YOHANES 1:45 - KITAB NU TUMPU ALLA LELE MA'IMAI'

⁴⁵ I Filipus siningkabot tiba i Natanael ka' notatae hi ia, “Kami siningkabotmo mian anu sisinanggo i Musa i uno nu kitab Atulan nu Tumpu ka' anu bibinebakonmo nu to nabi-nabi. Aijo'mo Ia i Yesus anu lengkat mae i Nazaret, anak i Yusuf.”

YOHANES 1:45 ပူးပေါင်းရင်းမြစ်များ

KAJADIAN 22:18

Iwi-iwi' na bansa i dunia mongkakaseje hi belengku da Ku balakati na aha susumo Aku nombalakatimo lee' nu beleyum – kalana beleyum nontulutimo palentah-ngKu.”

KAJADIAN 3:15

Oko ka' boune aijo' saja' mompaha ka'i-ka'ideki, lee'nyo ka' lee'um saja' mompahabali'. Lee'nyo mohansuni ubakum ka' oko monsa'u pantigan nu aha.”

KAJADIAN 49:10

I Yehuda na montoongi tokon nu tomundo da mompalentah, lee'nyo na mompalentah sampe toka sidu-sidutu'. To bansa-bansa momboa hasin, ka' monsombah i ahopnyo kalana ia okabuhuk.

YESAYA 4:2

Po ule'je toka na tempo'nyo nu potimbalimo nu Tumpu na sosu'anon iwi-iwi' ka' mule' kau' tumuu'mo ka' daka'mo ilipu' aiya. Toka isinaa aijo' aha mian nu Israel anu salamat mongoai'mo kabilahian ka' sanangmo na kinyonyoa kalana nohumpakmo hasin nu ale'nyo.

YESAYA 53:2

Tumpu mongkahanda'i da posaihon-Nyo aijo' susumo ahi' sulot mae nu kau' anu tumuu' i tano' anu nategesmo. Madi' ko anu ma'ima' na otoanto aijo' hi ia madi' ko anu ma'ima' na anu timbali o kamiluinto.

YESAYA 7:14

Uuka aiya posi Tumpumo na mombee'i tanda hi belemiu samian na langkoyang poboa'mo ka' mompohampemo samian na anak mo'ane anu osanggohimo Imanuel.

YESAYA 9:6

Ia mompalentah salaku tomundo' lee' mae i Daud, kakuasa'annyo daka' hondo. Lipu'nyo saja'mo dame ka' mohumpakmo kantumuu'an ma'ima'; pamalentahannyo montoongi atulan tiba ka'adilan mulai uuka aiya sampe toka sidu-sidutu'. Tumpu Anu Daka' na Kuasanyo na tionyo mombau aijo'.

MIKHA 5:2

Jadi nu pojohokmo nu Tumpu na mian-Nyo anu palesayamo da nu kuasaimo nu sampobali' nu aha, sampeje boune anu tinantukanmo da timbali tinanyo nu anu mongkuasai aijo' mompohampemo Ia anu mongkuasai Israel. Lapas aijo' to mia-mian anu bubu' bansanyo anu kiijo' mae i tampat pinomboan ka' pinompojoongan aha po ule'mo oposa'angu' tiba bansa nu aha.

ZAKHARIA 6:12

Poto'iakon hi ia, saba' Akumo na Tumpu Anu Daka' na Kuasanyo nonotataemo, ‘Mian anu osanggohi Sang Tunas na saidi' mae balahasin i tampat kajojoonganyo ka' ia po ule'mo mombau Laigan nu Tumpu.

ZAKHARIA 9:9

O, mian anu jojoong i Sion, balame-lame'mo! O, mian anu jojoong i Yerusalem pontaligalaimo! Toamo! Tomundo' nu beleyum tinokamo ka' inguntungmo mae na nahampate! Ia tomundo' anu adin momomboamo mae kasalamatan. Panyo madi' bakadaka'an na ia toka mae monsake'i keledai, sa'angu' na keledai anu daagi' bata'nyo.

MATIUS 10:3

Ilapas aijo' i Filipus ka i Bartolomeus tiba i Tomas ka' i Matius, topo tagi hasin tiba i Yakobus anak i Alfeus, ka' i Tadeus;

MATIUS 13:55

Te misa' Ia anak nu tukang kau'? Te misa' i Maria aijo' na tina-Nyo; ka' to utu-utus-Nyo aijo'mo i Yakobus, i Yusuf, i Simon, ka' i Yudas?

MATIUS 2:23

I kiijo' ia jinojoong i kota sanggonyo Nazaret. Sahingga sumo aitu jinadimo apaa na anu tinaloakon nu to nabi-nabi mongkona Anak aitu: “Ia o sanggo Mian nu Nazaret.”

MATIUS 21:11

“Ia Nabi Yesus, lengkat mae i Nazaret i Galilea,” tinaaman nu mian da'isan anu nonsampo jalan i Yesus.

MARKUS 14:67

Salatan nontoa i Petrus minjohu ohani i apu, lewa'mo tinonto'annyo ima-ima' na ohup i Petrus ka' notatae, “Te misa' beleyum suele mosangalu i Yesus mian nu Nazaret aijo'?”

MARKUS 6:3

Te misa' Ia aiya tukang anu saja' mombau pakakas nu laigan, Anak i Maria, ka' utus i Yakobus, i Yoses, i Yudas ka' i Simon? Memang to utu-utus-Nyo boune pe'e jojoong i aiya suele.” Kalana aijo' aha madi' nontalima Ia.

LUKAS 18:37

“I Yesus, mian nu Nazaret aijo', notulu,” tinaeakon nu aha hi ia.

LUKAS 2:4

I Yusuf mule' namba lengkat i Nazaret i Galilea, namba i Betlehem i Yudea, tampat kinahampean i Tomundo Daud; kalana i Yusuf lee' i Daud.

LUKAS 2:48

Tu'anyo-Nyo mule' suele bangangmo na montoa Ia. Tina-Nyo notatae hi Ia, “Anak, kadaka' nu bau na kami sumo aiya? Tuuma-Um ka' tina-Um binata-batamo na nolio Beleyum!”

LUKAS 24:27

Lapas aijo' i Yesus nontutuhakonmo hi aha apaa na anu tinulis i uno nu ingko-ingkot Kitab nu Tumpu mongkona butong-Nyo, lengkat pe'e i Kitab-kitab i Musa ka' kitab nu to nabi-nabi.

LUKAS 24:44

Lapas aijo' Ia notataemo hi aha, “Aiyamo na hahan anu pinoto'ingkumo hi komiu tempo'nyo Aku daagi' nojajalan tiba komiu: tukoongku apa-apaa na anu tinulis mongkona Aku i uno nu Kitab-kitab i Musa, to Nabi-nabi, ka' Mazmur, tionyo timbali.”

LUKAS 3:23

Tempo'nyo i Yesus nontampu'unimo pakalaja'annyo, umunnyo kila-kila tolumpulu'mo na taun. Koonyo nu pikilan nu mian, Ia anak i Yusuf, anak i Eli,

LUKAS 4:22

Potatae anu tinaloakon-Nyo ma'ima' hondo, sahingga aha binangangmo ka' nompototu'umo Ia. Aha notatae, “Te misa' Ia anak i Yusuf?”

YOHANES 1:44

I Filipus mian anu nolengkat mae i Betsaida, aijo'mo jojoongan i Andreas ka' i Petrus.

YOHANES 12:21

Aha tinoka hi Filipus ka' notatae, “Kita utus, de timbali kami mongka'oho' singkabot tiba i Yesus.” (I Filipus nolengkat mae i Betsaida i Galilea.)

YOHANES 14:8

Sahingga i Filipus notatae hi Yesus, “Tumpu potiju'akon mae na Tuuma hi kami, da kami sanang.”

YOHANES 18:5

“I Yesus, mian nu Nazaret,” na koonyo nu aha. “Akumo na Ia,” koonyo i Yesus. I Yudas uwe-uwesan tinjo-tinjo i kiijo' tiba aha.

YOHANES 18:7

Po'ule' mule' pinokilawa i Yesus hi aha, “Ihe na olio miu?” “I Yesus, mian nu Nazaret,” na koonyo nu aha.

YOHANES 19:19

I kau' salib i Yesus, i Pilatus nompokau mompokona tulisan aiya: “Yesus lengkat mae i Nazaret, Tomundo Mian nu Yahudi.”

YOHANES 21:2

Ko sansinaan i Simon Petrus, i Tomas anu osanggohi Hapi, i Natanael lengkat mae i Kana i tano' Galilea, ana-anak i Zebedeus, ka' ua'aha na anu saja' mombatuki Yesus sangga'at hau-haunyo sinilimu'mo.

YOHANES 6:42

Aha notatae, “Te misa' aiya i Yesus, anak i Yusuf? Osumbu' mami na tina ka' tuuma-Nyo! Te mosia ka' Ia timbali motatae tukoonyo, Ia nintatau' mae lengkat i suluga'?”

YOHANES 6:5

Salatan i Yesus nontoa titikub, Ia nontoa mian nomomuyutmo mae toka hi Ia. Sahingga Ia notatae hi Filipus, “Iyamae na timbali pongolianto anu okaan da iwi-iwi' na mian aiya timbali mongkaan?” (

YOHANES 6:7

I Filipus nontaami, “Roti anu olinyo ola ua'atu na doi salaka madi' mompoosampa' obagi-bagi hi mian haha aiya, mau mule' toto samian ola mohumpak sangkiding.”

SISIKON NU TO RASUL-RASUL 10:38

Komiu nonsumbu'mo saba' Tumpu nompile'imo i Yesus mian nu Nazaret aijo' ka' nombee' hi Ia Roh nu Tumpu ka' kuasa. Komiu mule' nonsumbu'mo saba' i Yesus namba iyaya mae da mombau anu ma'ima'; Ia nompa'alin iwi-iwi' mian anu kinuasanmo nu Ibilis, sabab Tumpu mongkalibosi Ia.

SISIKON NU TO RASUL-RASUL 2:22

To Utu-utus mian nu Israel! Hongo apaa na anu ku taloakon aiya: I Yesus mian nu Nazaret aijo' binee'anmo kalaja nu Tumpu Allah bau kapentingan nu kita utus. Aijo' nyata' hondo i anu okabangangi ka' hahan anu daka', apaa na anu binau nu Tumpu i totonga' miu hi Yesus aijo'. Iwi-iwi' aijo' posi kita utus nonsumbu'mo.

SISIKON NU TO RASUL-RASUL 22:8

Lantas pinokilawangku, ‘Ihe na Belento, Tuan?’ ‘Akumo na i Yesus, mian nu Nazaret aijo' anu nu sakisa,’ tinaaman-Nyo.

SISIKON NU TO RASUL-RASUL 26:9

Imoonanyo posi aku pe'e ko pikilan, mosia da aku tionyo mombau apa-apaa da bau pompoosala' i Yesus lengkat i Nazaret aijo'.

SISIKON NU TO RASUL-RASUL 3:6

Panyo i Petrus notatae hi ia, “Aku madi' hondo ko doi. Panyo apaa na anu daagi' hi belengku, aijo' na ku bee' hi beleyum: Tiba kuasa i Yesus Kristus mian nu Nazaret aijo', lajangmo!”