YEREMIA 4:19 - KITAB NU TUMPU ALLA LELE MA'IMAI'

¹⁹ Sinansalamo hondo na kinyonyoangku, madi'mo ku poko ala montahan kasansala'an. Aku madi'mo moko ala monsabaanakon butongku sulengku nangada'mo i uno nu saha'anku, kalana ihongongkumo na tolompet ingumonyi'mo, tiba ais nu pahampatean nayontokmo mae.

YEREMIA 4:19 ပူးပေါင်းရင်းမြစ်များ

KAJADIAN 49:6

Aku madi' nanintuang i posa'angu'an nu aha binatanga', ka' suele madi' ninsoop i posa'angu'an nu aha. Kalana aha motambuha'mo sahingga aha nompateimo, nompengko'imo sapi' kalana molio kasanangan.

2 TOMU-TOMUNDO' 4:19

Monti-montiik anak aijo' nolobo'mo hi tuumanyo, “Ibee! Ubakku nasakitmo!” “Boa na anak aiya hi tinanyo,” na koonyo nu tuumanyo hi samian na posaihonnyo.

2 TOMU-TOMUNDO' 8:11

Lapas aijo' i Elisa nompotontongmo matanyo hi Hazael, sahingga i Hazael madi'mo sinanang na kinyonyoanyo. Manga-manga i Elisa i humangmo.

MAZMUR 103:1

Nyanyian i Daud. O, puji' na Tumpu, o, santuu'ku buke-buke' na kinyonyoangku, puji' na sanggo-Nyo anu susi'.

MAZMUR 116:7

Pinosanangkumo na kinyonyoangku, kalana nu kanonongi nu Tumpu na aku.

MAZMUR 119:136

Lolu'ku no ilimo susumo kaunyo, kalana atulan nu Belento madi'mo tinulutan.

MAZMUR 119:53

Tinambuha'ankumo hondo na mian anu ma'idek na kinyonyoanyo, kalana aha nompala'imo atulan nu Belento.

MAZMUR 146:1

Opuji' na Tumpu! O santuu'ku, opuji' na Tumpu!

MAZMUR 16:2

Aku notataemo, “Belentomo na Tumpungku, bau kabilahianku, madi' ko anu molingkudui Belento!”

YESAYA 15:5

Aku molibosmo hi aha Moab! Mian anu jojoong ikiijo'nopalaimo namba ikota' Zoar tiba Eglat-Selisia. Daagi' ko anu nindako nontulu jalan mamba i Luhit ka' sola' humang; daagi' ko anu nalai namba i horonaim ka' sola'mo molokihis kalana tinokanmo nu balaa'.

YESAYA 16:11

Kinyonyoangku nolokihismo ka' ihansunmo hondo-hondo montoa ka' ada'an nu aha Moab tiba Kir-Heres.

YESAYA 21:3

Anu tinoangku aijo' nompobingungmo hondo aku sampe aku madi'mo noko ala nontoa kabai nohongo. Aku nabuhukmo ka' mule' nasakitmo sumomo ahi' samian na boune anu kahanda'mo monganak.

YESAYA 21:4

Kinyonyoangku madi'mo sinanang; ku oa'i na buhukmo ka' mule' aku ilakatnyomo. Pihi anu saja ku ina-inau' ola mule' ahi' nompopangada' mae kinyonyoangku.

YESAYA 22:4

Boli mae mompalahatikan aku; bakas da ku haangi ahi' na to mia-mian bansangku anu sinilakamo.

YEREMIA 13:17

De belemiu madi' mongka'oho' mompotombihing saba' ku haangimo hoko-hokot. Tiba kinyonyoa anu malibos hondo ku haangimo na buulon nu belemiu ati-atina'. Lolu'ku jumujumo kalana mian anu palasayamo hi Tumpu oboamo salaku mian anu ihakopmo.

YEREMIA 20:9

Panyo de ikinyonyoangku montaloakonmo na aku, “Sahanyo ku kolilimimo ahi' na Tumpu, bolimo daagi' aku motatae momboa atas sanggo-Nyo,” saba' potuunon nu Belento sumomo ahi' apu anu ningobamo ikinyonyoangku. Pinisobangkumo na nongintim, panyo madi' ahi' ku poko ala.

YEREMIA 23:9

Sumo uuka na potuunonku hi aha to nabi-nabi: Kinyonyoangku nalibosmo hondo ka' aku ilakatnyomo. Tumpu tiba potatae-Nyo anu susi' nompolonguimo mae aku susumo anu nanjoo'mo na nonginum anggur.

YEREMIA 4:21

Sampe toka hipian na aku tionyo monsakisi mian mahampate taha-tahahumo? Sampe toka hipian na tionyo aku mohongo onyi' nu tolompet anu talalomo na onyi'nyo?

YEREMIA 4:5

Puuhimo na tolompet isongko-songko na lipu'! Poloboo'mo nasa-nasa. Palentah na mian anu jojoong i Yehuda tiba Yerusalem popalaimo lako' mamba ikota-kota' anu ko bentengnyo.

YEREMIA 49:2

Te madi'mo daagi' ko ahanyo mian nu Israel anu timbali mompo ago daerah aijo? Panyo tokaje mae na tempo'nyo Ku pojadije na mian anu jojoong i Raba, puso nu kota' nu lipu' Amon aijo' mohongomo ais nu pahampatean. Kota' aijo' mohobo'mo ka' kampung toto ise-ise anu idaerahnyo mopapumo ingko-ingkot. Lantas Israel po ule'mo mongala tano'nyo aijo' hi aha anu naipuan mae nongalamo.

YEREMIA 50:22

Hengge' nu pahampatean pinolintupmo ilipu' ka' jinadimo na kahansunan anu daka' hondo.

YEREMIA 6:24

Nohongo lele aijo', anu jojoong i Yerusalem madi'mo daagi' noko ala nombau apa-apaa. Aha tinokanmo nu buhuk ka' nongoa'imo sansala susumo boune anu kahanda'mo mompohampe anak.

YEREMIA 8:18

Kinyonyoangku sumomo sinaya-saya' ka' nalanitmo, kaduka'anku madi'mo opoko pakuli'i.

YEREMIA 8:21

Kinyonyoangku inohintutumo kalana bansangku maboat hondo na sakitnyo; aku sinusa'mo ka' mule' madi'mo tinatap na kinyonyoa.

YEREMIA 9:1

Ma'ima' hondo de ubaku sumo bubung anu pinobuke'anmo nu uee, ka' mataku sumo soluduk anu saja' mo ili na ueenyo! Sahingga aku timbali saja' humang sinaa tiba pihi, mohangi to mia-mian bubuu' bansangku anu pinateanmo nu sampobali'.

YEREMIA 9:10

Aku, i Yeremia notatae, “Aku humangmo ka' susamo na kinyonyoa kalana padang tampat nu hemput anu mateges ka' aita' ibungkutnyo iwi-iwi' anu nanggasmo kinumahengkengmo ka' mule' madi'mo tinulu nu mian. Lewo' nu potuu'on madi'mo daagi' ko anu ihongo, binatang anu lumahap tiba binatang-binatang sangga'at nopalaimo ka' imadi'anmo.”

MOHAANGI 1:16

Aitu na sababnyo sahingga matangku i lolu'onmo, madi' ko anu mombee'i bau pombikas ka' mombee'i potatae anu moko sanang na kinyonyoa. Madi'mo daagi ko apa-apaa hi bansangku, kalana sampobali' na lebe balakuasa.

MOHAANGI 1:20

O, Tumpu! Palahatikan mae na aku, kinyonyoangku madi' sanang ka' pinusingmo i hansunmo kalana palabuatan mai-ma'idek u'utu mae. I songko-songko na jalan daagi' ko anu monsilakai, i uno nu laigan daagi' ko anu sinilakamo.

MOHAANGI 2:11

Matangku binangkakmo kalana aijo'mo ihumaang santuu'ku sinakisamo hondo Kinyonyoangku i hansunmo hondo na nontoa bansaa nahungku'mo montoa to ana-anak tiba bungamea' pinoso'mo tutuus jalan nu kota'.

DANIEL 4:19

Nohongo aijo' i Daniel anu sisinanggohanmo i Beltsazar tinolokengkengmo ka' binangangmo panyo ola sinasaingoni'. Sahingga aku, i Tomundo' Nebukadnezar notataemo hi ia, “Beltsazar boli beleyum bata-bata kalana nu sabapi nu ipion aijo' ka' alati'nyo aijo'.” I Beltsazar nontaamimo, “O, Tuanku, talalo hondo ma'ima' de bisuanyo kajadian haha aijo' anu nu kila-kila nu ipion aijo' montuda'mo to sampo-sampobali' nu belento Tuanku.

DANIEL 7:15

Anu singkap tinoangku aijo' nompobingongmo hondo aku ka' nangada'mo na kinyonyoangku.

DANIEL 7:28

Sumo uuka na lapulan aiya. Aku nangada'mo hondo sahingga inesemo, panyo madi' ko samian pe'e na anu pinompoto'ianku apaa na anu jinadimo aijo' iwi-iwi'.

DANIEL 8:27

Lapas aijo' aku i lundengmo lantas nasakitmo pa' sinangkuka na sinaa na kinopinnyo. Lapas aijo' aku nobulamo ka' po'ule'mo nombau pakalaja'anku anu bau kapentingan i tomundo'. Panyo aku madi'mo sinanang na lewa' mompopikilakon anu saja' tinoangku aijo' ka' mule' madi' noko ala nongalati'i.

AMOS 3:6

Te toho' mule' mian i kota', madi' nu lakat de mohongomo onyi' nu tolompet tandanyo mahampatemo? Ugaat mule' sa'angu' na kota' nukona nu balaa' de Tumpu madi' nombee' i balaa'?

HABAKUK 3:16

Nohongo aijo' kinyonyoangku ilakatnyomo, ka' biwingku suele ilangkakatanmo. Aku ilu'usmo madi'mo kinokahosonan, tengkengku tosumpunmo iyaya mae na kalajanganku. Pinotenangkumo na kinyonyoangku montanda'i; hukuman nu Tumpu anu opokona hi aha anu nontumbuhimo mae.

NOMBILANGMO 10:9

Ka' de belemiu mahampate i lipu' nu belemiu montinjohakon kabaanian mongahopi sampobali' anu montumbuhi mae, puuhimo ka' po'onyi' na tolompet haha aijo'. Sahingga Aku, Tumpu Allah nu belemiu na montulungi ka' momposalamat belemiu da sampobali' nu belemiu boli mae monsilakai.

ROMA 10:1

To Utu-utus! Ku indi hondo da bansangku o posalamat. Ka' aku totu-totu'u mondo'akon aha hi Tumpu.

1 KORINTUS 14:8

Sa'angu' na sonto' sangga'at mule': De tolompet madi' opo onyi' ima-ima' ihe na mogogau' da mahampatemo?

GALATIA 4:19

To ana-anakku anu ku kanonongi! Uuka aiya aku po'ule' mule' nongoa'i sansala kalana komiu. Aku mongoa'i sansala sumomo samian na tina nu anak anu mongoa'imo sansala tempo'nyo mohampeakonmo anak. Aku saja' mongoa'i sansala, de sipat-sipat i Kristus ma'isa minsoop hi butong miu!

TO MIA-MIAN KOPIAN 5:21

Kaunyo nu Kison nosawemo nonganjuhakonmo sampobali' nu aha. Tumbuhimo, tumbuhimo babaani ka' paho-pahoson o kinyonyoangku!