YOHANES 3:10 - KITAB NU TUMPU ALLA LELE MA'IMAI'

¹⁰ I Yesus nontaami, “Beleyum gulu' nu Israel; ka' kadaka' madi' nusumbu'?

YOHANES 3:10 ပူးပေါင်းရင်းမြစ်များ

1 TAWARIKH 29:19

Bee'iakon na i Salomo, anaku momo'ane da mongka'ima'i totu-totu'u montuluti iwi-iwi' napalentah nu Belento ka' mombau laigan ponsomban belento Tumpu, kalana posadiaonnyo pinodaagi'kumo.”

MAZMUR 51:10

Sahanyo aku sola'mo mohongo lele anu lame', da kinyonyoa anu ihansunanmo nu Belento aiya po ule' ahi' montaligalai.

MAZMUR 51:6

Hi Belentomo, hi Belentomo na binaladosa'anku, ka' binaungkumo na anu nu anggap nu Belento ma'idek. Sahingga konanyomo ahi' na Belento mohukumo mae aku, adin memang na kaputusan nu Belento.

MAZMUR 73:1

Mazmur i Asaf. Manonong hondo na Tumpu Allah hi mian anu palesayamo hi Ia, ka' mule' hi mian anu kinyonyoanyo hodi'.

YESAYA 56:10

Koonyo nu Tumpu, “To pola-polaya' nu bansang-Ku atina'mo na to mia-mian anu mapisok! Aha madi' monsumbu' apa-apaa. Aha susumo dedeng anu momo' anu madi' mohu'akon panyo ola ahi' hoyot ka' mongipi. Sanang hondo na aha hoyot!

YESAYA 9:16

Bansa aijo' madi'mo pinalesaya hi Tumpu ka' mule' palalente, ka' iwi-iwi' na potatae nu aha madi'mo na'ima'. Kalana aijo' aha to oli-olitau mau pe'e samian madi' ko anu pinoluput nu Tumpu. Ia madi'mo nongkalibosi to balu-balu tiba anu madi'mo ko tuumanyo ka' tinanyo. Panyo Tumpu daagi' ahi' sabole-boleh motambuha' ka' sabole-boleh mohukum.

YEREMIA 31:33

Sumo uuka na palajanjian anu Ku bauje tiba aha mian nu Israel; Atulan-atulan-Ku, Ku po una'mo i uno nu kinyonyoa nu aha, ka' mule' Ku tulismo i uno nu kinyonyoa nu aha. Aku timbalimo Tumpu Allah nu aha ka' mule' aha timbalimo mian anu palesayamo hi beleng-Ku.

YEHEZKIEL 11:19

Aha Ku bee'ije kinyonyoa anu sangalasan ka' mule' pikilan anu sangalasan, madi'mo pokakana sumo anu ihikuhakonmo. Kinyonyoa nu aha anu nokuutmo susumo batu Ku alamo ka' Ku bolosimo nu kinyonyoa anu tulu-tulutan hi beleng-Ku.

MATIUS 11:25

Tempo'nyo aitu i Yesus binala do'amo, “Tuuma, Tumpu anu mongkuasai langit ka' tano'! Aku mompoita talima kaseh hi Kita saba' iwi-iwi' aijo' Belento nolahasiakonmo hi to mia-mian anu pande, ka' ko ilimu', panyo Belento nompotiju'akonmo hi to mia-mian anu madi' ko sikolah.

MATIUS 15:14

Madi' timbali opalahatikan na to mia-mian Farisi aijo'. Aha aijo' mapisok montaka' anu mapisok; jadi, de mian mapisok montaka' mian mapisok ua-ua'aha timbali manabu' i uno nu bolo'.”

MATIUS 22:29

I Yesus nontaami, “Komiu ilipunmo hondo, kalana komiu madi' mangalati' i Kitab nu Tumpu, mau pe'e kuasa nu Tumpu Allah.

LUKAS 2:46

Kino itolunnyo na nolio, i humpakje nu aha na Ia i uno nu Laigan nu Tumpu. Ia hau-haunyo suha-suhang mohongo gulu-gulu' agama, ka' mompoki-pokilawa.

LUKAS 5:17

Daagi' ko sansinaan tempo'nyo i Yesus hau-haunyo mongajan, daagi' ko to pia-piangkuka na mian nu Farisi tiba to gulu-gulu' agama sinumuhang i kiijo'. Aha tinoka lengkat mae i Yerusalem tiba lengkat mae i to kota-kota Galilea ka' i Yudea. Kuasa nu Tumpu daagi' hi Yesus, da nompa'alin to mia-mian masakit.

YOHANES 3:9

“Mosia na anu sumo aijo' timbali?” pinokilawa i Nikodemus.

SISIKON NU TO RASUL-RASUL 5:34

Panyo anu kiijo' i sangalu nu Mian Kopian Daka' nu Agama aijo' daagi' ko samian na mian nu Farisi sanggonyo i Gamaliel. Ia gulu' agama anu otabea'i hondo nu iwi-iwi' na mian. Ia tinuminjo lantas nonsai momboa monsabatakon to rasul-rasul haha aijo' sasaingoni'.

ROMA 2:28

Kalana mian anu totu-totu'u Yahudi misa' ola asan sanggonyo mian nu Yahudi; ka' mian anu totu-totu'u sinunat misa' ola sinunat tudu-tudu i butong.

PO'ULE' INGULIT 10:16

Jadi mulai uuka aiya belemiu tionyo ahi' tulu-tulutan hi Tumpu ka' bolimo daagi' panggaga.

PO'ULE' INGULIT 30:6

Belemiu ka' lee' nu belemiu obee'imo kinyonyoa anu mohongo-hongo sahingga belemiu mongkanonongimo Tumpu Allah nu belemiu totu-totu'u i uno nu kinyonyoa nu belemiu ka' sainjojoongmo i lipu' aijo'.

FILIPI 3:3

Padahan kitamo na to mia-mian anu nontalimamo sunat anu totu-totu'u misa' aha. Kita monsombah Tumpu posi Roh nu Tumpu na nompotuka', ka' kita montalima kase kalana kita tumuu' nosa'ngu'mo tiba i Kristus Yesus. Kita madi' taha'iman i to ada-adat anu ola mombatuki kabiasa'an nu dunia.

KOLOSE 2:11

Kalana nosa'angu'mo tiba i Kristus komiu sinunatmo, misa' sumo sunat anu binau nu mian, panyo sunat anu binau i Kristus, anu nompobebasmo komiu i kuasa nu tabiat anu baladosa'.