YESAYA 41:11 - KITAB NU TUMPU ALLA LELE MA'IMAI'

¹¹ Soba toa na mian iwi-iwi' anu notambuha'mo hi beleyum, opatundu'mo ka' ma, ambangmo hondo. To mia-mian anu madi' tulut hi beleyum, silakamo ka' ingkoting.

YESAYA 41:11 ပူးပေါင်းရင်းမြစ်များ

NOSABATMO 23:22

De belemiu tulu-tulutan hi ia ka' mombau iwi-iwi' apaa na anu Ku palentahkon, Aku na mahampate mongewa sampobali' nu belemiu iwi-iwi'.

YESAYA 45:24

To mia-mian saidi' mae montaloakonmo, ‘Ka'adilan tiba kahosonan samata-mata lengkat mae hi Tumpu!’ Iwi-iwi' na mian anu nongka'idekimo Aku, tokamo mae hi beleng-Ku ka' ma'ambangmo.

ANU PINOTO'I HI YOHANES 3:9

O inau' na aiya: To mia-mian anu tinimbalimo mian nu Ibilis aijo', to bale-baleko' anu mangaku butongnyo Yahudi padahan misa', Ku bauje sahingga aha toka tolodadupu i ahop miu. Ka' nu sumbu'je nu aha na Aku taalu' mongkalibosi belemiu.

SISIKON NU TO RASUL-RASUL 16:39

Lantas aha namba nompoita ampun hi Paulus ka' hi Silas, lapas aijo' aha nomboa ua-ua'aha aijo' nosabat lengkat i talungku' ka' nompoita da aha mamba mompala'i kota aijo'.

YESAYA 54:17

Panyo toto sa'angu' na toongon anu tinutukmo mongewa beleyum, madi' kino hasinnyo. Ka' toto sa'angu' na tuduhan i uno nu pomputusianmo palakala nu pobukutimo taalu aijo' sala'. Ku bee'ije palasen salaku tanda imenangmo hi to posa-posaihon-Ku,” sumo aijo' na koonyo nu Tumpu.

DANIEL 4:35

Iwi-iwi' na bansa i dunia aiya madi' ko alati'nyo. Tumpu na mongkuasai malaekat kiita' i suluga' ka' mule' mian anu jojoong i dunia aiya. Madi' ko samian pe'e na anu moko ala monggagakon tanga'an-Nyo, madi' ko anu baani mompokilawa apaa na anu binau-Nyomo.”

NOSABATMO 11:8

Ahennyo i Musa notataemo, “Iwi-iwi' na aha anu ko pangkatnyo anu mokalaja hi belento Tuanku tionyo toka ka' tolodadupu i ahopku ka' momoita da aku ka' bansangku mompala'imo lipu' aiya. Lapas aijo' mambamo na aku.” I Musa sinumpumo hondo lantas pinala'iannyomo na i tomundo.

ZAKHARIA 12:3

Panyo de sinaa aijo' tokamo mae, Ku baumo na Yerusalem susumo batu anu maboat; maumo bansa pa' iya mae na monsoba mohangkat mohumpakmo bahaya. Iwi-iwi' na bansa i dunia aiya mosa'angu'mo montumbuhi Yerusalem.

YESAYA 49:26

Ku potimbalimo na sampobali' nu beleyum da mangoa i baso', sahingga aha mompaha pate-pateimo. Jadi iwi-iwi' na manusia saidi' mae monsumbu'mo, taalu' Akumo ahi', na Tumpu Anu momposalamat beleyum; Anu Mahoson hondo, Tumpu i Yakub Anu nontobusmo beleyum.”

YESAYA 41:29

Memang pilogot haha aijo' madi' kogunanyo, aha na ola ahi' patong anu sinuang anu madi' moko ala mongkohenggo, ka' madi' ahi' moko ala mombau apa-apaa.”

YESAYA 29:8

To bansa-bansa anu sinihukmo kahanda'mo montumbuhi Yerusalem saidi' mae sumomo mian anu nongoa'imo ohop nongipimo na ia au'aitu ia hau-haunyo mongkaan lantas nobulamo padahan kompong madi'mo ko isinyo kabai susumo mian anu inegotmo nongipimo na ia au'aitu ia hau-haunyo monginum lantas nobulamo padahan gogohong pinakamo.

YESAYA 41:24

Memang ahi' belemiu ka' mule' palabuatan nu belemiu imadi'an ahi', ka' anu nusombah nu belemiu ola da okaideki.

YESAYA 40:17

Iwi-iwi' na bansa madi' ko alati'nyo hi Ia, pokakanamo ahi' madi' ko anu i ahop-Nyo.

YESAYA 17:13

Aha nolambanimo mae sumomo ahi' iaba' anu okabuhuk. Panyo Tumpu nompahatakutmo aha, lantas aha nopalaimo sampe najo'onmo. Aha iloloi'mo sumomo ahi' ota' i, ampinyo nu bungkutnyo anu ilahabakonmo nu tombusisi'.

YESAYA 29:5

Panyo iwi-iwi' na mian anu lengkat mae isalipu'an ka' talalo buhingison aijo' saidi' mae madi'mo daagi' otoa susumo abu' kabai ota' anu nu puhimo nu mombun. Anu saintotolo ahi' tobungmo mae ka' anu madi' osangka-sangka.

YESAYA 29:7

Lantas iwi-iwi' na gombuan nu suludadu nu aha anu isalipu'an mae montumbuhimo Yerusalem, kota' nu mezbah nu Tumpu, iwi-iwi' na anu nontikumo ka' anu nontumbuhimo kota' aijo' saidi mae madi'mo daagi' otoa susumo anu ola ingipi pihi-pihi.

YESAYA 34:12

Madi'mo ko tomundo' mompalentah lipu' aijo' ka' iwi-iwi' na to pola-polaya'nyo imadi'anmo.

YESAYA 40:2

Potenangmo nakinyonyoa nu aha Yerusalem, poto'i taalu' tobotuanan imadi'anmo. Kasala'an nu aha ingampunan-Kumo, iwi-iwi na dosa nu aha ihukum-Kumo lipat pinduan.”

YESAYA 54:15

De beleyum otumbuhi mae misa' Aku na nonsai, maumo pa' ihe na molambani mae beleyum tionyo ahi' motua'mo.

YEREMIA 2:3

O Israel, beleyum ola Aku na tumpunyo, batu nu kinyonyoangku anu Ku kanonongi. Ku potokamo mae na balaa' hi aha iwi-iwi' nonsaduakonmo beleyum da sinansala, Aku, Tumpu notataemo.”

NOSABATMO 12:29

Tonga-tonga' pahu aijo' Tumpu nompateimo iwi-iwi' na anak mo'ane anu tumpe hi bansa Mesir, lengkat pe'e hi anak nu tomundo toka-toka hi to ana-anak nu mian anu tinalungku'mo. Iwi-iwi' na potuu'on anu inganakakon momona suele pinatean.

YESAYA 49:25

Tinaamanmo nu Tumpu, “Aijo'mo na saidi' mae jadi. Mian anu ihakop nu to tale-talenga' po ule'mo o, agoi. Balang anu nu mian singgi po ule'mo opahuhuakon. Kalana Akumo na mongewa sampobali' nu beleyum; Ku posalamatmo na to ana-anak nu beleyum.

YEREMIA 12:17

Panyo bansa anu madi' mongka'oho' montuluti Aku, saidi' mae Ku gautakonmo susumo sosu'anon ka' Ku ingkotimo. Aku, Tumpu notataemo.”