YEREMIA 51:53 - KITAB NU TUMPU ALLA LELE MA'IMAI'

⁵³ Maunyomo ahi' Babel timbali moko ala moliba' mokiita' ilangit ka' mombaumo palatahanan anu madi' opko ala otoka, panyo tataap ahi' Ku pokau na mian da mamba mohansuni. Aku, Tumpu, notataemo.”

YEREMIA 51:53 ပူးပေါင်းရင်းမြစ်များ

KAJADIAN 11:4

Koonyo nu aha, “Imbo' da kita mompotinjo kota tiba sa'angu' na menara anu tuu'nyo toka i langit, da kita talasanggo ka' madi' moga'a-ga'at i songko-songko na dunia.”

AYUB 20:6

Maumo ia talasanggo toka-tokamo aita' i langa, na kotangkasnyo, sahingga ubaknyo montokamo kundom,

YESAYA 13:17

Tumpu motataemo, “Kupotukamo i uno nu kinyonyoa nu aha bansa Madai na montumbuhimo Babel, aha madi' opoko ala otamboi nu salaka kabai mosoni'.

YESAYA 41:25

Aku nompotukamo samian anu lengkat mae i sasu kabete'an; Ilagang-Kumo na ia da montumbuhimo mae lengkat mae sasu utara. To mia-mian anu balakuasa nu pahampeja'akonmo susumo hensek, susumo mian anu lewa' mombau kuhon tano' mompahampeja'akonmo tano' ponto.

YESAYA 47:5

Tumpu notataemo hi Babel, “Bolimo mombau apa-apaa, ka' pinsoopmo i uno nu pikat. Beleyum madi'mo daagi' osanggohi ‘Tomundo' boune nu to kalaja'an-kalaja'an.’

YESAYA 47:7

Nu sangka nu beleyum, beleyum timbalimo tomundo' boune sampe toka sidu-sidutu', ka' madi' mompangalati'i kabai mompopikilakon ka ahenannyo mae.

YEREMIA 49:16

Buulon nu beleyum ati-atina na nongakalimo beleyum. Madi'mo ko anu mongkabuhuk beleyum susumo sangka'an nu beleyum. Beleyum jinojoongmo i olo-olot nu batu, majo'on aita' mae ibawo nu bungkutnyo. Panyo maumo ahi' nu bau na laigan nu beleyum itampat anu matangkas hondo, sumo kotangkasnyo nu peta nu bonyia', nu tau'akonmo ahi' nu Tumpu lengkat mae atina'. Tumpu na nontaloakonmo iwi-iwi' aijo'.”

YEREMIA 50:21

Tumpu notataemo hi sa'angu' na bansa anu lengkat mae i utara, “Tumbuhimo na mian anu jojoong i Merataim tiba Pekod. Pateimo ka' hansunimo na aha. Sampa bau na anu pinalentahkon-Kumo. Aku, Tumpu, notataemo.”

YEREMIA 50:25

Gudang nu sanjatang-Ku binuka'-Kumo ka' kalana tambuha'-Ku, sinabatakon-Kumo na sanjata haha aijo', kalana Aku Tumpu Anu Matangkas na Kakuasa'an tionyo ahi' mompojalanmo sa'angu' na kalaja i Babel.

YEREMIA 50:45

Mokonyo aijo', potombihing mae apaa na anu tinanga'an-Kumo hi kota' Babel, ka' apaa na anu kahanda'mo Ku bau hi aha mian anu jojoong ikiijo'. To ana-anak nu aha suele oboamo ahi' da mambamo, ka' iwi-iwi' na mian mabuhukmo.

YEREMIA 51:11

Tumpu nonsale'imo to tomu-tomundo' nu aha Media, kalana Ia kahanda'mo mohansuni Babel. Sumo aijo' na bau-baunyo Ia kahanda'mo mombalosakon palabuatan nu aha to mia-mian anu nohansunimo Laigan-Nyo. To sulu-suludadu anu toto tangka-tangkas na pangkatnyo ipasukan anu mambamahampate nompalentahkonmo, “Tajomimo na hihis nu pana'! Posadiamo na kanta!

YEREMIA 51:25

O, Babel, beleyum sumomo ahi' bungkutnyo anu nohansunimo songko-songko na dunia. Panyo Aku, Tumpu mongewamo beleyum. Beleyum Ku hela'mo ka' Ku pobahangkangmo ka' mule' Ku pojohokmo mopapu sampe timbalimo abu'.

YEREMIA 51:48

Sinin na apaa anu aita' ilangit tiba aiya itano' montaligalaimo kalana lame'mo de maluanyo Babel opatundu'mo ka' nu kuasaimo nu bansa anu lengkat mae isasu utara anu tokamo mae mohansuni ia.

YEREMIA 51:56

Aha tinokamo nongidei Babel, nompaha hakopakonmo to sulu-suludadu nu aha ka' nompato'imo sinin na toongon anu bau pahampate nu aha. Akumo na Tumpu anu mohukum palabuatan anu ma'idek, ka' Babel Ku balosakonmo sitimbang tiba palabuatannyo.

YEREMIA 51:58

Pagan mesen nu Babel toto hoso-hoson Ku hansunimo sahingga mahatamo susumo tano'. Sabatannyo daka-daka' toto tangka-tangkas Ku papumo sampe motanggotmo hondo. Ola pinalasuma' na lawe nu to bansa-bansa, kalana apaa na anu kinalajamo nu aha ola nu kaan nu apu. Aku, Tumpu Anu Mahakuasa notataemo.”

DANIEL 4:30

aku notatae, “Soba toa na ko ima'nyo na kota' Babel aiya! Akumo aiya na nombau da tinimbali puso nu kota' nu negara da bau pomponyata kakuasa'anku ka' mule' kahosonanku, katalasanggoan, ka' kahebatanku!”

AMOS 9:2

Mau pe'e aha moko ala mompinsoopi dunia nu mian anu silakamo. Ku humpak na aha. Mau mule' aha moliba' mokiita' i langit, Aku montau'akon mae aha lengkat i aita' mae.

AMOS 9:4

De aha nu boamo nu sampobali', Ku palentahje da aha opatei. Kahanda'-Ku da ohopu'imo na aha, ka' madi'mo montulungi aha.”

HABAKUK 2:9

Kinutukan na beleyum! Beleyum nompokayamo auan nu beleyum nu kauntungan anu i humpak nu beleyum kalana nompakisamo, da laigan nu beleyum amanmo ka' madi'mo ko kasusa'an ka' mule' balaa' anu montokai mae.