YESAYA 66:12 - KITAB NU TUMPU ALLA LELE MA'IMAI'

¹² Kalana Tumpu notataemo, “Belemiu Ku bee'ije kabilahian susumo kaunyo anu mo'ili; kakaya'an nu to bansa-bansa nuboaje mae hi belemiu susumo kanyo anu mosawe'mo. Belemiu sumomo anak anu oposusu ka' otangkung nu tinanyo, ka' osapu-sapumo aijo' tangku-tangkung hi ia.

YESAYA 66:12 ပူးပေါင်းရင်းမြစ်များ

YESAYA 14:2

Manjoo' na bansa montulungimo bansa Israel da minsusule'mo ilipu' anu binee'mo nu Tumpu hi aha ka' ikiijo' mae bansa haha aijo' baumo posaihon nu aha Israel. Israel mompahahakopakonmo aha to mia-mian anu toho'mo nohakop ia ka' mule' mompalentahmo aha to mia-mian anu toho'mo nonsakisa i uno nu pakalaja'an.

YESAYA 26:3

O, Tumpu Belento nombee'imo mae kadamean ka' mule' kantumuu'an anu ma'ima' hi mian anu mahoson nakinyonyoanyo, kalana ia palesaya hi Belento.

YESAYA 33:21

Tumpu mompotoamo katalasanggoan-Nyo hi kita. Kita tumuu'mo isonibi nu kaunyo anu bola, kapan nu anu monsampobali' madi' moko ala talabut kiijo'.

YESAYA 45:14

Tumpu notataemo hi Israel, “Alamo na hasin nu tano' Mesir tiba kauntungan nu aha Sudan. Aha to mia-mian nu Syeba anu toto hoso-hoson, belemiumo, na tumpunyo; aha lumajang aitu mae ihiku nu belemiu hau-haunyo pinungumo nu lante' besak. Aha tolodadupumo ka' mongakuimo, ‘Tumpu totu-totu'u daagi' ko anu atina' hi belemiu; madi' ko tumpu sanga'at ola ahi' Ia aijo'!

YESAYA 48:18

De bisuanyo beleyum mongintomakon ahi' palentang-Ku, saba' kantumuu'an nu balayum ma'ima'mo susumo kaunyo anu madi'mo toho' mo'oti, ka' mule' kadale'an nu beleyum sumomo bokon akaong i ambai, anu madi' toho' belenti.

YESAYA 54:13

Iwi-iwi' na mian anu jojoong hi beleyum timbalimo to muli-mulid-Ku, aha sanangmo ka' bilahimo na kantumuu'an nu aha.

YESAYA 54:3

Beleyum mompaka ewamo kowi ka' koanan, belemiu monjojoongimo tano' nu to bansa-bansa ka' monjoongimo kota' haha aijo' anu uuka aiya i liingmo hondo.

YESAYA 59:19

Kuasa tiba kaholomatan-Nyo nukabuhuk nu mian iwi-iwi' lengkat mae i kabete'an toka-toka i kinsoban. Ia toka mae mimbalu-balu' kaunyo anu mabohos, anu kinembongmo mae nu baleba' anu makansang hondo.

YESAYA 60:16

Beleyum nu potuu'mo nu to bansang-bansang tiba to tomu-tomundo', susumo samian na tina nu anak mompotuu' anaknyo. Sahingga nusumbu'je nu beleyum saba' Aku ahi'na Tumpu anu Nomposalamatmo beleyum ka' saba' Tumpu ahi' nu Israel na anu mahoson nonompobebasmo beleyum.

YESAYA 61:6

Belemiu osanggohije posaihon nu Tumpu ka' osanggohimo imam nu Tumpunto. Belemiu mongoa'ije kakaya'an nu to bansa-bansa ka' bilahimo kalana halata' nu aha.

YESAYA 66:11

Belemiu mongoa'ije ka'ima'an nu kantumuu'an, susumo samian na anak monsusu hi tinanyo.

YESAYA 9:6

Ia mompalentah salaku tomundo' lee' mae i Daud, kakuasa'annyo daka' hondo. Lipu'nyo saja'mo dame ka' mohumpakmo kantumuu'an ma'ima'; pamalentahannyo montoongi atulan tiba ka'adilan mulai uuka aiya sampe toka sidu-sidutu'. Tumpu Anu Daka' na Kuasanyo na tionyo mombau aijo'.

YESAYA 9:7

Tumpu nonabu'akonmo hukuman hi aha kalaja'an Israel.

YEREMIA 33:6

Panyo saidi' mae po ule'mo Ku bau susumo u'utu mae momonanyo na ka ada'an nu kota' aiya tiba miannyo anu ikiijo'; aha po ule'mo mahoson mule'. Ku bee'imo na aha kantumuu'an anu sanang ka' mule' madi'mo ko anu lewa' mompoposia aha.

HAGAI 2:9

Laigan-Ku anu salaje binau lebemo hondo ma'ima' molingkuduimo anu u'utu mae, ka' ia aiya Ku bee'imo ka'amanan ka' mule' kabilahian i uno nu kantumuu'an hi aha bansang-Ku.” Tumpu Anu Daka na Kuasanyo na notataemo.