YEREMIA 9:16 - KITAB NU TUMPU ALLA LELE MA'IMAI'

¹⁶ Aha Ku bee'mo hi to bansa-bansa anu madi' nu sumbu' nu aha kabai mompolee' nu aha. Saja'mo Ku sai na suludadu anu montumbuhi aha sampe Ku pateimo na aha ingko-ingkot.”

YEREMIA 9:16 ပူးပေါင်းရင်းမြစ်များ

NEHEMIA 1:8

O Tumpu, o'inau' na potatae nu Belento anu tinaeakonmo i Musa apaa na anu pinalentahkonmo nu Belento, tukoonto, de kami mian nu Israel madi' tulu-tulutan hi belento, kami obagi-bagimo nu Belento mamba i bansa-bansa sangga'at.

MAZMUR 106:27

Lee' nu aha oboamo i lipu' nu to bansa-bansa sangga'at, ka' oga'a-ga'atakonmo mamba oboa i lipu' nu mian anu i salipu'an.

ANU MOMPOLELE POTATAE NU TUMPU 12:5

Belemiu mabuhuk na mindako i bungkutnyo anu matangkas; ka' lumajang obala ingati ahi'. Ubak nu beleyum inguanonmo ka' tengke nu beleyum nu hela'mo salatan lumajangmo; sahingga lipunmo na kahanda' tiba anu okamilui. Kita mambamo i tampat kajojoonganto anu imihi-mihinyomo, to mia-mian anu tinokanmo nu kapatean ka' lewa'mo montando'i tutuus jalan.

YEREMIA 13:24

Ku ga'a-ga'atakonmo na belemiu susumo ota' nu tilabakonmo nu mombun anu lengkat mae ipadang tampat anu mateges.

YEREMIA 24:10

Ku potokamo hi aha na pahampatean, kasusa'an i anu okaan, ka' panyakit anu molele sahingga aha ingko-ingkot silakamo ka' madi'mo daagi ko anu tontuha' ilipu' aiya anu binee'-Kumo hi aha ka' hi mompolee' nu aha.”

YEREMIA 25:27

Lantas Tumpu notataemo mae hi belengku, “Poto'i hi aha mian haha aijo' taalu' Aku, Tumpu Anu Balakuasa Tumpu Allah Israel mompalentah aha da monginum sampe malangu ka' sola' molua'i. Ku usahakon na aha da tombahangkang ka' madi'mo daagi' po ule' mobula kalana pahampatean anu Ku potokamo mae hi aha.

YEREMIA 29:17

Tumpu Anu Balakuasa hondo notataemo, ‘Ku potokamo mae na pahampatean, kasusa'an i anu okaan, tiba panyakit anu molele hi aha. Aha Ku pojadimo susumo bua' nu kau' ara anu nahutakmo hondo sahingga madi'mo timbali okaan.

YEREMIA 44:27

Aku bala usahamo da belemiu silakamo ka' madi'mo mohumpak ka'ima'an i uno nu kantumuu'an, sampe belemiu silakamo iwi-iwi' mau pa' kalana pahampatean kabai kalana panyakit anu molele.

YEREMIA 7:29

Tumpu notatae, “O mian anu jojoong i Yerusalem, pongoa'imo susa' kalana ko anumo silaka! Guntingimo na ubak nu beleyum ka' alinmo! Nyanyiakonmo na nyanyian nu montando'i aita' mae ibawo nu to bungku-bungkutnyo, kalana Aku, Tumpu notambuha'mo ka' madi'mo nongala belemiu iwi-iwi'.

YEREMIA 8:19

Hongo ahi' isongko-songko nalipu' kinolongnyomo kihis tiba haang nu bansangku mompokilawa, “Pa' madi'mo daagi' ko Tumpu kiita' i Sion? Iyamo mae na tomundo'nyo uuka aiya?” Tinaamanmo nu Tumpu, tomundo' nu aha, “Kadaka' belemiu tinolodadupumo monsombah to pilo-pilogot anu madi' hondo-hondo ko gunanyo? Kadaka' sinakitanmo nu belemiu na kinyonyoang-Ku nononsombahmo to pilo-pilogot?”

YEHEZKIEL 11:17

Aku, Tumpu Anu Matangkas na Kuasanyo mompoto'imo taalu' Aku momposihukmo aha anu kiijo' mae nobagi-bagimo itampat nu aha lantas po ule'mo monsule'akon tano' nu Israel hi aha.

YEHEZKIEL 12:15

De aha Ku ga'a-ga'atakonmo oboa hi aha bansa-bansa sangga'at i iwi-iwi na lipu' nu mian anu isalipu'an atina'je ka' nusumbu' nu aha taalu' Akumo ahi' na Tumpu.

YEHEZKIEL 14:17

Sahingga Ku potokamo mae na pahampatean ilipu' aijo' ka' Ku pakatumo mae na toongon anu bau pahampate toto heba-hebat da bau pompatei manusia kabai binatang.

YEHEZKIEL 20:23

I padang tampat anu kaho bone'nyo aijo', suele Aku nompohosonmo nu sumpa' tukoong-Ku, Ku ga'a-ga'atakonmo na aha mamba isongko-songko na dunia,

YEHEZKIEL 5:12

Obagi totolu' na mian anu jojoong atina' hi beleyum sambagian na silakamo kalana panyakit anu molele ka' kalana balaa' kasusa'anmo i anu okaan na toka mae ikota' atina'. Sambagian opateimo nu bajak isambiha'nyo nu kota' ka' sambagian mule' Ku taumo mamba i iwi-iwi na tampat ka' Ku loloi'mo nu bajak.

YEHEZKIEL 5:2

Sambagian tionyo ahi' nu papui itotonga' nu kota' aijo' de lapasmo na otumbuhi. Ka' sambagian mule' tionyo ahi' nu posusuk i bajak nu beleyum lantas nu lajangakonmo titikup ikota' aijo'. Ka' mule' sambagian anu imihi-mihinyo tionyo ahi' nu sambuangakon mokiita' ilanga, lantas Ku loloi'mo nu bajak-Ku.

IMAMAT 26:33

Ku podaagi'mo na pahampatean i lipu' nu belemiu ka' mongga'aga'atakonmo mamba i lipu' nu mian anu i salipu'an. Ale' nu belemiu madi'mo okalaja, ka' kota-kota' nu belemiu opojohokmo me susumo tambulan nu apa-apaa.

AMOS 5:16

Tumpu Anu Daka' na Kuasanyo notatae, “I iwi-iwi na jalan nu kota' mian saja'mo humang ka' lewa'mo molibos. Ka' anu topo ale' i lagamo da montando'i tiba to mia-mian anu tinamboan da montando'i mian anu silakamo.

MIKHA 2:4

Nasib nu belemiu nu gunakonmo nu mian bau ponsindin ka' aha mongajanmo nyanyian anu onyanyiakon de ko anumo silaka, sumo uuka, ‘Tumpu nonsilakaimo lipu' mami aiya ka' mule' nombee'mo hi aha anu nomboamo kami. Kami memang ahi' ihansunmo totu-totu'u.’ ”

ZAKHARIA 7:14

Sumomo ahi' tambusisi' na Aku nonsapui aha, sahingga aha talapakisa jinojoongmo ahi' i lipu' nu aha anu i salipu'an mae. Tano' anu maomuk iliingmo hondo ka' madi'mo ko anu monjojoongi ka' mule' kinuunmo.”

PO'ULE' INGULIT 28:25

De belemiu madi'mo montuluti Tumpu Allah nu belemiu, Nu potimbalimo na belemiu da nuhungku'imo nu sampobali' miu iwi-iwi'. Belemiu montoukaimo ahi' totu-totu'u montumbuhi panyo ola ahi' malai ka' mosungkehet. Iwi-iwi' na bansa i dunia aiya mabuhukmo na montoa belemiu anu sinusa'mo susumo aijo'.

PO'ULE' INGULIT 28:36

Belemiu ka' tomundo nu belemiu nuboamo nu Tumpu i lipu' nu mian anu i salipu'an anu madi' osumbu' nu belemiu ka' suele madi' osumbu nu mompolee' miu. Ikiijo' mae belemiu mompalesayamo to pilo-pilogot anu kau' ka' batu na binau.

PO'ULE' INGULIT 28:64

Tumpu mongga'a-ga'atakonmo belemiu mamba hi bansa-bansa anu i songko-songko na dunia aiya. Ikiijo' mae belemiu monsombahmo to pilo-pilogot anu kau' ka' batu na binau, to pilo-pilogot anu madi' osumbu' nu belemiu ka' suele madi' nusumbu' nu mompolee' nu belemiu.

PO'ULE' INGULIT 32:26

Aku kahanda'mo mompatei aha iwi-iwi', da aha madi'mo lewa' o inau'.

PO'ULE' INGULIT 4:27

Nubagi-bagimo nu Tumpu na belemiu mamba i to bansa-bansa sangga'at ka' me sangkiding na belemiu anu daagi' tumuu'.

YAKOBUS 1:1

To utu-utus mian anu palesayamo hi Tumpu iwi-iwi', anu nobagi-bagimo i songko-songko na dunia! Salam do'a lengkat hi belengku, i Yakobus, posaihon nu Tumpu ka' posaihon i Tumpu Yesus Kristus.