YEREMIA 9:10 - KITAB NU TUMPU ALLA LELE MA'IMAI'

¹⁰ Aku, i Yeremia notatae, “Aku humangmo ka' susamo na kinyonyoa kalana padang tampat nu hemput anu mateges ka' aita' ibungkutnyo iwi-iwi' anu nanggasmo kinumahengkengmo ka' mule' madi'mo tinulu nu mian. Lewo' nu potuu'on madi'mo daagi' ko anu ihongo, binatang anu lumahap tiba binatang-binatang sangga'at nopalaimo ka' imadi'anmo.”

YEREMIA 9:10 ပူးပေါင်းရင်းမြစ်များ

YESAYA 41:15

Soba toa, pinotimbalimo nu Beleyum na aku susumo dopi' anu bau pongututan, anu salaje binau, matajom ka' kobese'nyo uanjiji' Beleyum mongututmo bungkutnyo iwi-iwi' ka' mohansunimo; puge'nyo iwi-iwi' nu potimbalimo susumo ota'.

YESAYA 49:19

Lipu' nu beleyum anu kinunmo ka' iliingmo hondo uuka aiya binunsokmo hondo hi aha to mia-mian anu kahanda' monjojoongi. Ka' aha to mia-mian anu kahanda'mo mompatei beleyum, nambamo jo'o-jo'on nompala'i beleyum.

YEREMIA 12:10

Nanjoo'mo na anu balakuasa lengkat mae isalipu'an nongideimo ale' nu anggur-Ku ka' sola'mo nompahampeja'akon ale'-Ku. Lipu'-Ku anu ma'ima' hondo binali'anmo nu aha sahingga tinimbalimo padang tampat anu mateges ka' iliingmo.

YEREMIA 12:11

Ya, tinoang-Kumo na aha nompojadi lipu'-Ku tampat anu iliingmo hondo ka' nonsusa'imo kinyonyoang-Ku. Iwi-iwi' madi'mo ko anu nongkalesang, madi'mo ko anu nompalahatikan.

YEREMIA 12:4

Daagi' toka hipian na kopinnyo lipu' aiya manggasmo ka' hemputnyo magayoumo i iwi-iwi na ale'? Tomonsi' tiba binatang sangga'at natemo kalana palabuatan ma'idek nu bansa mami. Aha notatae, tukoonyo nu aha aku madi'mo montoa pa' mosia na ka ahenannyo saidi' mae na aha.”

YEREMIA 14:6

Aita' mae ibawo nu bungkutnyo keledai anu ma'ela' memo ahi' saintinjo, matanyo ihuyu'mo kalana madi'mo ko hemputnyo; ia ihahunsa'anmo susumo serigala.

YEREMIA 2:15

Sampobali'nyo mohu'akonmo ia susumo singa tano'nyo opokunmo ka' madi'mo daagi' ko isinyo iwi-iwi' na kota'nyo mingkotmo nu toyo'i nu apu opojohokmo madi'mo ko anu monjojoongi.

YEREMIA 2:6

Aku madi'mo pinajulian; Aku na nontakamo aha ijalan, ka' nomboamo aha nosabat lengkat mae i Mesir nontulu padang tampat anu bone'on, daerah anu kinunmo ka' kaho lingkobaknyo, ka'mule' nanggasmo ka' okabuhukmo – padang tampat anu madi'mo ojojoongi ka' madi'mo daagi' otului!

YEREMIA 23:10

Lipu'to aiya nobuke'mo nu mian anu madi' tulu-tulutan hi Tumpu. Kantumuu'an nu aha saja'mo mombau anu ma'idek ka' sinala'mo na monggunakon kakuasa'an nu aha. Kalana kutuk nu Tumpu, sahingga hemput ipadang anu mateges nanggasmo ka' songko-songko na lipu' ihumangmo.

YEREMIA 50:3

Sa'angu' na bansa lengkat mae isasu utara tokamo mae montumbuhi Babel ka' mompojadimo lipu' aijo' timbali padang tampat anu kunmo. Manusia tiba binatang anu ikiijo' mopalaimo, ka' madi'mo daagi' ko anu jojoong ikiijo' mae.”

YEREMIA 7:29

Tumpu notatae, “O mian anu jojoong i Yerusalem, pongoa'imo susa' kalana ko anumo silaka! Guntingimo na ubak nu beleyum ka' alinmo! Nyanyiakonmo na nyanyian nu montando'i aita' mae ibawo nu to bungku-bungkutnyo, kalana Aku, Tumpu notambuha'mo ka' madi'mo nongala belemiu iwi-iwi'.

YEREMIA 8:18

Kinyonyoangku sumomo sinaya-saya' ka' nalanitmo, kaduka'anku madi'mo opoko pakuli'i.

MOHAANGI 1:16

Aitu na sababnyo sahingga matangku i lolu'onmo, madi' ko anu mombee'i bau pombikas ka' mombee'i potatae anu moko sanang na kinyonyoa. Madi'mo daagi ko apa-apaa hi bansangku, kalana sampobali' na lebe balakuasa.

MOHAANGI 2:11

Matangku binangkakmo kalana aijo'mo ihumaang santuu'ku sinakisamo hondo Kinyonyoangku i hansunmo hondo na nontoa bansaa nahungku'mo montoa to ana-anak tiba bungamea' pinoso'mo tutuus jalan nu kota'.

YEHEZKIEL 14:15

Sahingga Ku potokamo mae na binatang anu toto maha-mahangas da monsa'u mian anu jojoong ilipu' aijo' sahingga daerah aijo' okabuhukmo hondo ka' madi' ko mian anu baani motulu ikiijo'.

YEHEZKIEL 29:11

Madi'mo daagi' ko manusia kabai binatang anu motulu ikiijo'. Patompulu' nataun na kinopinnyo madi'mo daagi' komian anu monjojoongi.

YEHEZKIEL 33:28

Lipu' aijo' Ku pojadimo padang tampat anu mateges ka' liingmo, ka' kakuasa'an nu kabubunakon nu aha aijo' mingkotmo. To bungku-bungkutnyo nu Israel timbalimo liing hondo, sahingga madi' ko mian anu baani motulu ikiijo'.

YEHEZKIEL 6:6

Iwi-iwi' na kota' nu aha Israel ohansunimo, iwi-iwi' na mezbah tiba pilogotnyo o'ideimo ka' oposungkehetmo, anu sola'pompapuan kamangian obiha-biha'mo, ka' mule' iwi-iwi apaa na anu binaumo nu aha madi'mo daagi' otoa.

HOSEA 4:3

Kalana aijo' lipu' aiya timbalimo mateges ka' batu-batu anu tumuu' ikiijo' matemo. Batu-batu binatang anu i langa ka' i katano'an ka' i ambai mohopu'mo.”

YOËL 1:13

O to imam-imam anu mokalaja i mezbah pakemo na hude kalung ka' haangmo. Pinsoopmo i Laigan nu Tumpu da montando'i sampa-sampahu, kalana madi' ko koloban anggur ka' gandum anu osombahkon hi Tumpu nu belemiu.

YOËL 1:19

Aku momoita tulung i Belento O Tumpu kalana to pada-padang hemput i nanggasmo totu-totu'u. To kau-kau' suele i nanggasmo ka' natemo mimbalu-balu'mo kinaanmo nu apu.

AMOS 5:1

Potombihing mae mian nu Israel! Aku kahanda'mo monyanyiakon hi belemiu sa'angu' na nyanyian de ko anu silaka:

AMOS 5:16

Tumpu Anu Daka' na Kuasanyo notatae, “I iwi-iwi na jalan nu kota' mian saja'mo humang ka' lewa'mo molibos. Ka' anu topo ale' i lagamo da montando'i tiba to mia-mian anu tinamboan da montando'i mian anu silakamo.

MIKHA 2:4

Nasib nu belemiu nu gunakonmo nu mian bau ponsindin ka' aha mongajanmo nyanyian anu onyanyiakon de ko anumo silaka, sumo uuka, ‘Tumpu nonsilakaimo lipu' mami aiya ka' mule' nombee'mo hi aha anu nomboamo kami. Kami memang ahi' ihansunmo totu-totu'u.’ ”

MIKHA 3:12

Kalana palabuatan nu belemiu anu ma'idek aijo', Sion opajekomo susumo ale'. Yerusalem timbalimo tambulan nu laigan anu i hansunmo ka' mule' puge'nyo aita' pipinombauan Laigan nu Tumpu timbalimo alas ka' hemputonmo.