YEREMIA 18:16 - KITAB NU TUMPU ALLA LELE MA'IMAI'

¹⁶ Lipu' aiya pinotimbalimo nu aha tampat anu okabuhuk hondo ka' saja'mo timbali bau sisik anu okokojoi. Iwi-iwi' na anu motulu ikiijo' mahalilokanmo ubak kalana mabuhukmo.

YEREMIA 18:16 ပူးပေါင်းရင်းမြစ်များ

MAZMUR 22:7

Panyo aku aiya ias, misa' manusia, o'alu ka' opopo'ambang nu mian da'isan.

YEREMIA 25:9

‘Ku lagamo mae na bansa iwi-iwi' anu lengkat mae isasu utara, tiba suele i Nebukadnezar posaihon-Ku tomundo' nu aha Babel. Aha Ku palentahmo da mompahampateakonmo mongewa Yehuda tiba anu jojoong kiijo' ka' mule' sinin na bansa anu mompaha ohani. Bansa Yehuda tibamo bansa-bansa sangga'at anu mompaha ohani Ku silakaimo ka' mule' Ku pojohokmo da hansunmo sampe toka sidu-sidutu'. To mia-mian anu montoa ia tolokengkengmo ka' mule' mabuhukmo. Aku, Tumpu notataemo.

YEREMIA 19:8

Ku potudunmo hi aha na balaa' anu opalias hondo ikota' aiya sahingga batu-batu mian anu motulu ikiijo' tolokengkengmo ka' mabuhukmo.

MATIUS 27:39

To mia-mian anu notulu i kiijo' kinolilo-lilok na ubak ka' nongambangi i Yesus.

MIKHA 6:16

Iwi-iwi' aijo' jadimo saidi' mae kalana belemiu nontulutimo palabuatan anu toto ide-idek hi Tomundo' Omri, tiba anaknyo aijo'mo i Tomundo' Ahab. Belemiu nontulutimo sipa-sipat nu aha. Kalana aijo' Ku hansunimo na belemiu, ka' belemiu lewa'mo opobau-bau ka' mule' lewa'mo o'alu nu iwi-iwi na bansa.”

YEREMIA 50:13

Kalana Aku notambuha'mo sahingga Babel timbalimo tampat anu nohobo'-hobo'mo ka' madi'mo daagi' ko anu monjojoongi. Iwi-iwi' na mian anu motulu ikiijo' tolokengkengmo ka' mule' mabuhukmo.

YEREMIA 49:13

Aku basumpa' atas sanggong-Ku saba' kota' Bozra timbalimo ahi' tampat anu okabuhuk hondo anu pinala'ianmo nu mian. Mian saidi' mae mongkokojoimo ia ka' mompakemo sanggonyo lewa' bau pontotobi'akon. Iwi-iwi' na kampung anu toto ise-ise' kiijo' idaerahnyo singkapmo ma'idek sampe toka sidu-sidutu'. Aku, Tumpu, notataemo.”

1 TOMU-TOMUNDO' 9:8

Laigan ponsomban aiya timbalimo tambulan nu anu nopapu sahingga toto samian anu montulu i kiijo' tolokengkeng ka' mongoa'i mabuhuk. Aha motatae, 'Kadaka' Tumpu nombaumo susumo aijo' i lipu' ka' laigan aiya?'

MARKUS 15:29

To mia-mian anu motulu i kiijo' ko lilo-lilokmo na ubak ka' montaloakon potatae mompopo'ambang i Yesus. Aha notatae, “Ee, Beleyum na anu mongka'oho' mongidei Laigan nu Tumpu, ka' po'ule' mompotinjo ola i uno nu tolun sinaa.

YESAYA 37:22

pinoto'i nu Tumpu, “Kota' Yerusalem mongkokojoimo ka' mongalumo beleyum, Sanherib!

YEHEZKIEL 12:19

Poto'iakonmo hi iwi-iwi' na bansang apaa na anu pinoto'ing-Kumo, Aku Tumpu Anu Matangkas na Kuasanyo, taloakon hi mian anu jojoong i Yerusalem anu daagi' jinojoong itano' nu aha. Aha saidi' mae langkakatanmo de hau-haunyomo mongkaan ka' mule' langkakatanmo de hau-haunyomo monginum. Tano' nu aha saidi' mae kunmo, kalana iwi-iwi' na mian anu jojoong ikiijo' me saja' molanggai atulan.

YEHEZKIEL 6:14

Memang Ku tangkakonmo na limang-Ku ka' mohansunimo lipu' nu aha, sahingga timbalimo liing hondo lengkat pe'e mae itampat anu Mateges sasu Salatan toka-toka ikota' Ribla anu isasu utara. Itampat-tampat anu nu jojoongi nu aha mian Israel madi' ko samian na anu oposalamat. Sahingga nu sumbu'je nu aha mian iwi-iwi' taalu' Akumo ahi' na Tumpu.”

YEREMIA 9:11

Tumpu notatae, “Yerusalem Ku pojadimo tampat anu ihansunmo baumo tampat paninsulukan nu dedeng nu alas. Sinin na kota' nu aha Yehuda timbalimo liing, timbalimo tampat anu madi'mo ojojoongi.”

YESAYA 6:11

Aku nompokilawamo, “Sampe tokaje hi pian na kopinnyo na anu susumo aiya saja' jadi, o, Tumpu?” Tinaaman-Nyo mae, “Sampeje iwi-iwi na kota' hansunmo ka' madi'mo ko anu monjojoongi, iwi-iwi' na laigan madi'mo ko anu monjojoongi ka' mule' tano' madi'mo ko apa-apaanyo ka' mategesmo.

MAZMUR 44:14

Pinotimbalimo nu Belento na kami sola' nu kokojoi nu mian anu mompaha ohani tiba kami aha sola'mo mongalu ka' mongkokojoi kami.

PO'ULE' INGULIT 29:23

Ale' miu iwi-iwi' madi'mo ma'omuk ka' nutumuu'imo nu padang ka' tabuhonmo nu belelang ka' timuson. Tano'nyo madi'mo timbali posu'anan ka' hemput madi'mo mongka'oho' tumuu' ikiijo'. Lipu' nu belemiu sumomo to kota-kota nu Sodom ka' Gomora, Adma ka' Zeboim anu ingideanmo nu Tumpu tempo'nyo Ia talalomo hondo notambuha'.

PO'ULE' INGULIT 28:59

Tumpu mompotokamo mae hi belemiu ka' hi lee' nu belemiu to panya-panyakit anu madi' opoko ala opa'alin ka' panyakit anu molele anu madi' opoko ala opakuli'i.

IMAMAT 26:43

Panyo tano' aijo' tionyo ahi' o alini pe'e na miannyo da totu-totu'u milawe pe'e. Ka' mian anu pinalesayamo hi beleng-Ku tionyo ahi' montalima iwi-iwi' na hukuman anu Ku nabu'akon hi aha kalana madi' mongka'oho' montuluti atulan ka' palentang-Ku haha aiya.

IMAMAT 26:32

Lipu' nu belemiu Ku ideimo ingko-ingkot sahingga sampobali' nu belemiu anu nonjojoongimo kiijo' tolokengkengmo na montoa anu ingideanmo hondo aijo'.

MAZMUR 109:25

To mia-mian anu montoa mae aku, mongalu mae aku ka' molilo-lilokakon ubak.

YEREMIA 42:18

Susumo Aku, Tumpu Allah Israel nompobuntumo tambuha'-Ku ka' pusang-Ku hi aha mian anu jojoong i Yerusalem sumo aijo'mo na Aku mompobuntu tambuha'-Ku kona hi belemiu anu mambamo i Mesir. Mian saidi' mae mabuhukmo na montoa belemiu; belemiu sola'mo o'alu, ka' sanggo nu belemiu lewa'mo opake' salaku bau pontotobi'akon. Belemiu madi'mo daagi' po ule' montoa lipu' nu belemiu aiya.”

YEREMIA 44:12

Ka' de maluanyo aha mian nu Yehuda anu daagi' tinontuha' suele ko kahanda' mamba i Mesir, da jojoongmo kiijo' mae, saba' aha suele silakamo ahi' iwi-iwi'. Aha iwi-iwi' anu tu'amo kabai anu daagi' anak silakamo i Mesir i uno nu pahampatean, kabai kalana kasusa'anmo i anu okaan. Mian timbalimo mabuhuk na montoa kantumuu'an nu aha ka' lewa'mo mongalu aha. Sanggo nu aha lewa'mo opake salaku bau pongkutuki.

YEREMIA 48:27

Te misa' naipuan mae mian nu Israel kinokojoanmo ahi' nu aha mian nu Moab ka' lewa'mo pinobau-bau au'aitu aha kinadapatanmo hingga-hinggat iba aha anu sola' montomang?

YEREMIA 49:17

Tumpu notatae, “Balaa' anu saidi' mae montokai Edom talalo ahi' daka' sahingga ihehe na mian anu motulu ikiijo' tolokengkengmo ka' mabuhukmo.

MOHAANGI 1:12

“O to mia-mian anu notulumo i jalan, toamo ka' palahatikan! Te daagi' mule' ko kasansala'an anu lebe maboat susumo anu ingoa'ankumo uuka aiya? Sakisa anu binee'mo mae nu Tumpu hi belengku, kalana pusanyo anu talalomo hondo aijo'?

YEHEZKIEL 27:36

Beleyum madi'mo otoa sampe toka sidu-sidutu'. To mia-mian anu badagang isongko-songko na dunia tinolokengkengmo kalana nabuhukmo dumo saidi' mae molasaimo susumo aijo'.”

2 TAWARIKH 29:8

Lantas Tumpu notambuha'mo sahingga nohukumo mian nu Yehuda ka' Yerusalem. Ka' belemiu iwi-iwi' nonsumbu'mo apaa na anu binaumo nu Tumpu aijo' nompotolokengkengmo ka' kinabuhukmo.

YEREMIA 29:18

Aha Ku pototumputimo nu pahampatean, kasusa'an i anu okaan, tiba panyakit anu molele, sahingga songko-songko na bansa idunia aiya anu montoa aha mabuhukmo na montoa kantumuu'an nu aha. Maumo pa' iyaya mae na pongga'a-ga'atakonan-Ku aha mian mabuhukmo, ka' meatmo na montoa apaa na anu jinadimo aijo' hi aha. Aha sola'mo okokojoi ka' mule' sanggo nu aha opakemo salaku bau lewa' pongkutuki.

YEREMIA 51:37

Lipu' aijo' timbalimo tambulan nu anu ihansunmo ka' mule' timbalimo tampat paninsulukan nu dedeng nu alas. Mian mabuhukmo na montoa, ka' madi'mo ko mian anu mongka'oho' jojoong ikiijo'.

YEREMIA 51:43

Iwi-iwi' na kota'nyo jinadimo tampat anu okabuhuk, sumomo ahi' padang tampat anu mateges ka' kinunmo. Madi'mo daagi' ko mian anu mongka'oho' jojoong kabai motulu ikiijo'.