anu madi' nu sumbu' nu aha. Kapintungan Ku potimbalimo da majingka hi aha, ka' jalan anu milebo-lebok Ku pohatamo. Aijo'mo na anu Ku bau hi aha, ka' memang ahi' Ku baumo.

YEREMIA 1:8

Boli mabuhuk hi aha, kalana Ku sangalui ka' Ku jagai na beleyum. Aku, Tumpu notataemo!”

DANIEL 11:16

Tomundo' nu lipu' sasu utara aijo' monsuka-sukaimo ka' madi'mo daagi' ko anu mongewa mau pe'e pa' mosiamo. Ia mule' monjojoongimo ahi' tano' anu ma'ima' ka' mongkuasaimo songko-songko.

MATIUS 28:20

O' ajan na aha mohongo-hongo iwi-iwi' apaa na anu Pinalentahkon-Kumo hi komiu. Ka' o inau', Aku saja' monjagai komiu sampe sinaa imihinyo mae.” 110

ROMA 8:31

Apaa na anu opoko taloakon uuka aiya mongkona iwi-iwi' aijo'? De Tumpu mosambiha' hi kita, ihena moko ewa kita?

ROMA 8:37

Madi'! Ola o i uno iwi-iwi' aijo' kita mohumpakmo ka'untungan anu sukup lengkat hi Ia anu mongkalibosi kita!

PO'ULE' INGULIT 20:1

“De belemiu mambamo mahampate mongewamo sampobali' nu belemiu, boli mabuhuk na montoa kareta anu nupake mae nu aha mahampate ka' ajahan nu aha manjoo' ka' suludadu nu aha anu konjoo'nyo molingkuduimo konjoo'nyo nu belemiu. Tumpu Allah nu belemiu anu nompobebasmo belemiu lengkat mae i Mesir, na montulungi belemiu.

PO'ULE' INGULIT 20:4

Nusangaluije nu Tumpu Allah na belemiu ka' montulungi belemiu, ka' nu bee'je hi belemiu na ka'untungan de mahampate.’

PO'ULE' INGULIT 31:23

Lapas aijo' Tumpu notataemo hi Yosua anak i Nun, Ia notatae, “Tionyo ahi' beleyum mompohoson kinyonyoa ka' baani, Yosua! Beleyummo na molaya' bansa Israel mompinsoopi lipu' anu jinanji'-Kumo hi aha ka' Ku tulungije na aha.”

PO'ULE' INGULIT 4:31

Tumpu Allah nu belemiu atina'mo na Tumpu Allah anu talalo hondo mongkalibosi. Ia madi' mompala'i kabai mompatei belemiu, kabai mongkolilimi palajanjian-Nyo hi mompolee' nu belemiu.

PO'ULE' INGULIT 7:24

Ia mombee'mo tomundo nu aha haha aijo' hi belemiu. Opateimo nu belemiu na aha, ka' sanggo nu aha okolilimimo nu belemiu. Samian pe'e madi' moko ala mongewa mongahopi belemiu,

2 TIMOTIUS 4:17

Panyo Tumpu na nonsangalui aku. Ia na nombee'imo kahosonan sahingga aku noko ala nompolele Lele Ma'ima' aijo' iwi-iwi', da ihongo nu mian iwi-iwi' anu misa' Yahudi. Sahingga aku madi'mo kinona nu bahaya nu kapatean.

IBRANI 13:5

Boli kantumuu'an miu mongka'ima'i doi na mongkuasai, panyo tionyo ahi' komiu mongoa'i sukupmo tiba apaa na anu daagi'mo hi belemiu. Kalana Tumpu notataemo, “Aku madi' mompojohok kabai mompala'i beleyum.”

YOSUA 1:17

Kami tulu-tulutanmo hi belento, susumo kami suele tinulu-tulutanmo hi Musa. O amalakon da Tumpu Allah nu belemiu saja' monsangalui susumo Ia nonsangaluimo i Musa!

YOSUA 1:9

O inau', Aku nompalentahmo beleyum da beleyum totu-totu'u na kinyonyoa ka' baani! Boli beleyum mabuhuk kabai hente na kinyonyoa, kalana Aku na Tumpu Allah nu beleyum saja' monsangalui beleyum maumo pa' moya na kalambanan nu beleyum.”

YOSUA 10:8

Tumpu notataemo hi Yosua, “Boli mabuhuk hi aha. Ka'untungan mahampate Ku bee'mo hi belemiu, kalana aijo' samian pe'e na aha madi' moko ala totahan mongewa belemiu.”

YOSUA 21:44

Jadi susumo apaa na anu jinanji'mo nu Tumpu hi mompolee' nu aha, lipu' aijo' madi'mo ko anu mompoposia kalana saja'mo nujagai nu Tumpu. Sampobali' nu aha iwi-iwi' madi' ko samian pe'e na moko ala mongewa aha, kalana Tumpu na mombee'i ka'untungan mahampate hi aha mian nu Israel de ihe na aha iwi-iwi' anu monsampobali' aha Israel.

YOSUA 3:7

Tumpu notataemo hi Yosua, “Otampu'uni sinaa aiya beleyum Ku potimbalimo mian daka', sahingga iwi-iwi' na mian nu Israel mongadatimo beleyum ka' nusumbu'mo nu aha na Aku aiya saja' monsangalui beleyum susumo Aku nonsangaluimo mae i Musa.

YOSUA 6:27

Tumpu saja' mombaya'i i Yosua, ka' sanggo i Yosua tinalasanggomo i songko-songko na lipu' aijo'.

TO MIA-MIAN KOPIAN 2:18

De Tumpu mombee'imo samian na polaya' hi bansa Israel, Tumpu saja' montulungi polaya' aijo'. Ka' de polaya' aijo' daagi' tutuu' Tumpu saja' montoa aha da boli opoposia nu sampobali' nu aha. Ia molibos hi aha de ia mohongo aha susa'mo kalana osansalamo ka' sakisamo.

TO MIA-MIAN KOPIAN 6:16

“Moko ala mombau na beleyum!” na koonyo nu Tumpu, “kalana Akumo na montulungi beleyum. Aha mian nu Midian dengke na beleyum mompatei ola susumo beleyum mongahopi samian.”

1 SAMUEL 10:7

De iwi-iwi' aijo' jadimo, lantas baumo mau mule' pa' apaa na anu nu oa'i nu beleyum ma'ima', kalana Tumpu Allah na monsangalui beleyum.