YOHANES 14:3 - KITAB NU TUMPU ALLA LELE MA'IMAI'

³ De lapasmo na Aku mamba montoukai tampat miu, Aku po'ule'je mae minsusule' ka' molabot komiu, da iyana kajojoongan-Ku, i kiijo' suele na kajojoongan miu.

YOHANES 14:3 ပူးပေါင်းရင်းမြစ်များ

YOHANES 12:26

Mian anu mongka'oho' mohongo Aku, tionyo mombatuki Aku; da posaihon-Ku mo'imboa ka' Aku i tampat kajojoongan-Ku. Mian anu mohongo Aku, nu angga'i nu Tuumang-Ku.”

YOHANES 14:28

Komiu nohongomo Aku notatae, ‘Aku mambamo, panyo Aku po'ule'je minsusule' mae hi komiu’. De komiu mongkalibosi Aku, komiu sanang na Aku mamba hi Tuuma, kalana Tuuma lebe daka' molingkudui Aku.

YOHANES 14:4

Mamba i tampat kalajangan-Ku osumbu' miu na jalannyo.”

YOHANES 17:24

Kita Tuuma, Ku kahanda'i da aha anu binee'mo nu kita Tuuma hi beleng-Ku mogalum ka' Aku i tampat kajojoongan-Ku, da aha montoa kadaka'an-Ku; aijo'mo kadaka'an anu binee' nu kita Tuuma hi beleng-Ku, kalana kita Tuuma mongkalibosi Aku ma'isa pe'e dunia aiya pinotimbali.

SISIKON NU TO RASUL-RASUL 1:11

“Hee, to mia-mian nu Galilea,” koonyo nu ua'aha na mian haha aijo', “kadaka' komiu ola tuminjo atina' monsinda langit? I Yesus anu tinoa miu tinalahangkatmo nokiita' i suluga' atina' i ahop miu, po'ule'je minsusule' mae susumo atina' anu tinoamo miu u'uka aiya.”

ROMA 8:17

Jadi, de kita to ana-anak-Nyo, tantu kita mule' ko hak mohumpak hi Ia, anu tionyo montalima to bala-balakat anu pinosadiamo nu Tumpu bau bagi nu to ana-anak-Nyo. Kita tionyo mohumpak hingga-hinggat tiba i Kristus apaa na anu pinosadiamo nu Tumpu hi Ia; kalana de kita mongoa'i sansala tiba i Kristus, kita suele opopodaka' tiba Ia.

FILIPI 1:23

Ohua' na jalan na mohela' aku. Ku ka'ima'imo hondo na mompala'i dunia aiya da mamba jojoong tiba i Kristus, kalana aijo' na anu talalo ma'ima';

2 TESALONIKA 1:12

Tiba jalan anu sumo aijo' Tumpunto i Yesus opopodaka'mo miu, ka' komiu mule' nupopodaka'mo i Yesus kalana kanonongan nu kinyonyoa nu Tumpunto ka' Tumpu Yesus Kristus.

2 TIMOTIUS 2:12

De kita tataap sabaan, kita mompalentahje suele tiba Ia. De kita madi'mo mongakui Ia, Ia suele madi'mo mongakui kita.

IBRANI 9:28

Sumo aitu mule' na i Kristus ola minsan na sinombahkon salaku koloban mompobelesi dosa' nu mian da'isan. Ia po'ule'je toka kopinduannyo, misa' pa' kahanda' mongulusmo palakala nu dosa', panyo momposalamatmo to mia-mian anu saja' montanda'i katokaan-Nyo.

ANU PINOTO'I HI YOHANES 3:21

Aha anu inguntungmo i uno nu kasabalan, Ku pobee'je sumuhang i kasuhangan-Ku tiba Aku, pokakana sumo Aku suele inguntungmo i uno nu kasabalan ka' uuka aiya sinumuhangmo tiba Tuumang-Ku i kasuhangannyo.