YEREMIA 4:7 - KITAB NU TUMPU ALLA LELE MA'IMAI'

⁷ Sumomo ahi' singa anu nosabatmo lengkat mae ipinaninsulukannyo sumo aijo'mo mule' nambamo na anu sola' mohopu'i bansang-bansang anu tokamo mae kahanda' monsilakaimo Yehuda. Kota-kota' nu Yehuda singkapmo hansun jadimo tampat anu madi'mo nu jojoongi nu mian.

YEREMIA 4:7 ပူးပေါင်းရင်းမြစ်များ

2 TOMU-TOMUNDO' 24:1

Daagi' tempo'nyo i Tomundo' Yoyakim na nompalentah, i Nebukadnezar tomundo' nu Babel nontumbuhimo ka' nompatundu'mo Yehuda. Kinopinnyo tinotolu' na taun na i Yoyakim tinundu' hi Nebukadnezar, panyo mamanga ahi' ia notomuhukmo.

2 TOMU-TOMUNDO' 25:1

Lapas aijo' i Zedekia notomuhukmo hi Nebukadnezar tomundo' nu Babel. Kalana aijo' i Nebukadnezar tiba suludadunyo iwi-iwi' tinokamo mae nontumbuhi Yerusalem i tanggan sampulu' bitu'on ko sampulu'nyomo, i taun ko osio'nyomo na i Zedekia nompalentah. Aha nombaumo palung i sambiha'nyo nu kota' ka' nontambunmo tano' bau pontikuan

YESAYA 1:7

Lipu' nu belemiu ingideanmo; kota-kota' nu belemiu pinapuanmo iwi-iwi'. Mian anu i salipu'an nongalamo tano' nu belemiu ka' ingideannyomo na isinyo.

YESAYA 5:9

Ihongongku Tumpu Anu Daka' na Kuasanyo binasumpa'mo, “Iwi-iwi na laigan anu to daka-daka' haha aiya ka' mule' anu to ima-ima' haha aiya iwi-iwi' aijo' longkangmo madi'mo ko anu monjojoongi.

YESAYA 6:11

Aku nompokilawamo, “Sampe tokaje hi pian na kopinnyo na anu susumo aiya saja' jadi, o, Tumpu?” Tinaaman-Nyo mae, “Sampeje iwi-iwi na kota' hansunmo ka' madi'mo ko anu monjojoongi, iwi-iwi' na laigan madi'mo ko anu monjojoongi ka' mule' tano' madi'mo ko apa-apaanyo ka' mategesmo.

YEREMIA 2:15

Sampobali'nyo mohu'akonmo ia susumo singa tano'nyo opokunmo ka' madi'mo daagi' ko isinyo iwi-iwi' na kota'nyo mingkotmo nu toyo'i nu apu opojohokmo madi'mo ko anu monjojoongi.

YEREMIA 22:6

De ola pontoang-Ku laigan nu tomundo' Yehuda ma'ima' hondo, sumomo ahi' ko ima'nyo tano' nu Gilead ka' sinin na bungkutnyo nu Libanon; panyo tampat aijo' Ku potimbalimo susumo padang tampat anu mateges anu madi' nu jojoongi nu mian.

YEREMIA 22:7

Ku saimo na mian da mamba mohansuni. Nu boamo mae nu aha na bobolo' ka' mompahantaa'akon ohi'nyo sahingga motua'mo, ohi'nyo anu toto ima-ima' haha aijo' te kau' cemara na binau anu lengkat mae i Libanon. Lantas nu lumbu'akonmo nu aha i apu.

YEREMIA 25:38

Susumo singa nosabatmo mae lengkat i liangnyo, sumo aijo'mo na Tumpu nosabatmo mae da mohukumo mian anu palesayamo hi Ia. Kasinggian nu pahampatean tiba tambuha' nu Tumpu nongabali'mo lipu' aiya sahingga tinimbalimo padang tampat anu mateges.

YEREMIA 25:9

‘Ku lagamo mae na bansa iwi-iwi' anu lengkat mae isasu utara, tiba suele i Nebukadnezar posaihon-Ku tomundo' nu aha Babel. Aha Ku palentahmo da mompahampateakonmo mongewa Yehuda tiba anu jojoong kiijo' ka' mule' sinin na bansa anu mompaha ohani. Bansa Yehuda tibamo bansa-bansa sangga'at anu mompaha ohani Ku silakaimo ka' mule' Ku pojohokmo da hansunmo sampe toka sidu-sidutu'. To mia-mian anu montoa ia tolokengkengmo ka' mule' mabuhukmo. Aku, Tumpu notataemo.

YEREMIA 26:9

Baano hondo na beleyum montaloakon mompake atas sanggo nu Tumpu kooyum Laigan-Nyo aiya opojadimo susumo Silo ka' mule' kota' aiya ohansunimo ka' timbalimo tampat anu madi'mo daagi' ojoongi.” Lantas aku tinikubanmo nu aha mian, da'isan hondo.

YEREMIA 27:8

Bansa kabai kalaja'an anu madi' ka'oho tondu' hi Nebukadnezar saidi' mae Ku hukumo nu pahampatean, kasusa'an i anu okaan, tiba panyakit anu molele, sampe bansa aijo' ahennyo tondu'mo hi ia.

YEREMIA 33:10

Tumpu notatae, “Mian nontaloakonmo koonyo nu aha tampat aiya sumomo padang tampat anu nategesmo madi'mo daagi' ko miannyo kabai binatang anu monjojoongi aijo'. Potatae nu aha memang totu'u, kalana kota-kota' nu Yehuda tiba jalan-jalan nu Yerusalem iwi-iwi' madi'mo ko miannyo anu otoa; madi'mo daagi' ko mian kabai binatang anu jojoong ikiijo'.

YEREMIA 34:22

Ku bee'imo tanda da aha po ule'mo mae minsusule' ikota' aiya, lantas montumbuhimo mae, ka' mongkuasaimo, ka' nu papumo nu aha. Sinin na kota' nu Yehuda Ku pojadimo susumo padang tampat anu mateges anu madi'mo nu jojoongi nu mian. Aku, Tumpu notataemo.”

YEREMIA 4:29

Ihongo na suludadu anu nonsake'i ajahan ka' anu mompana', talalomo hondo ihengge', sahingga nonsaduakonmo toto samian nopalaimo hahu-hahunsa'an. Sinin na kuhat pininsoopanmo nu aha, puge'nyo nu batu pinoliba'anmo nu aha. Songko-songko na kota' iliingmo, madi'mo daagi ko anu jojoong ikiijo'.

YEREMIA 44:2

Sumo uuka na potuunon nu Tumpu Anu Mahakuasa, Tumpu Allah Israel hi aha, “Belemiu nonsakisimo balaa' anu pinokonang-Kumo hi Yerusalem tiba hi iwi-iwi' na kota' sangga'at nu Yehuda. Sampe uuka aiya kota' haha aijo' daagi' hau-haunyo hansun madi'mo ko anu nonjojoongi,

YEREMIA 46:18

Aku, Tumpu Allah anu tumuu', Aku tomundo', Tumpu Anu Mahakuasa. Susumo Bungkutnyo nu Tabor natunjomo nokiita' i olot nu to bungku-bungkutnyo, ka' mule' Bungkutnyo nu Karmel natunjomo nokiita' noliu-liumo ambai, sumo aijo'mo na kahosonannyo nu aha anu toka mae montumbuhi beleyum.

YEREMIA 49:19

Susumo singa nasasubamo mae lengkat i alas anu daka' hondo koko Kaunyo nu Yordan ka' nompanjolongimo padang tampat nu domba lewa' mongotot, sumo aijo'mo na Aku toka mae mompotolokengkeng mian nu Edom sahingga mopalaimo mompala'imo lipu' nu aha. Lantas Aku mompile'imo samian na anu timbali polaya' da mompalentah bansa aijo'. Ihe na timbali bau pompokakanakonan tiba Aku? Ihe na baani mahampalakala tiba Aku? Te daagi' ko polaya' anu moko ala mongewa Aku?

YEREMIA 5:6

Mokonyo aijo' aha nu pateimo ahi' nu singa nu alas ka' nu bea-beakmo nu serigala anu lengkat mae ipadang tampat anu mateges. Macan tutul sumolinsapmo molio kaanonnyo koko kota-kota' nu aha, ka' ihehe na anu mosabat mae nu sa'umo. Iwi-iwi' aijo' saidi' mae jadimo kalana aha nanjoo'mo na binaladosa' ka' saja'mo nohiku mae Tumpu Allah.

YEREMIA 50:17

Tumpu notatae, “Mian nu Israel sumo sanggombu na domba anu iloloi'mo ka' pinosungkehetmo nu singa. Momonanyo aha tinumbuhanmo itomundo' Asyur, lantas mule' i Nebukadnezar tomundo' nu Babel nonggulugudi'mo buku nu aha.

YEREMIA 50:44

Sumo singa nasasubamo mae lengkat i alas anu daka' koko Kaunyo nu Yordan ka' nambamo ipadang tampat pongototan nu domba, sumo aijo'mo na Aku, Tumpu, mompasasubahimo mae aha mian nu Babel sahingga aha mopalaimo mompala'imo kota' nu aha lia-lia'. Lantas Ku pile'imo na samian da bau polaya' mompalentah bansa aijo'. Ihe na timbali bau pompokakanakonan Aku? Ihe na baani mahampalakala tiba Aku? Te daagi' ko polaya' anu moko ala mongewa Aku?

YEREMIA 8:16

Sampobali' aiyamo i uno nu kota' Dan; tihaha' nu ajahan nu aha kinahongoanmo ka' iwi-iwi' na lipu' nabuhukmo. Sampobali' tinokamo mae da mohansunimo lipu'to iwi-iwi' ka' suele kota'to tiba mule' ahi' iwi-iwi' na mian anu jojoong i aiya.”

YEREMIA 9:11

Tumpu notatae, “Yerusalem Ku pojadimo tampat anu ihansunmo baumo tampat paninsulukan nu dedeng nu alas. Sinin na kota' nu aha Yehuda timbalimo liing, timbalimo tampat anu madi'mo ojojoongi.”

YEHEZKIEL 12:20

Kota-kota' anu tempo uuka aiya kaho ko miannyo anu monjojoongi saidi' mae ohansunimo ka' mule' ale' nu aha iwi-iwi' mategesmo. Sahingga nu sumbu'je nu aha taalu' Akumo ahi' na Tumpu.”

YEHEZKIEL 21:31

Ku potudunmo na tambuha'Ku anu inoakmo susumo apu hi belemiu. Ka' belemiu Ku bee'mo hi to mia-mian anu talalo buhingison anu memang ahi' ingajanmo na mompatei.

YEHEZKIEL 32:2

“O manusia anu madi' tumuu' batu, pokinde'i totu-totu'u na itomundo' Mesir. Potokakon na potuunon-Ku aiya hi ia, ‘Beleyum montihomo susumo singa anu daagi' bata'nyo aijo hi aha to bansa-bansa, panyo beleyum lebe montiho susumo bua' anu jojoong i uno nu uee. Tengke nu beleyum mompohibu ka' mongkotoni iwi-iwi' na kaunyo.

DANIEL 5:19

Talalo hondo' daka' na kakuasa'annyo sahingga to mia-mian anu lengkat mae i iwi-iwi na bansa ka' mule' tulunan nu bansa ka' basa' ilakatnyomo ka' mule' nongkabuhukmo ia. De ia kahanda'mo mompatei mian nu pateimo na mian aijo'. De ia kahanda'mo momposalamat mian nu posalamatmo na mian aijo'. Ia mohangkat kabai montau'akon maumo pa' ihe asanje pongka'oho'nyo.

DANIEL 7:4

Anu momona sumo singa panyo ia kopolipiknyo susumo tomonsi' alaimbelong. Hau-haunyo aku montonto'i madi' pinin polipiknyo tinombubutmo ka' nototodakmo; ia tinolohangkatmo lengkat i tano' ka' pinotinjomo i ohua' na tengke susumo manusia, lantas binee'anmo pikilan nu manusia.

IMAMAT 26:31

kota-kota' nu belemiu Ku potimbalimo tambulan nu anu i honsuhanmo, tampat pontalakanian nu belemiu pilogot Ku honsuhimo, ka' anu okolobanakon nu belemiu madi'mo Ku talima.

IMAMAT 26:33

Ku podaagi'mo na pahampatean i lipu' nu belemiu ka' mongga'aga'atakonmo mamba i lipu' nu mian anu i salipu'an. Ale' nu belemiu madi'mo okalaja, ka' kota-kota' nu belemiu opojohokmo me susumo tambulan nu apa-apaa.