YEREMIA 4:21 - KITAB NU TUMPU ALLA LELE MA'IMAI'

²¹ Sampe toka hipian na aku tionyo monsakisi mian mahampate taha-tahahumo? Sampe toka hipian na tionyo aku mohongo onyi' nu tolompet anu talalomo na onyi'nyo?

YEREMIA 4:21 ပူးပေါင်းရင်းမြစ်များ

YEREMIA 6:1

Lako palaimo, o tomia-mian nu Benyamin! Pala'imo na Yerusalem! Po onyi'mo na tolompet kiijo' i Tekoa ka' pomoakmo na apu salaku tanda i Bet-Kerem! Balaa' tiba kasilaka'an anu opalias hondo montumbuhimo mae lengkat isasu utara.

YEREMIA 4:19

Sinansalamo hondo na kinyonyoangku, madi'mo ku poko ala montahan kasansala'an. Aku madi'mo moko ala monsabaanakon butongku sulengku nangada'mo i uno nu saha'anku, kalana ihongongkumo na tolompet ingumonyi'mo, tiba ais nu pahampatean nayontokmo mae.

2 TAWARIKH 36:17

Tumpu nompotuka'mo kinyonyoa i tomundo Babel da montumbuhimo aha. Tomundo aijo' nompateimo mian nu Yehuda anu toto oli-olitau ka' toto lalangkoyang tibamo aha anu kiijo' i Laigan nu Tumpu. Mau pe'e samian madi' ko anu kinalibosannyo, mau anu langkai'mo ka' bengkele'mo, kabai anu daagi' olitau ka' langkoyang, to momo'ane kabai to boboune, anu masakit kabai anu madi' masakit. Aha iwi-iwi' binee'mo nu Tumpu Allah hi tomundo Babel.

2 TAWARIKH 36:10

Tempo'nyo taun bu'ou tinokamo mule' i Tomundo Nebukadnezar nomboamo i Yoyakim namba i Babel salaku mian anu i hakop, ka' to bala-balang anu mahan na olinyo i Laigan nu Tumpu suele binoanyomo. Lapas aijo' i Nebukadnezar nohangkatmo i Zedekia baabo' i Yoyakhin, binaumo tomundo nu Yehuda ka' Yerusalem.

2 TAWARIKH 36:3

I Nekho tomundo nu Mesir nohakopmo ia ka' nomboamo i Yoahas i Mesir, lantas pinalentahnyomo na Yehuda mombayan hasin konjoo'nyo 3.400 kilogram na salaka, ka' 34 kilogram na mosoni'. Lapas aijo' i hangkatnyomo na i Elyakim utus i Yoahas binau tomundo ka' binali'annyomo na sanggo i Elyakim sinanggohanmo i Yoyakim. Lapas aijo' i Yoahas binoanyomo i Mesir.

2 TAWARIKH 35:25

I Nabi Yeremia nontulismo sa'angu' na nyanyian bau pohangi i Tomundo Yosia. Sampe sangkutnyo tempo' uuka aiya nyanyian aijo' daagi' saja' onyanyi nu to panya-panyanyi i Israel, mau mo'ane kabai boune, de mombaumo adat monginau' i Yosia sinilakamo. Nyanyian aijo' pinosa'angu'mo i kitab nu nyanyi-nyanyian anu bau ponyanyiakon mian silaka.

YEREMIA 4:20

Balaa' me saja' tinoka mae nohansunimo songko-songko na lipu'. Monti-montiik ahi' kemahku ingideanmo, hudenyo iwi-iwi' pinaha bea-beakmo.

YEREMIA 4:22

Tumpu notatae, “Ponga' hondo na mian anu palesayamo hi beleng-Ku aijo' aha madi'mo nonsumbu' Aku. Aha sumomo ahi' to ana-anak anu mabongon hondo madi' ahi' ko anu nupisumbu-sumbu' maumo ola sangkiding. Pinandemo hondo ipalabuatan anu ma'idek, ka' madi'mo nonsumbu' palabuatan anu ma'ima'.”