YEREMIA 7:18 - KITAB NU TUMPU ALLA LELE MA'IMAI'

¹⁸ To ana-anak mongato mae kau' anu oposun, to momo'ane momposun apu ka' to bou-boune monggalo anu okompo-kompon bau kukis anu pontalakani pilogot anu osa-osanggohi nu aha Tomundo boune nu Suluga'. Ka' da bau ponsakiti nu aha kinyonyoang-Ku aha nonsombahkonmo anggur hi to pilo-pilogot sangga'at.

YEREMIA 7:18 ပူးပေါင်းရင်းမြစ်များ

1 TOMU-TOMUNDO' 14:9

Panyo beleyum nombaumo kalakuan anu lebe ma'idek molingkudui apaa na anu binaumo nu aha anu nompalentahmo tempo'nyo ma'isa pe'e kino beleyumnyo nompalentah. Beleyum nohikumo Aku sahingga Aku pinusamo kalana nombaumo bapilogotan ka' mule' to pato-patong tambaga da osombah.

1 TOMU-TOMUNDO' 16:2

'Naipuan mae beleyum misa' mian anu talasanggo, panyo' beleyum i hangkat-Kumo binau polaya' nu mian Israel anu pinalesayamo hi beleng-Ku. Uuka aiya beleyum binaladosa'mo susumo i Yerobeam ka' nonsaduakonmo mian nu Israel anu pinalesayamo hi beleng-Ku binaladosa'mo, sahingga Aku notambuha'mo.

MAZMUR 16:4

Pojohok na mian anu monsombah to pilo-pilogot mompaka pintuangmo na kasusa'an nu kinyonyoanyo. Aku madi' mongka'oho' mombee' koloban hi to pilo-pilogot, ka' mule' madi' mongka'oho' monsanggo sanggo nu aha.

YESAYA 3:8

Memang Yerusalem madi'mo kino angga'nyo! Yehuda madi'mo tinala sanggo! Kalana iwi-iwi' na potatae tiba palabuatan nu aha madi'mo nontuluti Tumpu ka' madi'mo nompajuli kakuasa'an-Nyo.

YESAYA 57:6

Jadi pantas belemiu nolimu'mo batu malonde lengkat i aijo'. Aijo'mo na bagian nu belemiu! I batu-batumo haha aijo' na pondudu'akonan nu belemiu anggur ka' monsombahkon gandum. Osangka nu belemiu Kuka'ima'i na aijo' iwi-iwi'?

YESAYA 65:11

Panyo misa' sumo aijo' na nasib nu to mia-mian anu nompala'imo Aku, anu madi' mompajuli Sion, puge'-Ku anu susi', anu monsombahkon kaanon hi Gad ka' hi Meni to pilo-pilogot nu ka'untungan ka' nasib nu mian.

YESAYA 65:3

Aha saja' mombau anu moko potambuha' Aku kalana monsombahkonmo koloban i ale' nu aha hi to pilo-pilogot ka' nompapuimo kamangian i mezbah ponsombahkonan haha aijo'.

YEREMIA 1:16

Ku hukumo na mian anu palesayamo hi beleng-Ku, kalana aha binaladosa'mo ka' nohikumo mae Aku. Aha nonsombahkonmo koloban hi pilogot nu aha ka' lewa'mo nombau patong ka' sinombahmo nu aha.

YEREMIA 11:17

Akumo na nompotinjo Israel tiba Yehuda, Aku, Tumpu Anu Mahakuasa. Panyo uuka aiya Aku ko kahanda'mo mompotoka mae balaa' hi aha. Posi ahamo ahi' iwi-iwi' na nonsaduakon aijo', kalana aha nombaumo palabuatan anu ma'idek, aijo'mo nonsombahkonmo koloban hi Baal sahingga Aku pinusamo.”

YEREMIA 17:2

Belemiu mian monsombah aijo' i mezbah-mezbah tiba ohii' nu bapilogotan anu pinotinjomo ponsomban Pilogot boune Asyera itoto sa'angu' na kau' anu tambok na honnyo, ka' mule' aita' mae ibawo nu puge'nyo iwi-iwi',

YEREMIA 19:13

Ingko-ingkot na laigan i Yerusalem ka' mule' ingko-ingkot na laigan nu to tomu-tomundo' i Yehuda timbalimo nahumimi' susumo Tofet; kalana aita' mae ibawo nu laigan haha aijo' pinompapuianmo nu mian kamangian anu sinombahkon hi to pilo-pilogot nu bagian langit, ka' mule' nonsombahkonmo anggur hi to pilo-pilogot sangga'at.”

YEREMIA 25:7

Panyo Tumpu nontaloakonmo tukoo-Nyo belemiu madi' mohongo hongo Ia. Belemiu ola mule' ahi' mompaka bau da Ia motambuha', kalana pilogot nu belemiu haha atina'. Posi belemiumo na mohukum butong nu belemiu atina'.

YEREMIA 32:29

ka nu papuimo nu aha sampe motanggotmo iwi-iwi' tiba laigan anu pinombauanmo nu mian palabuatan anu ma'idek sahingga nonsabapimo da Aku notambuha'mo, kalana aita iloteng nu laigan haha aijo' pinompapuanmo nu aha kamangian anu sinombahkon hi Baal ka' mule' nondudu'akonmo anggur sinombahkon hi to pilo-pilogot.

YEREMIA 44:4

Aku saja'mo nompokau namba hi belemiu to posa-posaihon-Ku aijo'mo to nabi-nabi, anu nontewa' aha da bolimo mombau palabuatan anu ma'idek anu Ku ka'ideki aijo'.

YEREMIA 7:17

Pinosi toamo nu beleyum apaa na anu binaumo nu aha isinin na kota' nu Yehuda ka' mule' isinin na jalan i Yerusalem!

MOHAANGI 5:13

To oli-olitau mami pinakisamo na nokalaja i ponggilingan to ana-anak mo'ane ingutunanmo nu kau' anu sinimbu sampe pinoso'.

YEHEZKIEL 16:26

Mesir anu mompaha ohani beleyum talalo hondo masawala' hi to bou-boune sinampoduhusmo nu beleyum. Tinotonggolakonmo nu beleyum na masala' da Aku motambuha'.

YEHEZKIEL 20:28

Aku nombomo mae aha itano' anu jinanji'-Kumo hi aha. Salatan aha nontoamo puge'nyo haha aita' anu toto tangka-tangkas ka' mule' kau' anu toto tambo-tambok na honnyo aha nomsombahkonmo koloban itampat haha aijo'. Aha nonsaduakonmo da Aku notambuha' kalana koloban-koloban anu opotunu ka' mule' aha nonsombahkonmo anggur nu aha.

YEHEZKIEL 8:16

Lantas binoa-Nyomo na aku i popasan nu Laigan nu Tumpu. Koko pinsoopan mamba mokiijo' i unonyo nu anu susi' i'olot nu mezbah tiba jalan ise-ise' daagi' ko mian aha uampulu' ka' olima'. Aha mohiku unonyo anu susi' ka' tinolodadupumo ka' monsombahmo mongahopi kabete'an i sinaa anu bete'mo mae.

YEHEZKIEL 8:17

Tumpu notatae hi belengku, “O, manusia anu madi' tumuu' batu, tinoamo nu beleyum na aijo'? Aha mian nu Yehuda haha aiya madi' puas de ola mombau hahan anu okahegati haha aijo' ka' palabuatan-palabuatan anu misa'mo palabuatan nu manusia isongko-songko na lipu'. Panyo aha mombau mule' ahi' palabuatan haha aijo' i uno nu Laigan-Ku aiya ka' nonsaduakonmo Aku da nompaka potambuha' mule'. Soba toa mosia na aha mongambangimo mae Aku nu palabuatan anu mahumimi' hondo aiya!

1 KORINTUS 10:22

Kabai o kita mongka'oho' mombau Tumpu ma'idekan na kinyonyoanyo? Te kita lebe mahoson molingkudui Tumpu?

PO'ULE' INGULIT 32:16

Aha nonsombahmo pilogot, sahingga Tumpu notambuha'mo, kalana aha nongka'ima'imo pilogot Ia notambuha'mo kalana aha nombaumo anu ma'idek aijo'.

PO'ULE' INGULIT 32:21

Aha nonsaduakon aku da nontambuha'i anu misa' Tumpu Allah, ka' nontambuha'imo patong nu bapilogotan nu aha. Sahingga Ku potimbalimo na mian anu pinalesayamo hi beleng-Ku da mongka'idekimo anu misa' bansa, ka' montambuha'i bansa anu ponga'.

PO'ULE' INGULIT 4:19

Boli baladosa' kalana monsombah ka' palesayamo hi apaa na anu otoa nu belemiu i langit: batu nu sinaa, bitu'on ka' to manda-mandala'. Tumpu Allah nu belemiu nompojohokmo bansa haha aijo' sangga'at monsombah balang haha aijo'.