YEREMIA 7:13 - KITAB NU TUMPU ALLA LELE MA'IMAI'

¹³ Maumo ahi' Ku po uli-ulitmo na motatae hi belemiu, panyo belemiu madi' ahi' mongka'oho' mompotombihing mae. Belemiu mombau dosa' aijo' iwi-iwi' ka' madi' mongka'oho' montaami de Ku lagamo.

YEREMIA 7:13 ပူးပေါင်းရင်းမြစ်များ

AMSAL 1:24

Belemiu i lagangkumo, panyo belemiu madi'mo montuluti ka' madi'mo mompajuli.

YESAYA 50:2

Kadaka' aijo' aha mian anu palesayamo hi beleng-Ku mau samian madi' ko anu montaami mae, tempo'nyo Aku tokamo mae molaga aha? Pa' ugaat aha ola ahi' momohokot kalana monsangka Aku madi' moko ala mompobebas ka' mule' madi' moko ala momposalamat aha? Padahan mau ola Ku palentah na ambai timbali mo'oti, iwi-iwi na kaunyo timbali Ku pojadi padang tampat anu mateges, sahingga to ika-ikan matemo ka' mabusikmo.

YESAYA 65:12

Belemiu iwi-iwi' silakamo salakumo koloban kalana panggaga. Kalana, salatan Aku nolagamo, belemiu madi' nontaami, ka' salatan Aku notatae, belemiu madi' mompotombihing. Belemiu lebe mongka'ima'i monggagakon Aku ka' mombau anu ma'idek.

YESAYA 66:4

Kalana aijo' Aku suele mombauje yayamo pongka'oho'-Ku ka' mompokonamo hi aha iwi-iwi na balaa' anu nukabuhuk nu aha. Kalana salatan Aku nolagamo madi' ko anu nontaami mae; salatana Ku notataemo madi' ko anu nompotombihing mae; Lebe nuka'ima'i nu aha na panggaga hi beleng-Ku, Aku nombaumo anu ma'idek.”

YEREMIA 11:7

Tempo'nyo Aku nomboamo mompolee' nu aha nosabat lengkat i Mesir, pinokeman-Ku mo na nompokinde'i aha da montuluti Aku. Sampe sinaa uuka mule' Aku daagi' saja' mompokinde'i mian anu palesayamo hi beleng-Ku mongkona han aijo',

YEREMIA 11:8

ka' mompalentah da aha montuluti palajanjian-Ku aijo', panyo aha madi' ahi' mohongo-hongo ka' madi' mongka'oho' montuluti. Ola mule' ahi' aha tataap panggaga balabuat ma'idek susumo naipuan mae. Kalana aijo' iwi-iwi' na hukuman anu tuli-tulis kiijo' i palajanjian aijo' Ku nabu'akonmo hi aha.”

YEREMIA 13:10

Bansa anu ma'idek na palabuatan nu aha aijo' talalo ahi' panggaga ka' madi'mo mae tulu-tulutan hi beleng-Ku. Aha monsombah ka' palesaya hi to pilo-pilogot sangga'at. Mokonyo aijo' aha montihomo lipa' kodo-kodo' aijo' anu madi'mo daagi' ko gunanyo.

YEREMIA 13:11

Susumo lipa' kodo-kodo' sasa-sasa' hoso-hoson ilampeokan nu anu nompake ia, sumo aijo'mo na tanga'an-Ku da mian nu Israel tiba Yehuda sabole-bole ahi' totoong hoso-hoson mae hi beleng-Ku. Tiba jalan anu sumo aijo' aha timbalimo mian anu palesayamo hi beleng-Ku anu mohangkatmo sanggong-Ku da opuji' ka' oholomat. Panyo aha madi'mo ahi' mongka'oho' montuluti Aku.”

YEREMIA 25:3

“Inguampulu' ka' totolu' na taun na kinopinnyo, salatanmo pe'e itaun kinosampulu'nyomo ka' totolu' na i Yosia nompalentah Yehuda anak momo'ane i Amon sampe tinoka isinaa aiya Tumpu notataemo mae hi belengku ka' madi' toho' madi' pinoto'ingku hi belemiu apaa na anu pinoto'i-Nyomo mae. Panyo madi' ahi' pinajulian nu belemiu.

YEREMIA 26:5

Belemiu tionyo mule' ahi' mompotombihing apaa na anu nu poto'i nu posaihon-Ku, to nabi-nabi anu sabole-bole saja' Ku palentah mamba hi belemiu. Panyo belemiu madi' ka'oho' mompotombihing aha.

YEREMIA 29:19

Iwi-iwi' aijo' jinadimo hi aha, kalana aha madi' ahi' montuluti potuunon-Ku anu saja'mo Ku poto'i hi aha anu sola-sola' nu poto'i nu to nabi-nabi aijo'mo to posa-posaihon-Ku. Aha madi' mongka'oho' mompalahatikan potuunon-Ku aijo'.

YEREMIA 32:33

Aha nohikumo mae Aku ka' maumo ahi' Aku salio-liomo aha, aha madi' ahi' mohongo-hongo Aku ka' mule' madi' ahi' ko kasinsumbu'annyo.

YEREMIA 35:14

I Yonadab nontewa'mo lee'nyo da boli monginum anggur ka' tinulutanmo ahi' nu aha na palentah aijo'. Sampe sinaa uuka madi' ko samian pe'e na aha na anu monginum anggur. Panyo Aku na saja' ahi' mompoto'i hi belemiu panyo belemiu madi' ahi' mongka'oho mohongo-hongo.

YEREMIA 35:15

Aku saja'mo nompokau namba hi belemiu iwi-iwi' na posaihon-Ku to nabi-nabi ka' aha nompokinde'imo belemiu da opokopiani na kalakuan nu belemiu ka' da madi'mo mombau palabuatan anu ma'idek. Aha nompokinde'imo belemiu da bolimo monsombah to pilo-pilogot sangga'at ka' madi'mo palesaya hi aha da belemiu tataap ahi' jojoong ilipu' aiya anu binee'-Kumo hi belemiu tiba hi mompolee' nu belemiu. Panyo belemiu madi' ahi' nompalahatikan ka' madi' ahi' nohongo-hongo Aku.

YEREMIA 35:17

Kalana aijo' Aku, Tumpu Anu Mahakuasa, Tumpu Allah Israel, mompotokamo mae aiya hi belemiu – mian nu Yehuda tiba Yerusalem – iwi-iwi' na balaa' anu tinantukan-Kumo mongkona belemiu, susumo anu pinoto'ing-Kumo. Han aijo' Ku baumo kalana belemiu madi' mongka'oho' mohongo-hongo de Ku poto'imo hi belemiu, ka' belemiu madi' mongka'oho' montaami salatan Ku lagamo na belemiu.”

YEREMIA 44:4

Aku saja'mo nompokau namba hi belemiu to posa-posaihon-Ku aijo'mo to nabi-nabi, anu nontewa' aha da bolimo mombau palabuatan anu ma'idek anu Ku ka'ideki aijo'.

YEREMIA 5:21

“Potombihing mae, o belemiu mian anu ponga' ahi taha-tahahumo! Belemiu ko mata panyo madi' montoa, ko bihing panyo madi' mohongo!

YEREMIA 6:10

Tinaamanku, “O Tumpu hihe na potataeanku, ka' ihe na anu ku pokinde'i? Aha panggaga hondo ka' madi' ka oho' mompalahatikan. Nu kokojoi nu aha ka' nu ka'ideki nu aha na potuunon nu Belento anu pinoto'ingkumo hi aha.

YEREMIA 7:25

Salatanmo pe'e mompolee' nu belemiu nosabat mae lengkat i Mesir sampe sinaa aiya Aku saja'mo nongulus to posa-posaihon-Ku, to nabi-nabi namba hi belemiu.

HOSEA 11:2

Panyo lebe Ku laga na anak-Ku aijo' lebe mule' ahi' majo'on na ia hi beleng-Ku. Ia momboa koloban ka' mompapui kamangian osombahkon hi Baal tiba hi pilogot sangga'at.

HOSEA 11:7

ka' madi'mo hondo mohongo Aku. Sahingga aha lewa'mo opalentah, madi' ko anu moko ala mompobebas aha mau ahi' aha moloboo' momoita tulung.”

HOSEA 9:17

Tumpu anu kuku bau na anu nu pokauhakon aijo', madi'mo daagi montalima mian-Nyo anu palesayamo hi Ia, kalana aha madi'mo mongka'oho' montuluti Ia. Aha solidi' mae memo saja' mamba momoya hi to bansa-bansa sangga'at.

ZAKHARIA 7:13

Aku madi'mo nontaami do'a nu aha kalana aha suele madi'mo nompotombihing mae tempo'nyo Aku notatae.

MATIUS 23:37

“Yerusalem, Yerusalem! To nabi-nabi pinateanmo. To posa-posaihon nu Tumpu pinahambunu'akonmo nu batu sampe i nate. Piangkukamo na Aku mongka'oho' molimu' iwi-iwi' mian nu kampungum, sumo tina nu manuk mongokobi sioknyo i aluk nu polipiknyo, panyo komiu madi' mongka'oho'!