YESAYA 5:2 - KITAB NU TUMPU ALLA LELE MA'IMAI'

² Nu pansun na tano'nyo ka' nu paha alini na batunyo. Sinu'annyomo na anggur anu pinile'annyomo ka' binaunyomo na laigan tangka-tangkas bau ponjagaian. Kinekenyomo sa'angu' na bolo' da pombauan tampat pompao'an nyo anggur, lantas nu tanda'imo na bua'nyo maha, panyo bua'nyo anu ola anggur anu malosing.

YESAYA 5:2 ပူးပေါင်းရင်းမြစ်များ

2 SAMUEL 7:10

Ka' mule' kona hi aha mian Israel anu pinalesayamo hi belengku tinoukan-Kumo na tampat ka' Kupalentahmo na aha jojoong ikiijo' da aha tumuu' madi'mo ko anu mompoposia. Salatanmo pe'e aha tinoka u'utu mae i tano' aiya ka' Aku nohangkatmo to pola-polaya' nu aha, aha tinumbuhanmo nu to mia-mian anu toto ue-uesan panyo aijo' madi'mo po ule' jadi. Aku balajanji' saba' beleyum madi'mo ko anu monsampo bali' ka' ko anu mompoposia ka' Ku bee'imo tulunan na beleyum.

NEHEMIA 13:15

Tempo'nyo aitu tinoangkumo i sinaa nu Sabat daagi' ko mian nu Yehuda pa' aha sangkuka nompao'mo anggur. Daagi' mule' ko mian sangga'at anu momposake'mo gandum, anggur anu noko pao'mo, bua' nu anggur, bua' nu ara ka' balang sangga'at aijo' i keledai nu aha ka' binoamo nu aha i Yerusalem. Tinewa'kumo na aha mobalu-baluk i Yerusalem.

MAZMUR 80:8

O, Tumpu, Anu Daka na Kuasa-Nyo po'ule' mae pokopianiakon na kantumuu'an mami; polibos mae na montoa kami, da kami salamat.

MAZMUR 80:9

Mian anu palesayamo hi Belento sumomo kau' anggur anu i lalinmo mae nu Belento lengkat mae i Mesir. Bansa haha aijo' sangga'at i laa'mo nu Belento, lantas sinu'anmo nu Belento na kau' aijo' i lipu' nu aha.

NOSABATMO 33:16

Mosia na mian monsumbu' taalu' Belento sanang hi belengku ka' hi bansa aiya de belento madi' montulungi kami? Tumpu saja' hingga-hinggat tiba kami aijo'mo na salaku tanda saba' kami madi' pokakana tiba bansa-bansa sangga'at i dunia aiya.”

YESAYA 1:8

Ola Yerusalem na madi' ingidean, panyo susumo kota anu tinumbuhan mo, ka' madi'mo noko ala gawe, susumo tahop i ale' nu anggur ka' tahop i ale' nu kantimun.

YESAYA 5:7

Kalana ale' nu anggur nu Tumpu Anu Daka na Kuasanyo aijo'mo aha mian nu Israel, ka' aha mian nu Yehuda aijo'mo na anggur anu sisinu'an-Nyomo. Aijo'mo hi aha na pontaha'imanian-Nyo ka'adilan panyo ola mule' ahi' kabuhingison. Aha na Nu taha'imani montoongi totu-totu'u anu hondo padahan ola mule' ahi ko anu aijo' hi aha na momoita ka'adilan.

YEREMIA 11:17

Akumo na nompotinjo Israel tiba Yehuda, Aku, Tumpu Anu Mahakuasa. Panyo uuka aiya Aku ko kahanda'mo mompotoka mae balaa' hi aha. Posi ahamo ahi' iwi-iwi' na nonsaduakon aijo', kalana aha nombaumo palabuatan anu ma'idek, aijo'mo nonsombahkonmo koloban hi Baal sahingga Aku pinusamo.”

YEREMIA 2:21

Beleyum sinu'an-Kumo susumo kau' anggur anu pinile'an-Kumo ingala ibibitnyo anu ma'ima'. Panyo uuka aiya beleyum nongabali'mo tinimbalimo sosu'anon nu kuhat ka' madi'mo kinokaliangannyo.

HOSEA 10:1

Israel sumomo kau' anggur anu mahampe na bua'nyo. Mompaka panjoo' na kakaya'annyo, mompaka panjoo'mule na mezbah anu nu bau nu aha. Mompaka sanangmo na kantumuu'an nu aha ka' mompaka pa'ima' mule' na aha mombau to pato-patong nu pilogot anu nu sombah nu aha.

MIKHA 4:8

Ka' beleyum Yerusalem tampat nu Tumpu monjagai mian-Nyo anu palesayamo susumo polaya' anu monjagai tompukan nu dombanyo, beleyum po ule'mo timbali puso nu kota' nu kalaja'an nu belemiu susumo u'utu mae momona.

NOMBILANGMO 23:9

Lengkat mae aita' i bungkutnyo iwi-iwi' tinoangkumo na aha; lengkat mae aita' i puge'nyo iwi-iwi' tinanggalakonkumo na aha. Toa, sa'angu' na bansa nosi po'iwi'mo madi' minsoop hi tompukan nu bansa-bansa sangga'at.

MATIUS 21:19

Ia nontoa sangkau na kau' ara i sambiha' nu jalan. Ia namba i pu'unnyo, nu kau' aijo', panyo madi' nohumpak sa'angu' pe'e na bua'nyo, boli mompiakon hohonnyo. Lantas i Yesus notatae i kau' aijo', “Oko madi'mo daagi' mimbua'!” Lau-laus kau' ara aijo' nagayou.

MATIUS 21:33

“Hongo na kantuang anu sa'angu' aiya mule'”, koonyo i Yesus. “Samian na tumpu nu tano' nonsu'ani sa'angu' na ale' nu anggur. Ia nompagan titikub, ka' nongkeke bolo' bau pompo' una'an tampat pompeeti anggur, ka' mule' nompotinjo pontamongian. Lapas aijo', ia nontamboakon ale' nu anggur aijo' hi aha anu mokalaja, lantas namba i lipu' sangga'at.

MATIUS 21:34

Salatan tinokamo na tempo'nyo nu pontipuan bua'nyo nu anggur, tumpu nu tano' aijo' nonsai to posa-posaihonnyo mamba hi anu mongkalaja ale' aijo', da montalimakon baginyo.

MARKUS 11:13

Daagi' majo'on Ia nontoamo sampu'un na kau' ara, hoonnyo talalo booko'. Jadi Ia namba i pu'unnyo aijo' da montoa pa' ko bua'nyo. Panyo salatan Ia tinoka i pu'unnyo aijo', Ia madi' nontoa apa-apaa, sambiha'nyo to ho-hoonnyo, sabab tempo'nyo aitu ma'isa pe'e tempo'nyo mimbua' na kau' ara.

MARKUS 12:1

Lapas aijo' i Yesus nontampu'unimo notatae nu kantuang hi to kapa-kapala nu imam, to gulu-gulu' agama ka' to pola-polaya' nu Yahudi. I Yesus notatae, “Daagi' ko samian anu nonsu'ani sa'angu' na ale' nu anggur, lantas nompagan titikub. Lapas aijo' ia nongkeke bolo' da bau pompetian anggur, lantas ia nompotinjo sa'angu' na laigan bau pontamongian. Lapas aijo' tinamboakonnyomo na ale' nu anggur aijo' hi to pia-piangkuka na anu mokalaja, lantas nambamo i kampung sangga'at.

MARKUS 12:2

Salatan tinoka i tempo'mo nu pontipuan bua' nu anggur, mian aijo' nonsaimo samian na posaihon mamba hi anu mokalaja ale' aijo', da montalima bahagiannyo.

ROMA 9:4

Aha mian anu pinile'anmo ka' Tumpu nompotimbalimo aha to ana-anak-Nyo, ka' nompotoamo kuasa-Nyo hi aha. Ia binajanji'mo tiba aha ka' nombee'imo atulan nu agama hi aha. Tumpu nompoto'i hi aha, mosia na aha tionyo balado'a ka' aha mule' nontalimamo anu jinanji'-Nyo.

1 KORINTUS 9:7

Madi' ko suludadu anu mongongkosi posi butongnyo hi aha anu montinjohakon pahampatean! Madi' ko mian topo ale' anu mosu'an anggur i ale'nyo, lantas madi' mongkaan hasin nu anggur i ale' aijo'! Madi' ko polaya' domba anu mompotuu' domba, ka' madi' monginum susu nu domba-dombanyo haha aijo'!

PO'ULE' INGULIT 32:6

Te sumo aijo' na belemiu mombalosi kanonongan nu Tumpu, o to mia-mian anu pinonga'mo ka' madi'mo ko utoknyo? Te misa' Iamo aijo' na Tuuma nu belemiu, anu Nompotimbalimo belemiu, anu nompojadimo belemiu sa'angu' na bansa?

TO MIA-MIAN KOPIAN 16:4

Lapas aijo' i Simson nongka'ima'imo samian na boune anu i Bangka'nyo Sorek. Sanggo nu boune aijo' i Delila.