YOHANES 21:15 - KITAB NU TUMPU ALLA LELE MA'IMAI'

¹⁵ Noko kaan na aha, i Yesus notataemo hi Simon Petrus, “Simon anak i Yona, apaa beleyum lebe mongkalibosi Aku, molingkudui pongkalibosi nu aha aiya hi beleng-Ku?” “Totu'u, Kita Tumpu,” tinaaman i Petrus. “Nu sumbu' nu Kita Tumpu na aku mongkalibosi Kita Tumpu.” I Yesus notatae hi ia, “Palakaiyakon na to ana-anak nu dombang-Ku.”

YOHANES 21:15 ပူးပေါင်းရင်းမြစ်များ

KAJADIAN 33:13

Tinaaman i Yakub, “Kita utusku Tu'a monsumbu'mo saba' anak haha aiya madi' mahoson ka' aku pagala mompomondisi potuu'on iwi-iwi' anu daagi' monsusu. De pagalamo oboa lia-lia' mau mule' ola sansinaa, saba' iwi-iwi' na pahasan nu binatang haha aijo' matemo.

2 SAMUEL 7:20

Pa' daagi apaa na ku taloakon hi belento? Belentomo na monsumbu' iwi-iwi' mongkona posaihon nu belento aiya.

2 TOMU-TOMUNDO' 20:3

“O Tumpu, inau'akon mae na aku aiya anu nokalajamo ma'i-ma'ima' hi belento, ka' aku madi' lewa' tinageo' na kinyonyoa.”

YESAYA 40:11

Susumo samian na polaya' nu binatang na Ia mompotuu', potuu'on-Nyo; Ia na nomposihuk aha. To ana-anak nu domba Nu tangkung mae, madi' Ia monsigohi mae na montuntuni to tina-tinanyo.

YEREMIA 23:4

Aku mohangkatmo polaya' da monjagai aha. Mian anu palesayamo hi beleng-Ku madi'mo daagi' mabuhuk ka' madi'mo daagi' saja' nu lakat; madi'mo daagi' maga'a na mian anu aijo' hi aha. Aku, Tumpu notataemo.”

YEREMIA 3:15

Aku mombee'imo belemiu to pola-polaya' anu tulu-tulutan hi beleng-Ku. Ahamo na mompalentah belemiu ka' ia pande ka' mangalati' hondo.

YEHEZKIEL 34:23

Aku mohangkatmo samian na tomundo' anu pokakana sumo posaihon-Ku i Daud da timbali bau polaya' aha, ka'iamo na mompalakai aha.

YEHEZKIEL 46:24

Koonyo nu mo'ane ai-aijo' hi belengku, “Aiyamo na polu' haha aiya tampat nu to ima-imam anu mokalaja i Laigan nu Tumpu mongkuluki koloban-koloban anu nu sombahkon nu mian da'isan.”

MATIUS 10:37

Mian anu mongkalibosi tumanyo kabai tinanyo molingkudui Aku, madi' pantas timbali anu mombatuki Aku. Sumo aitu mule' na mian anu mongkalibosi anaknyo mo'ane kabai boune, molingkudui Aku.

MATIUS 16:17

“Talalo untung hondo na beleyum, Simon anak i Yona!” na koonyo i Yesus. “Kalana misa' mian na nompotoiyakon han aijo' hi komiu, panyo Tuumang-Ku anu i suluga'.

MATIUS 18:10

“Jaga! Boli mompopo'ambang sala'samian na to mia-mian anu ise' aijo'. Kalana, o inau'mo, na to mala-malaikat, aha saja' i ahop nu Tuumang-Ku i suluga'. [

MATIUS 26:33

I Petrus notatae hi Yesus, “Pojohok na anu iwi-iwi' mompala'i Kita Tuuma, aku totu-totu'u madi'!”

MATIUS 26:35

I Petrus nontaami, “Mau mule' aku matemo tiba Kita Tuuma, aku madi' motatae tukoongku, aku madi' monsumbu' Kita Tuuma!” Ka' iwi-iwi' anu saja' mombatuki Ia, sangga'at notatae sumo aitu suele.

MARKUS 14:29

“Madi',” tinaaman i Petrus, “Mau mule' aha iwi-iwi' mompala'i kita Tuuma, aku madi' sahondo-hondonyo.”

LUKAS 12:32

“Komiu anu ola sangkiding na konjoo'nyo, boli mabuhuk! Kalana Tuumaum sanang mombee' hi beleyum balakat lengkat mae i Kapalentahan-Nyo.

LUKAS 22:32

Panyo Aku nondo'akonmo beleyum, Simon, da palesaya nu beleyum anu totu-totu'u boli tolotutus. Ka' de beleyum minsusule'mo mae hi beleng-Ku, beleyum tionyo mompohoson to utu-utusum.”

YOHANES 1:42

I Andreas nolaya' i Simon namba hi Yesus. I Yesus nondin i Simon, lantas notatae, “Beleyum i Simon anak i Yona. Beleyum osanggohije i Kefas.” (Kefas pokakanamo i Petrus, alati'nyo: bungkut nu batu.)

YOHANES 13:37

“Tumpu, kadaka' aku madi' moko batuki kita Tumpu uuka aiya?” po'ule' pinokilawa i Petrus mule'. “Aku sanang na mate kalana kita Tumpu!”

YOHANES 16:27

Kalana posimo Tuuma na mongkalibosi komiu. Ia mongkalibosi komiu, kalana komiu mongkalibosi Aku, ka' palesaya saba' Aku lengkat mae hi Tumpu.

YOHANES 21:12

I Yesus notatae hi aha, “Imbo' da mongkaan.” Madi' ko samian pe'e na anu saja' mombatuki Ia baani mompokilawa, “Ihe na Kita Tuuma?” Kalana nusumbu' nu aha Ia aijo' Tumpu.

YOHANES 21:7

Anu saja' mombatuki nunu kalibosi i Yesus notatae hi Petrus, “Aijo'mo na Tumpu!” Salatan i Simon Petrus nohongo taalu' aijo' i Tumpu, ia nompusok baju'nyo (kalana ia madi' nimbaju') balo nalalumpat nokaiyong i uee.

YOHANES 8:42

Lantas i Yesus notatae hi aha, “De Tumpu aijo' Tuumaum, komiu tionyo mongkalibosi Aku, kalana Aku tinoka mae lengkat hi Tumpu. Aku madi' tinoka kalana posi pongka'oho'ku, panyo Ia anu nonsai mae Aku.

SISIKON NU TO RASUL-RASUL 20:28

Tionyo obala ingati na butong miu ka' otoa suele na jama'at iwi-iwi' anu binee'mo nu Roh nu Tumpu hi komiu da otoa; kalana komiu ingangkatmo da montoa jama'at aijo'. Tionyo komiu montoa jama'at nu Tumpu aijo' sumo polaya' montoa dombanyo, kalana Tumpu nompotimbalimo jama'at-Nyo, aijo'mo na sababnyo sahingga i Yesus Anaknyo sinilakamo.

SISIKON NU TO RASUL-RASUL 20:29

De Aku mambamo totu-totu'u tokaje' mae na to seri-serigala anu bahangihi moitina' hi komiu. Ka' to mia-mian anu ojagai miu aijo' timbalimo kaanon nu to seri-serigala haha aijo'.

ROMA 14:1

Mian anu madi' junjuhi' na palesayanyo itina' hi komiu to Utu-utus, otalima ma'i-ma'ima'. Boli painggaga tiba ia anu pa' mosia na pongka'oho'nyo.

ROMA 15:1

Kita anu totu-totu'u junjuhi' i anu opalesayanto, tionyo sabaan i kabalatan-kabalatan nu mian anu ola tudu-tudu na kapalesaya'annyo. Boli ola kita momposanang posi butongto.

1 KORINTUS 8:11

Jadi kalana aijo', sahingga palesaya nu kita Utus monsaduakonmo mian anu palesayanyo madi' mahoson aijo' timbalimo madi' ma'ima'. Padahan i Kristus sinilaka kalana mian aijo' suele.

GALATIA 5:6

Kalana de kita mosa'angu'mo tiba i Kristus Yesus, han mombatuki kabai madi' mombatuki atulan nu sunat, madi'mo mongkuka. Anu palalu hondo ola ahi' palesayamo hi Kristus, ka' aijo' oponyata' i uno nu kita mongkalibosi mian sangga'at.

EFESUS 4:14

Sahingga kita madi'mo po'ule' mingana-anak anu sumo nupuuhi nu mombun oboa mokiijo' mo'uuka mae nu ngangahan nu solok nu pangajalan lengkat hi to mia-mian anu pande na mongakali. Aha mompotimbali mian ponga' nu kapandean nu aha mongakali.

EFESUS 6:24

O amalakon da Tumpu mombalakati kita Utus iwi-iwi' anu mongkalibosi Tumpunto i Yesus Kristus, nu kalibosan anu madi' ko kapopoho'annyo. Tabea' mami, I Paulus

IBRANI 13:20

Tumpu mompotumuu'mo Tumpunto i Yesus anu sini-sinilakamo. Kalana Ia sinilakamo, sahingga Ia tempo' uuka tinimbalimo Polaya'to anu Talasanggo aiya hi kita to domba-domba-Nyo. Ia sinilaka aijo' mompaka pompohosonmo palajanjian anu sampe toka sidu-sidutu' anu binaumo nu Tumpu hi kita.

IBRANI 4:13

Madi' ko sa'angu' pe'e na anu konyawanyo na madi' nutoa nu Tumpu. Iwi-iwi na apaa langgo-langgo' ka' kantoan hi ahop-Nyo. Ka' kita tionyo ahi' mongakui apaa na anu binauntomo i hi Ia.

1 PETRUS 1:8

Komiu mongkalibosi Ia mau mule' naipuan mae komiu madi' nontoa Ia. Ka' komiu pinalesayamo hi Ia mau mule' uuka aiya komiu madi' nontoa Ia. Mokonyo aijo' komiu lame' ka' mongoa'i kasanangan anu daka' ka' anu madi' opoko taloakon.

1 PETRUS 2:2

Tionyo ahi' komiu timbali sumo bunga mea' anu sala'je i hampe, saja' megot kahanda' monginum susu nu rohani anu madi' ko galo'nyo. Desumo aitu yo belemiu tumuu' ka' oposalamat.

1 PETRUS 2:25

U'utu mae belemiu sumo domba anu tinalasmo, panyo uuka aiya belemiu sinule'akonmo mae da mombatuki Polaya' ka' anu Mompalakai santuu' miu.

1 YOHANES 4:19

Kita mongkalibosi, kalana Tumpu momonamo na mongkalibosi kita.

1 YOHANES 5:1

Mian anu pinalesayamo tukoonyo i Yesus aijo'mo na Tomundo anu Momposalamat anu jinanji'mo nu Tumpu, mian aijo' Anakmo nu Tumpu. Mian anu mongkalibosi tuumanyo, tuumanyo suele mongkalibosi anaknyo.

ANU PINOTO'I HI YOHANES 2:23

Anu mombatuki ia Kupatei suele da iwi-iwi' na jama'at sinsumbu' saba' Akumo na Ia anu mompangalati'i pikilan ka' kinyonyoa nu mian. Komiu Ku balosije sumo apaa na anu binaumo miu i toto samian.