YEREMIA 2:30 - KITAB NU TUMPU ALLA LELE MA'IMAI'

³⁰ Ola palasuma' na belemiu Ku hukum, kalana belemiu madi' mongka'oho' montalima pokinde'. Pokakana susumo singa anu nangamu'mo, sumo aijo'mo na belemiu nompateimo to nabi-nabi nu belemiu.

YEREMIA 2:30 ပူးပေါင်းရင်းမြစ်များ

1 TOMU-TOMUNDO' 19:10

Tinaaman i Elia, “O Tumpu, Tumpu Allah Anu Daka' na kuasanyo, aku saja'mo nokalaja ola samata-mata mombau anu nu palentahkon. Panyo mian nu Israel anu pinalesayamo nolanggaimo palajanjian nu aha hi belento Tumpu. Aha nohobo'akonmo mezbah nu Belento ka' nompateimo to nabi-nabi nu Belento. Me aku sausa' na daagi' aiya tinumuu', ka' uuka aiya aha kahanda'mo mompatei aku!”

1 TOMU-TOMUNDO' 19:14

Tinaaman i Elia, “O Tumpu, Tumpu Allah Anu Daka' na kuasa'nyo, aku saja'mo nokalaja ola samata-mata mombau anu o palentahkon nu Belento. Panyo' mian nu Israel anu pinalesayamo hi belento nolanggaimo palajanjian nu aha hi belento. Aha nohobo'akonmo mezbah nu belento ka' pinaha pateanmo nu aha na iwi-iwi' na nabi nu belento. Me aku aiya sausa' na daagi' tutuu', ka' uuka aiya aha kahanda'mo mompatei aku!”

2 TAWARIKH 24:21

Panyo mian da'isan sinangaja'mo monggagakon i Zakharia, ka' i Tomundo Yoas suele nosangaja'mo tiba kasangaja'an aijo'. Ia madi'mo nonginau' kanonongan anu binaumo i Yoyada tuuma i Zakharia hi ia. Pinalentahmo i tomundo, sahingga i Zakharia pinahambunu'akonmo nu batu sampe sinilakamo i popasan nu Laigan nu Tumpu. Salatan ia kahanda'mo mompoputus nyawanyo, i Zakharia daagi' notatae, “Ku amalakon da Tumpu montoa mae kalakuan ka' mombalosakon beleyum!”

2 TAWARIKH 28:22

I uno nu han anu talalomo hondo sinusa' aijo', i Ahas ola mule' ahi' nompaka baladosa'mo hi Tumpu.

2 TAWARIKH 36:16

Panyo aha madi' nontapali to mia-mian anu sinai mae Tumpu Allah aijo', ka' lewa' mongkokojoi to nabi-nabi-Nyo ka' madi'mo nontapali potatae-Nyo. Ahennyo Tumpu notambuha'mo hondo hi aha sahingga madi'mo daagi' ko jalan anu nubau nu aha da madi'mo mohumpak hukuman.

NEHEMIA 9:26

Panyo mian anu palesayamo hi Belento notomuhukmo ka' madi'mo nontuluti Belento, madi'mo nombau apaa na anu kokoonyo nu atulan ka' mule' apaa na anu ingatunmo nu Belento, nompateimo to nabi-nabi anu nonompokinde'imo aha, ka' anu nompalentahmo aha, po ule' palesaya hi Belento, Tumpu Allah nu aha. O Tumpu de Belento po ule' mule' nu alu nu aha,

YESAYA 1:5

Kadaka' belemiu me saja' monggagakon? Mongka'oho' na belemiu da o hukum nu anu lebe talalo maboat hondo? Ubak nu beleyum sinongkomo nu kumahut anu minana' ka' mabusik, ma'idekanmo na kinyonyoa nu beleyum ka' pikilan nu beleyum.

YESAYA 59:3

Belemiu sinala'mo kalana binaleko'mo ka' mule' nombaumo anu madi' totu'u kalana talalomo ahi' sininggi ka' sola'mo nompatei mian.

YESAYA 9:13

Kalana aijo' i uno nu sansinaa Tumpu nohukumo to pola-polaya' nu aha Israel tiba aha mian da'isan. Kinolong-Nyomo ka' ingalin-Nyomo na ubaknyo tiba ikunyo.

YEREMIA 31:18

Ihongong-Kumo na mian nu Israel notatae kahomo i uno nu kasusa'an na kinyonyoa, ‘O Tumpu, kami sumomo ahi' binatang anu ma'isa pininyaman panyo ingajan mo nu Belento na kami da tulu-tulutan, ka' uuka aiya kami kahanda'mo minsusule' mae hi Belento. Jadi, boamo mae na kami da minsusule'mo o Tumpu, Tumpu Allah mami.

YEREMIA 46:14

O “Yeremia bebakon na lele aiya isongko-songko na kota' Mesir, aijo'mo i Memfis, i Migdol, tiba i Tahpanhes, ‘Posadiamo ka' tinjohakon ahi' kalana iwi-iwi' na anu nu belemiu ohansunimo i uno nu pahampatean!

YEREMIA 5:3

Anu sahondo-hondonyo ahi' nu tuntut nu Tumpu aijo'mo tulu-tulutan. Tumpu nondokemo belemiu panyo madi' ahi' opajuli nu belemiu. Ia nohansunimo belemiu panyo belemiu madi' mongka'oho' opokinde'i. Belemiu panggaga hondo ka' madi' mongka'oho' balatobat mompala'i dosa-dosa' nu belemiu.

YEREMIA 7:28

Jadi poto'i hi aha taalu' aha sa'angu' na bansa anu madi' mongka'oho' tulu-tulutan hi beleng-Ku, Aku, Tumpu Allah nu aha. Aha madi' mongka'oho' monginau' hukuman anu ingoa'anmo nu aha. Tulu-tulutan hi beleng-Ku imadi'anmo, pakalaus madi'mo daagi' binisalakon.”

MOHAANGI 4:13

Panyo han aijo' jinadimo, kalana dosa' nu to ima-imam ka' to nabi-nabi. Aha nombubusakonmo baso', nu mian anu madi' ko sala'nyo.

YEHEZKIEL 22:24

“O, manusia anu madi' tumuu' batu, poto'imo hi aha mian nu Israel, taalu' tano' nu aha nahumimi'imo kalana aijo' anu notambuha'mo ka' mohukumo aha.

YEHEZKIEL 24:13

O, Yerusalem palabuatan nu beleyum pala-palaganta aijo' nohumimi'imo butong nu beleyum. Aku, nompisobamo nompobelesi' beleyum panyo madi' ahi' kinogunanyo, kalana bele nu tataap ahi' mahumimi'. Beleyum madi'mo po ule' belesi' sahingga Ku potudunmo na tambuha'Ku hi beleyum.

DANIEL 9:13

Iwi-iwi' na balaa' anu tinulismo i uno nu atulan i Musa binee'mo mae nu belento hi kami. Panyo maumo ahi' sumo aijo' o, Tumpu mami daagi' ahi' saja' kami madi' mombau anu momposanang kinyonyoa nu Belento. Kami daagi' sabole-bole madi' mongka'oho' mompala'i iwi-iwi na dosa' mami ka' madi mule' mongka'oho' mompalahatikan to panga-pangajalan nu Belento.

ZEFANYA 3:2

Silakamo na kota' anu madi' mongka'oho' montalima pokinde' nu Tumpu ka' madi' mule' mompalahatikan apaa na anu Nu tewa' boli obau, ka' anu madi' mongasanakon nasipnyo hi Tumpu ka' madi' momoita tulung hi Ia!

MATIUS 23:29

“Silakamo na komiu to gulu-gulu' agama ka' to mia-mian nu Farisi! Komiu ola ahi' mombau pula-pula! Komiu mombau tampat pongkubulan anu to ma'i-ma'ima' bau anu nu to nabi-nabi, ka' mombunga-bungai kubulan nu to mia-mian anu ma'ima' na kantumuu'annyo.

SISIKON NU TO RASUL-RASUL 7:52

Apaa daagi' ko nabi anu madi' sinakisa nu mompolee' miu? Aha nompateimo to posa-posaihon nu Tumpu anu u'utu pe'e mae nombebakonmo tukoonyo. Posaihon nu Tumpu anu totu'u, tokaje mae. Ka' uuka aiya komiu nongkabisa'imo ka' nompateimo Posaihon nu Tumpu aijo'.

1 TESALONIKA 2:15

To mia-mian haha aijo'mo na anu nompateimo i Tumpu Yesus, ka' to nabi-nabi, ka' nongkabisa'imo kami. Aha nompo'uwaliakonmo iwi-iwi' na mian, ka' Tumpu madi'mo hondo sinanang hi aha.

ANU PINOTO'I HI YOHANES 16:9

Mian pinapuanmo nu anu talalo hondo mapanas aijo' sahingga aha nongkutukimo sanggo nu Tumpu, anu mongkuasai balaa' haha aijo'. Mau mule' sumo aitu, aha madi' mongka'oho' da madi'mo lewa' mombau dosa' nu aha, ka' madi'mo mongka'oho' mompuji' katalasanggoan nu Tumpu.