YEREMIA 2:25 - KITAB NU TUMPU ALLA LELE MA'IMAI'

²⁵ O Israel bolimo daagi' beleyum mopadeka' lewa' mololoi' pilogot ka' bolimo daagi' lewa' moloboo' molaga aha, dumo ahi' tengke nu beleyum belaon ka' mule' onyopan nu beleyum motismo kalana megotmo. ‘Madi'mo, aku madi'mo bisa minsusule',’ sumo aijo' na tinaloakon nu beleyum, ‘kalana aku nongka'ima'imo pilogot ka' kahanda'mo ahi' mombatuki aha!’ ”

YEREMIA 2:25 ပူးပေါင်းရင်းမြစ်များ

2 TAWARIKH 28:22

I uno nu han anu talalomo hondo sinusa' aijo', i Ahas ola mule' ahi' nompaka baladosa'mo hi Tumpu.

2 TAWARIKH 28:23

Ia nosi silakaimo butongnyo ka' miannyo kalana nonsombahkonmo koloban hi to pilo-pilogot nu aha mian Siria anu nompatundu'mo ia. Ia binapikin, “To pilo-pilogot nu Siria nontulungimo to tomu-tomundo' nu Siria, jadi de aku nonsombahkon koloban hi aha, tantu nutulungimo nu aha na aku.”

YESAYA 2:6

O, Tumpu Belento nompala'imo mian anu palesayamo hi Belento, lee' mae i Yakub! Kalana iyaya mae ilipu' aiya mian lewa'mo mompake pangatahuan anu nolengkat ame isasu kabete'an ka' anu nolengkat mae hi aha mian nu Filistin. Aha to mia-mian montulutimo adat nua aha mian anu lengkat mae isalipu'an.

YESAYA 57:10

Madi' ko kapa'osannyo na belemiu molio to pilo-pilogot. Osangka nu belemiu aha timbali mombee'i kahosonan, sahingga belemiu madi'mo mabuhuk.

YEREMIA 13:21

Daagi' apaa na anu otaloakon nu belemiu, de to mia-mian anu binaumo nu belemiu salaku sangalu nu belemiu, mompatundu'mo ka' mongkuasaimo belemiu? Memang belemiu mongoa'imo sakit susumo boune anu mohampeakon anak.

YEREMIA 13:22

Ugat opokilawamo nu belemiu kadaka' iwi-iwi aijo' nongkonamo mae butong nu belemiu, kadaka' baju' nu belemiu bineakmo ka' belemiu pinakisamo na nompatiduhusi. Da osumbu' nu belemiu saba' aijo' jinadimo kalana dosa' nu belemiu dinaka'mo hondo.

YEREMIA 14:10

Mongkona bansa aijo', Tumpu notataemo, “Aku madi'mo sinanang hi mian haha aijo' anu saja' mopalai mompala'i Aku, ka' madi' mongka'oho' mongkuasai butong nu aha.”

YEREMIA 18:12

Panyo aha saidi' mae montaami, ‘Apaa na gunanyo? Kami na tataap ahi' montuluti posi pongka'oho' mami! Kami toto samian na mombau ahi' apaa na anu nu ka'ima'i nu kinyonyoa mami ma'i-ma'idek!’ ”

YEREMIA 2:31

O mian nu Israel potombihing mae na potataeng-Ku aiya. Pa' toho'mo na Aku susumo padang tampat anu mateges na jinadi' atina hi belemiu kabai pa' sumo tano' anu pinikatmo hondo? Panyo kadaka' belemiu notataemo koonyo nu belemiu, belemiu mongkahanda'imo bebas, ka' madi'mo daagi' mongka'oho' minsusule' mae hi beleng-Ku?

YEREMIA 22:20

Tumpu notatae, “O mian anu jojoong i Yerusalem, lako mamba i Libanon ka' i Basan, ka' poloboo'mo kiijo' mae. Polokihis aita' mae i bungkutnyo nu Moab, kalana iwi-iwi' na sangalu nu belemiu pinatundu'mo.

YEREMIA 22:21

Pinoto'ing-Kumo hi belemiu salatanmo pe'e ka ada'an nu belemiu daagi' na'ima' panyo belemiu madi' mohongo-hongo. Memang sumo aijo'mo na kalakuan nu belemiu naipuan pe'e mae sangkutnyo tempo' uuka aiya; madi' toho' belemiu mongka'oho' tulu-tulutan mae hi beleng-Ku.

YEREMIA 3:13

Akuimo taalu' beleyum sinala'mo ka' notomuhukmo hi Tumpu, Tumpu Allah nu belemiu. Akuimo taalu' ipatuu nu kau' toto sangkau anu honnyo tambok beleyum talalomo hondo nongka'ima'i to pilo-pilogot nu bansa sangga'at ka' madi'mo nontuluti sinin na palentahng-Ku. Aku, Tumpu notataemo.”

YEREMIA 44:17

Iwi-iwi' na anu jinanji'mo mami, tionyo ahi' obaumo mami. Kami saja'mo ahi' monsombahkon koloban hi Tomundo' boune nu Suluga' ka' mondudu'akon anggur salaku palasombahan hi ia susumo anu biasamo nu bau nu aha ikota-kota' Yehuda ka' ijalan-jalan ikota' Yerusalem nu aha mompolee' mami, tiba aha to tomu-tomundo' ka' to mia-mian anu kopangkatnyo aijo'mo pamalentah mami ka' mule' ahi' kami. Tempo'nyo aijo' manjoo' hondo na anu okaan mami, kami mohumpakmo kamajuan ka' madi'mo ko anu okasusa'akon mami.

MOHAANGI 1:2

Sampahu toka sampahu ia humaang kalana sinusa'mo lolu'nyo jinumujumo i gagisingnyo. Madi' ko samian pe'e na to sindu-sindua'annyo na mongka'oho' mohase' ia. Ia kinabisa'anmo nu to sanga-sangalunyo anu tinimbalimo sampobali'nyo.

MOHAANGI 4:4

To bunga-bunga mea' madi'mo daagi' pinosusu, sahingga sinilakamo nu megot. To ana-anak momoita mongkaan, panyo madi' ko anu mombee'i.

YEHEZKIEL 20:32

Belemiu kahanda' mongkakanai bansa-bansa sangga'at ka' mule' mian anu jojoong ilipu' sangga'at anu monsombah kau' tiba batu. Panyo apaan anu nu kahanda'i nu belemiu atina' madi' nu humpak nu belemiu'.’ ”

HOSEA 2:3

De ia tataap masala', Ku ukatakonmo na baju'nyo da ia langgo' susumo ia salaje i hampeakon. Ku pojadije na ia susumo tano' anu kinuunmo, ka' nategesmo, ia natemo nu megot.

HOSEA 2:5

Tina nu beleyum masala' ka' madi' monsumbu' ma'ambang. Ia notatae, ‘Aku mamba hi to sindu-sindu'anku anu nombee'imo aku anu okaan ka' anu o inum, hude wol ka', hude lenan, lanya' nu zaitun tiba anggur'.’

MALEAKHI 3:14

Belemiu notatae, ‘Palasuma na aku monsombah Tumpu. Apaa na gunanyo mombau anu halus obaunto salaku bau pongadati Tumpu Anu Daka' na Kuasanyo kabai opotoanto hi Ia nakalakuanto salaku bau pomponyata saba' kita aiya nompele-pele'mo na nombau kasala'anto?

LUKAS 15:22

Panyo papanyo nolaga to poka-pokauhonnyo ka' notatae, ‘Lia-lia'! Alamae na baju' anu talalo ma'ima' ka' popusok hi ia. Posolutakon na sinsing i kangkamnyo, ka' sapatu i tengkenyo.

LUKAS 16:24

‘Tuumangku Abraham!’ loboo' nu mian kaya aijo'. ‘Kalibosi na aku. Pokau mae na i Lazarus molobong bua' nu limanyo i uno nu uee lantas toka mae mohumpisi jila'ku. Tahahumo sansala na aku i uno nu apu aiya!’

ROMA 8:24

Kalana samata-mata montaha'imani apaa na anu jinanji'nyomo, sahingga kita oposalamat. Panyo de anu otaha'imaninto aijo' tinoantomo, saba' aijo' misa'mo anu otaha'imani. Kalana ihe na daagi' montaha'imani apa-apaa i han anu tinoanyomo?

PO'ULE' INGULIT 28:48

Kalana aijo' belemiu tionyo ahi' ta'alukumo hi sampobali' nu belemiu anu sinaimo mae nu Tumpu mongewa belemiu. Belemiu mongoa'ije ohop, mongoa'ije megot ka' langgo' ka' iwi-iwi' na han madi'mo ko anu daagi'. Tumpu mombee'imo kasansala'an anu taha-tahahumo, sampe belemiu silakamo.

PO'ULE' INGULIT 32:16

Aha nonsombahmo pilogot, sahingga Tumpu notambuha'mo, kalana aha nongka'ima'imo pilogot Ia notambuha'mo kalana aha nombaumo anu ma'idek aijo'.