YEREMIA 5:7 - KITAB NU TUMPU ALLA LELE MA'IMAI'

⁷ Tumpu notatae, “Kadaka' Aku mongampunimo dosa-dosa' nu mian anu palesayamo hi beleng-Ku? Aha nompala'imo mae Aku ka' mule' nonsombahmo anu misa' Tumpu Allah. Aku na nombee'i anu okaan hi aha sampe aha nobosumo, panyo aha nasala'mo ka' toto minsan aha mambamo hi to mia-mian anu saja' masala'.

YEREMIA 5:7 ပူးပေါင်းရင်းမြစ်များ

2 TAWARIKH 13:9

Te misa'o to ima-imam nu Tumpu lee' mae i Harun ka' to mia-mian nu Lewi i laa'mo nu belemiu iwi-iwi'? Salaku bolosnyo yayamo maumo pa' ihe na mongka'oho' timbali imam, asan ia momboamo mae sa'angu' na sapi' kabai popitu' na domba, o hangkatmo nu belemiu bau imam nu anu misa' Tumpu Allah, kalana memang sumo aijo' na to bansa-bansa sangga'at mohangkat imam nu aha. Panyo kami madi' mombau anu sumo aijo'.

AYUB 31:12

Dosa' aijo' mompatei sumomo apu nu nalaka, iwi-iwi' na anu daagi' hi belengku nutoyo'imo iwi-iwi'.

MAZMUR 50:18

De beleyum montoamo samian anu biasa mombuling, beleyum montihomo ia, ka' beleyum mogandi-gandimo tiba to mia-mian anu saja' masala'.

YEREMIA 12:16

De aha totu-totu'umo ahi' na montalima agama nu mian anu palesayamo hi beleng-Ku ka' basumpa'mo ahi' ka' motatae, ‘Tiba sanggo nu Tumpu anu tumuu',’ – susumo naipuan mae aha nongajanmo mian anu palesayamo hi beleng-Ku binasumpa'mo tiba sanggo nu Baal – sahingga aha suele minsoopmo mian anu palesayamo hi beleng-Ku ka' mohumpakmo kantumuu'an anu ma'ima'.

YEREMIA 13:27

Tinoang-Kumo na belemiu nombau hahan anu Ku ka'ideki. Tinoang-Kumo na belemiu nololoi' to pilo-pilogot sangga'at ipuge'nyo tiba i ale', sumomo ahi' samian na mo'ane anu nongka'ima'imo bengkele' nu mian sangga'at kabai sumomo ahi' ajahan tinokamo na napisunyo hi ajahan behenyo. O mian anu jojoong i Yerusalem, silakamo na belemiu! Hipianje na belemiu madi'mo mombau palabuatan iwi-iwi' anu ma'idek?”

YEREMIA 16:11

Poto'i hi aha Aku notatae sumo uuka, ‘Mompolee' nu belemiu nompala'imo Aku da monsombahmo ka' palesayamo hi pilogot sangga'at. Aha nonteemo Aku ka' madi'mo nongka'oho' nontuluti sinin na atulan-Ku.

YEREMIA 16:20

Te moko ala na manusia mombau posi pilogotnyo? Tantu madi' ahi'! Anu binaunyo aijo' memang misa'ahi' Tumpu Allah.”

YEREMIA 2:11

Ma'isa toho' ko sa'angu' na bansa mompotolos pilogotnyo maumo ahi' aijo' misa' Tumpu Allah anu sahondo-hondonyo. Panyo, mian anu palesayamo hi beleng-Ku nompotolosmo Aku, anu nunu kabubunakon nu aha tiba apa-apaa anu madi' moko ala mombau apa-apaa.

YEREMIA 2:31

O mian nu Israel potombihing mae na potataeng-Ku aiya. Pa' toho'mo na Aku susumo padang tampat anu mateges na jinadi' atina hi belemiu kabai pa' sumo tano' anu pinikatmo hondo? Panyo kadaka' belemiu notataemo koonyo nu belemiu, belemiu mongkahanda'imo bebas, ka' madi'mo daagi' mongka'oho' minsusule' mae hi beleng-Ku?

YEREMIA 23:10

Lipu'to aiya nobuke'mo nu mian anu madi' tulu-tulutan hi Tumpu. Kantumuu'an nu aha saja'mo mombau anu ma'idek ka' sinala'mo na monggunakon kakuasa'an nu aha. Kalana kutuk nu Tumpu, sahingga hemput ipadang anu mateges nanggasmo ka' songko-songko na lipu' ihumangmo.

YEREMIA 3:19

Tumpu notatae, “O Israel, Aku kahanda'mo montalima beleyum salaku anak-Ku, ka' mombee'imo beleyum lipu' anu oka'ima'i nu kinyonyoa, lipu' anu ma'ima' hondo idunia aiya songko-songko. Ku kahanda'i da beleyum monsanggo Aku tuuma nu beleyum, ka' madi'mo daagi' mompala'i Aku.

YEREMIA 7:9

Belemiu montomang, mompatei, masala', timbali sakisi anu baleko', monsombahkon koloban hi Baal ka' mule' monsombah to pilo-pilogot anu madi' osumbu' nu belemiu.

YEREMIA 9:1

Ma'ima' hondo de ubaku sumo bubung anu pinobuke'anmo nu uee, ka' mataku sumo soluduk anu saja' mo ili na ueenyo! Sahingga aku timbali saja' humang sinaa tiba pihi, mohangi to mia-mian bubuu' bansangku anu pinateanmo nu sampobali'.

YEREMIA 9:2

Uuka aiya ipadang tampat anu mateges timbali ku kabot na tampat sinso'an male' nu mian anu ilumambanan! Sahingga ku pala'imo na bansangku ka' malaimo mamba kiijo' mae da matikojo'onmo madi'mo ohani hi aha. Aha iwi-iwi' saja' mombau palabuatan anu ma'idek sa'angu' na posa'angu'an nu mian anu madi' tulu-tulutan,

MOHAANGI 3:42

“Kami binaladosa'mo ka' notomuhukmo hi Belento, O Tumpu, ka' Belento madi'mo nongampuni mae.

YEHEZKIEL 22:11

Bengkele' nu mian sangga'at kabai moniannyo boune, kabai utusnyo ise' anak nu tuumanyo hi bengkele' sangga'at.

HOSEA 11:8

Tumpu notatae, “O Israel te toho' mule' ahi' belemiu Ku pojohok kabai Ku pala'i. Te toho' mule' ahi' belemiu Ku hopu'i susumo Adma? Kabai pa' Ku baumo susumo Zeboim? Madi' sanang na kinyonyoang-Ku mombau han aijo' kalana liibos-Ku talalo hondo daka-daka' hi beleyum!

HOSEA 13:6

Panyo salatan belemiu jinojoongmo i lipu' anu ma'ima ka' belemiu nobosumo ka' na osamo, belemiu tinakabunmo lantas nongkolilimimo mae Aku.

HOSEA 4:2

Aha binasumpa'mo, panyo aha madi' mongganapi; aha baleko', mompatei, montomang ka' masala'. Palabuatan ma'idek mompaka pintuangmo ka' mompatei saja'mo obau.

HOSEA 7:4

Aha iwi-iwi' to mia-mian anu ma'idek na palabuatannyo ka' madi' tulu-tulutan. Pongka'ideki nu aha sumomo apu i uno nu tolukun anu madi' opomoak nu aha anu montunu roti salatan ma'isa pe'e opotunu na adonannyo.

IMAMAT 20:10

De samian na aha Israel masala' tiba bengkele' nu mian anu bubuu' bansa nu aha, ia ka' boune aijo' tionyo ahi' o hukum mate.

AMOS 8:14

To mia-mian anu basumpa' tiba sanggo nu pilogot Samaria ka' notatae, ‘Tiba sanggo nu pilogot bansa Dan’, kabai ‘Tiba sanggo nu Pilogot Bersyeba’ – tombahangkangmo ka' madi'mo daagi' mobula.”

ZEFANYA 1:5

Ku sapuimo iwi-iwi' ihe na saja' moliba' aita' mae i atop ka' monsombah batu nu sinaa, bitu'on, ka' to manda-mandala'. Saidi' mae Ku hopu'imo na aha anu monsombah Aku ka' mule' binasumpa'mo da tulu-tulutanmo hi beleng-Ku, panyo mule' ahi' binasumpa'mo hi sanggo nu Tominuat Milkom.

MALEAKHI 3:5

Notatae na Tumpu Anu Daka' na Kuasanyo, “Aku tokamo mae hi belemiu da momputusimo. Aku malia'mo timbali sakisi de momputusimo to tukang-tukang sihir, to mia-mian anu lewa' masala', anu tinimbali sakisai baleko', hi anu madi' adin na mombee'i gaji kona hi aha mian anu mongala tambo, hi aha anu madi' ko ka'adilannyo kona hi aha to balu-balu, to ana-anak anu madi'mo ko tuumanyo ka' tinanyo, ka' aha mian nu salipu'an mae, ka' mule' kona hi aha mian iwi-iwi' anu madi' mongadati Aku.”

1 KORINTUS 6:9

Osumbu' miu na to mia-mian anu madi' montuluti pongka'oho' nu Tumpu madi' timbali mian anu palesayamo hi Tumpu? Boli o akali! To mia-mian anu masala', to mia-mian anu bapilogot, anu masala', anu mombau anu moko ambang hi sangko gampanyo bubuu' mo'ane, kabai bubuu' boune,

1 KORINTUS 8:4

Han painggaga mongkaan kaanon anu sinombahkonmo hi pilogot, osumbu'to saba' te pilogot monggambanakon apa-apaa anu sabenannyo i madi'an. Ka' osumbu'to mule' saba' Tumpu ola sa'angu'; madi' ko sangga'atannyo.

GALATIA 4:8

Uutu mae komiu madi' monsumbu' Tumpu, mokonyo aijo' tinimbalimo botuan nu to kua-kuasa' anu osangka sumo Tumpu, panyo sabenannyo misa' Tumpu anu sahondo-hondonyo.

PO'ULE' INGULIT 32:15

Mian anu pinalesayamo hi Tumpu kayamo, panyo saja' moto'idek, aha to lompo-lompo', nobosumo nu kaanon. Lantas aha nompala'imo Tumpu Allah, anu Nompotimbalimo aha ka' madi'mo nongala anu nomposalamatmo aha anu daka' hondo na kuasanyo.

PO'ULE' INGULIT 32:21

Aha nonsaduakon aku da nontambuha'i anu misa' Tumpu Allah, ka' nontambuha'imo patong nu bapilogotan nu aha. Sahingga Ku potimbalimo na mian anu pinalesayamo hi beleng-Ku da mongka'idekimo anu misa' bansa, ka' montambuha'i bansa anu ponga'.

IBRANI 13:4

Iwi-iwi' na mian tionyo ahi' mompotoa kalakuan mongadati po'osoan, mokonyo aijo' tionyo ahi' mo'ane bengkele' mompaha hongo-hongo samian ka' samian. Mian anu mombau anu mahenyu ka' mian anu masala' nu putusije nu Tumpu.

YAKOBUS 4:4

Komiu atina' mian anu madi' mohongo-hongo! Madi' osumbu' miu, de komiu mosangalumo tiba dunia, makia' komiu timbalimo sampo bali' nu Tumpu?

YOSUA 23:7

Tiba jalan anu sumo aitu belemiu madi'mo maninggalo' tiba to bansa-bansa anu daagi' atina' hi belemiu. Belemiu madi' timbali monsanggo sanggo nu to pilo-pilogot nu aha kabai basumpa' i sanggo aijo'. Ka' suele belemiu madi timbali monsombah kabai tolodadupu i ahop nu to pilo-pilogot haha aijo'.