YESAYA 66:4 - KITAB NU TUMPU ALLA LELE MA'IMAI'

⁴ Kalana aijo' Aku suele mombauje yayamo pongka'oho'-Ku ka' mompokonamo hi aha iwi-iwi na balaa' anu nukabuhuk nu aha. Kalana salatan Aku nolagamo madi' ko anu nontaami mae; salatana Ku notataemo madi' ko anu nompotombihing mae; Lebe nuka'ima'i nu aha na panggaga hi beleng-Ku, Aku nombaumo anu ma'idek.”

YESAYA 66:4 ပူးပေါင်းရင်းမြစ်များ

2 TOMU-TOMUNDO' 21:2

I Manasye binaladosa'mo hi Tumpu, kalana lewa'mo nontiho kalakuan anu ma'idek, anu biasa nu bau nu to bansa-bansa anu i laa'mo nu Tumpu lengkat mae i Kana'an tempo'nyo mian nu Israel ninsoopmo i lipu' aijo'.

2 TOMU-TOMUNDO' 21:6

Anaknyo sinombahkonnyomo salaku koloban anu pinotunu. I Manasye mule' lewa'mo binasando monggulu'i pangatahuan anu toto ide-idek, ilimu' anu madi' oto-toa, ka' lewa' montunde' tominuat. Ia binaladosa'mo hondo hi Tumpu sahingga ia notambuha'mo hondo.

MAZMUR 81:12

Panyo mian anu palesayamo hi belengku, madi'mo mohongo-hongo aku. Israel madi'mo tinulu-tulutan hi belengku.

AMSAL 1:24

Belemiu i lagangkumo, panyo belemiu madi'mo montuluti ka' madi'mo mompajuli.

AMSAL 10:24

Mian anu madi' tageo' na kinyonyoanyo mohumpak apaa na anu nu kahanda'i; panyo mian anu ma'idek na kinyonyoanyo mohumpak apaa na anu talalo hondo nu kabuhuk.

YESAYA 50:2

Kadaka' aijo' aha mian anu palesayamo hi beleng-Ku mau samian madi' ko anu montaami mae, tempo'nyo Aku tokamo mae molaga aha? Pa' ugaat aha ola ahi' momohokot kalana monsangka Aku madi' moko ala mompobebas ka' mule' madi' moko ala momposalamat aha? Padahan mau ola Ku palentah na ambai timbali mo'oti, iwi-iwi na kaunyo timbali Ku pojadi padang tampat anu mateges, sahingga to ika-ikan matemo ka' mabusikmo.

YESAYA 59:15

Madi'mo ko mian anu hodi' na kinyonyoanyo, ka' ihe na anu mati kojo'onmo ipalabuatan ma'idek, posi ia na montanggungi palabuatan anu ma'idek.” Tinoamo nu Tumpu, ka' madi' sanang na Ia, taalu' madi'mo daagi' ko ka'adilan.

YESAYA 59:7

Belemiu saja' balatanga' mombau anu ma'idek ka' gagalan sampa obau. Madi' bata-bata na belemiu mompatei mian anu madi' ko sala'nyo. Mau moya na belemiu mamba, belemiu mompala'i anu singkapmo ma'idek tiba kasilaka'an.

YESAYA 65:12

Belemiu iwi-iwi' silakamo salakumo koloban kalana panggaga. Kalana, salatan Aku nolagamo, belemiu madi' nontaami, ka' salatan Aku notatae, belemiu madi' mompotombihing. Belemiu lebe mongka'ima'i monggagakon Aku ka' mombau anu ma'idek.

YESAYA 65:2

Aku saja' tataap sadia molabot miana nu palesayamo hi beleng-Ku, aha mongka'ima'i saja' panggaga. Bansa aijo' mombau palabuatan anu ma'idek ka' mombatuki posi tanga'an nu aha.

YESAYA 65:3

Aha saja' mombau anu moko potambuha' Aku kalana monsombahkonmo koloban i ale' nu aha hi to pilo-pilogot ka' nompapuimo kamangian i mezbah ponsombahkonan haha aijo'.

YESAYA 65:7

kalana dosa' nu aha ka' dosa' nu mompolee' nu aha. Aha nompopo'ambangmo Aku kalana nompapumo kamangian i puge'nyo tampat ponsomban to pilo-pilogot. Aku mombalosije aha sitimbang tiba palabuatan anu lewa'mo binau nu aha.”

YEREMIA 35:17

Kalana aijo' Aku, Tumpu Anu Mahakuasa, Tumpu Allah Israel, mompotokamo mae aiya hi belemiu – mian nu Yehuda tiba Yerusalem – iwi-iwi' na balaa' anu tinantukan-Kumo mongkona belemiu, susumo anu pinoto'ing-Kumo. Han aijo' Ku baumo kalana belemiu madi' mongka'oho' mohongo-hongo de Ku poto'imo hi belemiu, ka' belemiu madi' mongka'oho' montaami salatan Ku lagamo na belemiu.”

YEREMIA 7:13

Maumo ahi' Ku po uli-ulitmo na motatae hi belemiu, panyo belemiu madi' ahi' mongka'oho' mompotombihing mae. Belemiu mombau dosa' aijo' iwi-iwi' ka' madi' mongka'oho' montaami de Ku lagamo.

YEREMIA 7:30

Aha mian nu Yehuda nombaumo palabuatan anu ma'idek. Pilogot nu aha anu singkap Ku ka'ideki aijo' pinaha po una'mo nu aha i uno nu Laigan-Ku sahingga nohenyuimo.

YEHEZKIEL 11:8

Te belemiu mongkabuhuk bajak! Ku potokamo mae na to mia-mian anu momboa mae bajak da montumbuhimo belemiu.

YEHEZKIEL 14:4

Kalana aijo' poto'i hi aha taalu' Aku, Tumpu Anu Matangkas na Kuasanyo mompotuunmo sumo uuka, ‘Toto samian na aha Israel anu nompopalesayamo butong nu aha hi pilogot ka' nompobee'mo butongnyo nanabu' i dosa' lantas tokamo mae momoita pokinde' hi samian na nabi, Akumo ahi' na montaami nu pontaami anu sabenannyo ahi' kona hi topilo-pilogot nu aha aijo' manjo-manjoo'.

YEHEZKIEL 20:25

Lapas aijo' binee'-Kumo hi aha na atulan-Ku iwi-iwi' anu madi' ma'ima' tiba iwi-iwi na palentah-ngKu anu madi' mombee'i kantumuu'an.

MATIUS 24:24

Kalana tokaje mae na anu momposalamat padahan anu madi' totu'u, ka' to nabi-nabi anu madi' totu'u. Aha mombau palabuatan-palabuatan anu o palias, ka' hahan anu okabangangi bau pongakali, de timbali, mau mian anu palesayamo hi Tumpu suele.

1 SAMUEL 8:19

Panyo bansa Israel haha aijo' madi'mo mongka'oho mompajuli potatae i Samuel, ola mule' ahi' aha notatae, “Bakasmo! Maumo pa' mosia kami mongkahanda'imo tomundo'.