YEREMIA 2:20 - KITAB NU TUMPU ALLA LELE MA'IMAI'

²⁰ Tumpu notatae, “Pininmo na beleyum madi'mo nongka'oho' nohongo-hongo Aku; madi'mo mongka'oho' mo tuluti kabai monsombah Aku. Aita' mae itoto sa'angu' na puge'nyo anu matunjo, ka' akaong i patuunyo nu toto sangkau na kau' anu tambok na honnyo beleyum monsombahmo to pilo-pilogot anu mombee'i kalumba'an.

YEREMIA 2:20 ပူးပေါင်းရင်းမြစ်များ

1 TOMU-TOMUNDO' 12:32

Lapas aitu imam haha aijo' pinaha pojoongmo i Yerobeam i Betel mokalaja kiijo' mae ka' ia suele nonsombahkonmo koloban hi sapi' mosoni' haha aijo' anu binaunyomo aijo'. Lantas tinantukannyomo de tangganmo sampulu' ka' olima' bitu'on ko ualu'nyomo, aijo'mo na sinaa daka' nu mian Israel, pokakanamo sumo sinaa daka' hi aha mian nu Yehuda. Toka sinaa aijo' i Yerobeam mambamo i Betel ka' monsombahkonmo koloban olame'akon sinaa daka' anu tinantukannyomo.

1 TOMU-TOMUNDO' 14:23

Aita ito bungku-bungkutnyo tiba i patu nu kau' anu toto daka-daka' aha nombaumo tampat ponsomban pilogot ka' lewa'mo nompotinjo batu toto tangka-tangkas' to pato-patong nu pilogot boune Asyera da osombah.

MAZMUR 107:14

Aha i uno nu pikat, sinabatakon-Nyomo, ka' nombotu'akonmo lante' besak anu pinompungu aha.

MAZMUR 2:3

Anu montoongi kakuasa'an haha aijo' notataemo, “Imbo' da opaha pato'imo na kakuasa'an nu aha da o'alantomo na kamaladeka'anto!”

MAZMUR 78:58

Aha madi'mo nohongo-hongo Tumpu Allah, tandanyo aijo'mo aha nombaumo tampat ponsomban pilogot, ka' ia madi'mo sinanang hi aha kalana patong nu aha haha aijo'.

NOSABATMO 19:8

Aha iwi-iwi' nontaamimo hingga-hinggat, “Kami mongka'oho' mombau iwi-iwi' apaa na anu tinaloakonmo nu Tumpu, ka' pinontaami nu aha aijo' pinotokamo i Musa hi Tumpu.” Lantas notataemo na Tumpu hi Musa, “Aku tokaje mae hi beleyum i uno nu kundom anu butolu hondo; nuhongoje nu to mia-mian na Aku motatae hi beleyum, ka' otampu'uni aijo', aha saja'mo palesaya hi beleyum.

NOSABATMO 24:3

Lantas i Musa nambamo ka' nombebakonmo hi bansa aijo' iwi-iwi' na palentah ka' atulan nu Tumpu. Aha iwi-iwi' nontaami hingga-hinggat, “Obaumo mami iwi-iwi' na anu tinaloakonmo nu Tumpu.”

NOSABATMO 3:8

Kalana aijo' mambamo na Aku mompobebas aha i lima nu mian Mesir ka' momboamo aha mosabat lengkat i lipu' aijo' mamba mokiijo' i sa'angu' na lipu' anu ewa. Tano'nyo kaya ka' molumba', ka' uuka aiya kajojoongan nu aha bansa Kana'an, bansa Het, Amori, Feris, Hewi ka' Yebus.

YESAYA 1:21

Imonanyo kota' aijo' tulu-tulutan, uuka aiya sumomo samian na anu lewa' masala'! Imonanyo iwi-iwi' na miannyo anu monjojoongi adin ka' mohongo-hongo, panyo uuka aiya jinojoonganmo nu anu topopatei mian.

YESAYA 10:27

Tempo'nyo aijo' Ku pobebasmo na belemiu da bolimo lewa' nu bee'i nu aha palentah Asyur anu saja' mombee'i palentah monsakisa, ka' aha madi'mo daagi' balakuasa mompalentah belemiu.”

YESAYA 14:25

Aha mian nu Asyur anu jojoong i Israel lipu'-Ku aijo' Ku silakaimo ka' anu jojoong aita'mae ibungkutnyo anu Aku na tumpunyo, Ku pahampeja'akonmo. Aku mompobebasmo bansang-Ku da boli lewa' osakisa ka' lewa' obee'i pakalaja'an anu maboat opa-opakisakon nu aha mian Asyur hi aha.

YESAYA 9:4

Sapatu nu suludadu anu ginalupakanmo ka' mule' baju' nu aha anu kahomo baso' saidi' mae mingkotmo mo'angot nu apu.

YEREMIA 13:27

Tinoang-Kumo na belemiu nombau hahan anu Ku ka'ideki. Tinoang-Kumo na belemiu nololoi' to pilo-pilogot sangga'at ipuge'nyo tiba i ale', sumomo ahi' samian na mo'ane anu nongka'ima'imo bengkele' nu mian sangga'at kabai sumomo ahi' ajahan tinokamo na napisunyo hi ajahan behenyo. O mian anu jojoong i Yerusalem, silakamo na belemiu! Hipianje na belemiu madi'mo mombau palabuatan iwi-iwi' anu ma'idek?”

YEREMIA 17:2

Belemiu mian monsombah aijo' i mezbah-mezbah tiba ohii' nu bapilogotan anu pinotinjomo ponsomban Pilogot boune Asyera itoto sa'angu' na kau' anu tambok na honnyo, ka' mule' aita' mae ibawo nu puge'nyo iwi-iwi',

YEREMIA 2:31

O mian nu Israel potombihing mae na potataeng-Ku aiya. Pa' toho'mo na Aku susumo padang tampat anu mateges na jinadi' atina hi belemiu kabai pa' sumo tano' anu pinikatmo hondo? Panyo kadaka' belemiu notataemo koonyo nu belemiu, belemiu mongkahanda'imo bebas, ka' madi'mo daagi' mongka'oho' minsusule' mae hi beleng-Ku?

YEREMIA 3:13

Akuimo taalu' beleyum sinala'mo ka' notomuhukmo hi Tumpu, Tumpu Allah nu belemiu. Akuimo taalu' ipatuu nu kau' toto sangkau anu honnyo tambok beleyum talalomo hondo nongka'ima'i to pilo-pilogot nu bansa sangga'at ka' madi'mo nontuluti sinin na palentahng-Ku. Aku, Tumpu notataemo.”

YEREMIA 30:8

Tumpu Anu Mahakuasa po ule' mule' notatae mae hi mian anu palesayamo hi Ia, “De maluanyo tokamo mae na sinaa aijo' tokon anu pinokona itundun nu beleyum Ku pato'akonmo ka' anu bau pinompungu Ku bukaimo. Belemiu madi'mo daagi' timbali botuan hi aha mian anu isalipu'an.

YEREMIA 5:5

Sahanyo aku mamba hi aha to pama-pamalentah ka' mompoto'i hi aha. Tantu nu sumbu' nu aha apaa na nu kahanda'i tiba nu tuntut nu Tumpu Allah hi aha.” Panyo aha iwi-iwi' suele madi' ahi' mongka'oho' nu palentah nu Tumpu; aha madi' mongka'oho' montuluti Ia.

YEHEZKIEL 16:28

Panyo beleyum ma'isa ahi' ma'osa; mokonyo aijo' sola'mo nu loloi' na aha mian nu Asyur. Beleyum tinimbalimo mian anu saja' masala' tiba aha, panyo madi' ahi' nu osai mae nu aha.

YEHEZKIEL 16:31

I tampat-tampat anu loas na tano'nyo i uno nu kota' ka' isohipi' nu jalan beleyum nombaumo ponsomban pilogot ka' sola' masala' itampat aijo'. Panyo beleyum misa' sumo mian sangga'at lelewa' masala' anu mompalaui doi.

YEHEZKIEL 16:41

Nu papuimo nu aha na laigan nu belemiu iwi-iwi' ka' mompokaumo to bou-boune monsakisi hukuman anu opokonamo hi belemiu. Sumo aijo' na Aku mompobelenti palabuatan nu belemiu sasaja' masala'. Beleyum madi'mo daagi' sola' mombagi-bagiakon palasen hi to sinta-sinta nu beleyum.

YEHEZKIEL 20:28

Aku nombomo mae aha itano' anu jinanji'-Kumo hi aha. Salatan aha nontoamo puge'nyo haha aita' anu toto tangka-tangkas ka' mule' kau' anu toto tambo-tambok na honnyo aha nomsombahkonmo koloban itampat haha aijo'. Aha nonsaduakonmo da Aku notambuha' kalana koloban-koloban anu opotunu ka' mule' aha nonsombahkonmo anggur nu aha.

YEHEZKIEL 23:5

Maumo ahi i Ohola tinimbalimo bengkele'-Ku panyo ia tataap ahi' saja' masala' ka' talalo ahi' saja' majota na labot molayani to sinta-sintanyo anu lengkat mae i Asyur.

HOSEA 1:2

Tempo'nyo Tumpu notatae, momonanyo hi bansa Israel, anu pinotokakonku, Tumpu notatae, “Hosea, osoaimo na samian anu mongka'oho' saja' masala' ka' to ana-anak nu beleyum suele timbali sumo ia. Mian-Ku anu palesayamo pokakanamo sumo bengkele' nu beleyum aijo'; aha atina' madi' tulu-tulutan hi beleng-Ku ka' ola ahi' mompala'i Aku.”

HOSEA 2:5

Tina nu beleyum masala' ka' madi' monsumbu' ma'ambang. Ia notatae, ‘Aku mamba hi to sindu-sindu'anku anu nombee'imo aku anu okaan ka' anu o inum, hude wol ka', hude lenan, lanya' nu zaitun tiba anggur'.’

HOSEA 3:3

Pinoto'ingku hi ia tionyo ahi' montanda'i aku to pia-piamanga na kopinnyo. Samantala aijo' ia madi' timbali mongka'ima'i mo'ane kabai masala', ka' aku suele madi' timbali mongohani ia.

HOSEA 4:13

I tampat-tampat ponsomban pilogot i puge'nyo ka' i bungkutnyo belemiu nonsombahkonmo koloban ka' nompapuimo kamangian i patu nu to kau-kau' anu daka' ka' hoopi' nahonnyo kalana ikiijo mae tampat anu koongon. Panyo apaa na ka'ahenannyo? To lalangkoyang nu belemiu nasala'mo, ka' to moni-monian nu belemiu boune nasala'mo!

HOSEA 9:1

O bansa Israel, bolimo daagi' molame'akon iwi-iwi' na sinaa daka' nu belemiu susumo to bansa-bansa sangga'at. Belemiu nompala'imo Tumpu nu belemiu ka' madi'mo nontuluti Ia. I tampat pongututan gandum belemiu mompobalukmo butong nu belemiu salaku anu masala' hi pilogot Baal, ka' sanangmo na montalima gandum anu osangka nu belemiu salaku pontamboi mae nu pilogot aijo' hi belemiu!

IMAMAT 26:13

Aku, Tumpu Allah nu belemiu anu nomboamo mae belemiu nosabat lengkat mae i Mesir da belemiu madi'mo daagi' timbali botuan. Kakuasa'an anu nongkabisa'imo belemiu i hopu'an-Kumo ka' belemiu Ku potimbalimo mian anu bebas.”

NAHUM 1:13

Uuka aiya kuasa nu Asyur o ingkotimo madi'mo mompalentah belemiu ka' Ku botu'imo na lante anu nonsegoti belemiu.”

PO'ULE' INGULIT 12:2

De belemiu ninsoopmo i lipu' aijo' belemiu tionyo ahi' mongidei tampa-tampat ponsomban aita' i bungkutnyo anu to tangka-tangkas ka' i puge'nyo iwi-iwi' ka' i patu nu kau' anu toto hohopo' na honnyo, tampat nu bansa anu jojoong ikiijo' monsombah to pilo-pilogot nu aha.

PO'ULE' INGULIT 15:15

O inau' ahi' na belemiu naipuan mae binau botuan i Mesir lantas pinobebasmo nu Tumpu Allah nu belemiu; mokonyo aijo' Aku mombee'i palentah aiya hi belemiu.

PO'ULE' INGULIT 26:17

Sinaa aiya belemiu mongakuimo Tumpu salaku Tumpu Allah nu belemiu. Belemiu nonjanji'mo da tulu-tulutan hi Ia, ka' mombau iwi-iwi' na atulan-Nyo tiba palentah-Nyo.

PO'ULE' INGULIT 4:20

Panyo belemiu bansa anu pinosalamat-Nyomo lengkat mae i Mesir, tampat belemiu nongoa'i sansala anu taha-tahahumo. Belemiu binoa-Nyomo mae nosabat lengkat i lipu' aijo' da timbalimo bansa-Nyo susumo balu-balu'nyo belemiu uuka aiya.

PO'ULE' INGULIT 4:34

Pa' toho'mo kino pilogot anu baani nongala sa'angu' na bansa, hi aha to bansa-bansa anu aiya i dunia lantas nompotimbalimo aha mian anu pinalesayamo hi Ia, susumo anu binaumo nu Tumpu Allah miu hi belemiu kiijo' mae i Mesir? Pinosi toamo nu belemiu mosia na Tumpu Allah nompotoka balaa' ka' pahampatean, ka' nombaumo hahan anu okabangangi ka' mule' nombaumo hahan anu opalias kalana kahosonannyo anu tahahumo hondo aijo'.

PO'ULE' INGULIT 5:27

Kalana aijo' lako'mo Musa, ka' hongo mae iwi-iwi' apaa na anu nu poto'i nu Tumpu Allah-nto lantas poto'i mae hi kami apaa na anu Nu poto'i hi beleyum. Kami mohongoje ka' tulu-tulutanmo.’

YOSUA 1:16

Sahingga tulunan nu bansa Ruben, Gad ka' sambagian na tulunan nu bansa Manasye aijo' nontaamimo, “Maumo pa' apaa na anu opalentahkon nu belento hi kami obaumo mami, ka' maumo pa' moya na ponsaian nu belento kami mamba, kami mambamo.

YOSUA 24:24

Lantas mian haha aijo' notataemo hi Yosua, “Kami palesayamo ka' mohongo-hongomo ola samata-mata hi Tumpu, Tumpu Allah-nto. Kami montulutimo palentah-Nyo iwi-iwi'.”

YOSUA 24:26

Iwi-iwi' na atulan tiba iwi-iwi' na palentah-palentah haha aijo' tinulismo i uno nu kitab Atulan nu Tumpu Allah. Lapas aijo' ia nongalamo sa'angu' na batu anu daka', lantas pinotinjonyomo i patu nu kau' anu daka' i tampat bau ponsomban Tumpu.

ANU PINOTO'I HI YOHANES 17:1

Lapas aijo' sala'samian na malaikat anu aha popitu' aijo' nontoongimo popitu' na tampat nu anggurnyo tinoka mae hi belengku ka' notatae, “Imbo', ku potiju'je hi belemiu mosia na anu talalo hondo masala' aijo' o hukum, aijo'mo kota daka' aijo', anu pinotinjo koko kaunyo haha aijo'.

TO MIA-MIAN KOPIAN 10:6

Aha mian nu Israel po'ule' mule' binaladosa' hi Tumpu. Aha madi'mo mongkalinga Tumpu ka' madi'mo daagi' nonsombah Ia. Aha nonsombahmo to pilo-pilogot nu bansa Siria, Sidon, Moab, Amon tiba Filistin.

TO MIA-MIAN KOPIAN 2:11

Lapas aijo' aha mian nu Israel binaladosa'mo hi Tumpu. Aha madi'mo nonsombah Tumpu, Tumpu Allah nu mompolee' nu aha, aijo'mo Tumpu Allah anu nomboamo mae aha nosabat lengkat i Mesir. Aha nontampu'uni nonsombah Baal ka' Asytoret ka' to pilo-pilogot sangga'at anu nusombah nu to bansa-bansa anu montikubi aha. Sahingga tinambuha'anmo nu Tumpu na aha ka' nompojohokmo sampobali' nu aha nontumbuhi ka' nompahuhuimo aha. Aha madi'mo noko ala nongahopi sampobali' nu aha anu aitu mae nontikubi aha.

1 SAMUEL 12:10

Lapas aijo' aha binalado'amo hi Tumpu ka' nongakuimo dosa' nu aha; koonyo nu aha, 'Kami binaladosa'mo kalana madi'mo pinalesaya hi belento, o Tumpu ka' nonsombahmo to pato-patong Pilogot Baal tiba Asytoret. Panyo uuka aiya posalamat mae na kami da boli nu poposia nu sampo bali' mami, sahingga kami palesayaje hi belento!'